Warumi 1

1Kutoka kwa Paulo, mtumishi wa Kristo Yesu, aliyeitwa kuwa mtume, akatengwa kwa ajili ya Injili ya Mungu. 2Mungu aliiahidi Injili hii tangu zamani kupitia manabii wake katika Maandiko Matakatifu. 3Inamhusu Mwana wake, ambaye kwa ukoo wa kibinadamu alizaliwa katika uzao wa Daudi, 4na ambaye aliwekwa kuwa Mwana wa Mungu mwenye nguvu, kupitia Roho wa utakatifu, kwa ufufuo wa wafu: Yesu Kristo Bwana wetu. 5Kupitia yeye tumepokea neema na utume, ili kuleta utii wa imani katika mataifa yote kwa heshima ya jina lake. 6Ninyi pia ni miongoni mwao, ninyi ambao Yesu Kristo amewaita muwe wake. 7Kwa ninyi nyote mlioko Roma, mnaopendwa na Mungu na mlioitwa kuwa watakatifu wake: neema na amani kutoka kwa Mungu Baba yetu na Bwana Yesu Kristo ziwe nanyi.

8Kwa kuanzia, ninamshukuru Mungu wangu kupitia Yesu Kristo kwa ajili ya kila mmoja wenu, kwa sababu watu kote ulimwenguni wanazungumza habari za imani yenu. 9Mungu, ninayemtumikia kwa roho yangu yote katika kuhubiri Injili ya Mwana wake, anaweza kushuhudia jinsi ninavyowakumbuka daima 10katika maombi yangu. Siku zote ninaomba kwamba kwa namna fulani, Mungu akipenda, hatimaye njia ifunguke nije kwenu. 11Ninatamani kuwaona ili niwagawie karama fulani ya kiroho itakayowaimarisha. 12Ninamaanisha kwamba, nikiwa pamoja nanyi, sote tutatiwa moyo kwa imani ya kila mmoja wetu, imani yenu na yangu. 13Ndugu, nataka mjue kwamba mara nyingi nimepanga kuja kwenu, ili nipate mavuno fulani kati yenu pia, kama nilivyopata kati ya watu wa mataifa wengine; lakini hadi sasa nimezuiwa. 14Nina wajibu kwa Wagiriki na kwa wasio Wagiriki, kwa wasomi na kwa wasiosoma. 15Kwa hiyo, mimi binafsi nina shauku ya kuwaletea Injili ninyi pia mlioko Roma.

16Siionei aibu Injili. Ni nguvu ya Mungu ikifanya kazi ili kuokoa kila mtu anayeamini, Myahudi kwanza na Mgiriki pia. 17Ndani ya Injili haki ya Mungu inafunuliwa, kutoka imani kwa ajili ya imani. Kama ilivyoandikwa, “Mtu aliye mwenye haki ataishi kwa imani.”

18Ghadhabu ya Mungu inafunuliwa kutoka mbinguni dhidi ya kutomcha Mungu kote na udhalimu wote wa wanadamu wanaoikandamiza kweli kwa udhalimu wao. 19Kwa maana kile kinachoweza kujulikana kuhusu Mungu kiko wazi kwao, kwa sababu Mungu mwenyewe amekiweka wazi kwao. 20Tangu ulimwengu ulipoumbwa, yale ambayo hayaonekani kuhusu Mungu, yaani nguvu zake zisizo na mwisho na hali yake ya uungu, yamekuwa wazi mbele ya macho, yakieleweka kupitia vitu alivyoviumba. Kwa hiyo hawana cha kujitetea. 21Ingawa walimjua Mungu, hawakumpa utukufu kama Mungu wala hawakumshukuru. Hoja zao zikageuka kuwa ubatili, na mioyo yao isiyo na ufahamu ikajaa giza. 22Walijidai kuwa na hekima, lakini wakawa wapumbavu. 23Walibadilisha utukufu wa Mungu asiyekufa kwa sanamu zilizotengenezwa kufanana na wanadamu wanaokufa, au ndege, au wanyama, au viumbe vinavyotambaa.

24Kwa hiyo Mungu aliwakabidhi kwa uchafu, katika tamaa kali za mioyo yao, nao wakaivunjia heshima miili yao wao kwa wao. 25Walibadilisha kweli kuhusu Mungu kwa ule uongo. Waliinamia viumbe na kuvitumikia badala ya yule aliyeviumba. Yeye ndiye wa kuhimidiwa milele. Amina.

26Ndiyo sababu Mungu aliwakabidhi kwa tamaa zinazoleta aibu. Wanawake wao waliacha uhusiano wa kimwili ulio wa asili, wakafanya yaliyo kinyume cha asili. 27Wanaume nao walifanya vivyo hivyo: waliacha uhusiano wa asili na wanawake, wakawaka kwa tamaa wao kwa wao. Wa kiume kwa wa kiume walitenda yaliyo ya aibu, nao wakapokea ndani yao adhabu inayostahili kupotoka kwao.

28Na kwa kuwa hawakuona kwamba inafaa kumkiri Mungu, Mungu aliwakabidhi kwa akili isiyofaa kitu, nao wanafanya mambo yasiyopaswa kufanywa kamwe. 29Kila aina ya udhalimu imewajaa: uovu, tamaa, ubaya. Wamejaa wivu, mauaji, ugomvi, udanganyifu na chuki. Wanasengenya wengine 30na kuwasema vibaya; wanamchukia Mungu; wanawadharau wengine; wana kiburi na wanajisifu; wanabuni maovu mapya; wanawaasi wazazi wao; 31hawana akili, hawana uaminifu, hawana upendo, hawana huruma. 32Wanaijua amri ya haki ya Mungu, kwamba watu wanaofanya mambo kama hayo wanastahili kufa; hata hivyo si tu kwamba wanayafanya, bali pia wanawashangilia wengine wanaoyafanya.