Warumi 15

1Sisi wenye nguvu tuna wajibu wa kuchukua madhaifu ya wale wasio na nguvu, badala ya kuishi ili kujipendeza wenyewe. 2Kila mmoja wetu ampendeze jirani yake, akilenga yaliyo mema kwake na yale yanayomjenga. 3Kwa maana hata Kristo hakuishi kwa ajili ya kujipendeza mwenyewe. Badala yake, kama ilivyoandikwa, “Matukano ya wale wanaokutukana wewe yameniangukia mimi.” 4Yote yaliyoandikwa nyakati za zamani yaliandikwa ili kutufundisha. Yaliandikwa ili tuwe na tumaini, tunapovumilia na Maandiko yanapotutia moyo. 5Mungu, ambaye hutoa uvumilivu na faraja, awawezeshe kuishi kwa umoja kati yenu, kama Kristo Yesu apendavyo, 6ili kwa pamoja, kwa sauti moja, mumpe utukufu Mungu na Baba wa Bwana wetu Yesu Kristo.

7Basi kila mmoja amkaribishe mwenzake, kama Kristo alivyowakaribisha ninyi, kwa utukufu wa Mungu. 8Kwa maana nawaambia kwamba Kristo alifanyika mtumishi wa watu waliotahiriwa kwa sababu ya kweli ya Mungu, ili kutimiza ahadi walizopewa mababa wa kale, 9na ili watu wa mataifa wamtukuze Mungu kwa sababu ya rehema yake. Kama ilivyoandikwa, “Ndiyo sababu nitakusifu wewe kati ya watu wa mataifa, na kuimba sifa kwa jina lako.” 10Na tena Andiko linasema, “Shangilieni, enyi watu wa mataifa, pamoja na watu wake.” 11Na tena, “Msifuni Bwana, enyi watu wote wa mataifa; makabila yote na yaimbe sifa zake.” 12Na tena Isaya anasema, “Mzizi wa Yese atakuja, yule anayeinuka kutawala watu wa mataifa; watu wa mataifa wataweka tumaini lao kwake yeye.” 13Mungu wa tumaini awajaze furaha na amani ya kila namna mnapoamini, ili kwa uweza wa Roho Mtakatifu mjae tumaini hadi kufurika.

14Ndugu zangu, mimi mwenyewe nina hakika juu yenu: mmejawa na wema, mna ujuzi wote, na mnaweza kushauriana. 15Hata hivyo, kuhusu mambo fulani nimewaandikia kwa ujasiri mwingi, ili kuwakumbusha tena. Nimefanya hivyo kwa sababu ya neema ambayo Mungu alinipa 16niwe mhudumu wa Kristo Yesu kwa ajili ya watu wa mataifa. Ninaitumikia Injili ya Mungu kama kuhani, ili watu wa mataifa wawe sadaka ambayo Mungu anaikubali, iliyotakaswa na Roho Mtakatifu. 17Kwa hiyo, katika Kristo Yesu nina sababu ya kuona fahari juu ya huduma yangu kwa Mungu. 18Sitathubutu kusema chochote isipokuwa yale ambayo Kristo amefanya kupitia kwangu ili kuwaleta watu wa mataifa kwenye utii, kwa yale niliyosema na kutenda, 19kwa uweza wa ishara na maajabu, kwa uweza wa Roho. Hivyo nimekamilisha kuhubiri Injili ya Kristo katika mzunguko mpana kutoka Yerusalemu mpaka Iliriko. 20Lengo langu limekuwa kuhubiri Injili mahali ambapo Kristo alikuwa bado hajajulikana, ili nisijenge juu ya msingi uliowekwa na mtu mwingine. 21Badala yake, kama ilivyoandikwa, “Wale ambao hawakuwahi kuambiwa habari zake wataona, na wale ambao hawakuwahi kusikia wataelewa.”

22Ndiyo sababu mara nyingi nimezuiwa nisije kwenu. 23Lakini sasa hakuna tena nafasi ya kazi yangu katika maeneo haya, na kwa miaka mingi nimetamani kuja kwenu 24nitakaposafiri kwenda Uhispania. Natumaini kuwaona nikipita, na kwamba mtanisaidia kuendelea na safari yangu kwenda huko, baada ya kufurahia ushirika wenu kwa muda. 25Lakini kwa sasa niko njiani kwenda Yerusalemu kuwatumikia watakatifu wa Mungu. 26Kwa maana makanisa ya Makedonia na Akaya yalifurahi kushiriki mali zao na maskini kati ya watakatifu wa Mungu huko Yerusalemu. 27Walifurahi kufanya hivyo, na kweli wanadaiwa nao. Ikiwa watu wa mataifa wamepata kushiriki baraka zao za kiroho, wanapaswa pia kuwatumikia kwa msaada wa mahitaji ya kimwili. 28Kwa hiyo nitakapokuwa nimemaliza kazi hii na kuhakikisha kwamba wamelipokea tunda hili, nitaondoka kwenda Uhispania na kuwatembelea njiani. 29Ninajua kwamba nitakapokuja kwenu kweli, nitakuja na baraka kamili ya Kristo.

30Ndugu, nawasihi kwa Bwana wetu Yesu Kristo na kwa upendo ambao Roho hutoa: ungeni nami katika mapambano yangu kwa kumwomba Mungu kwa ajili yangu. 31Ombeni niokolewe kutoka kwa wale walioko Yudea wanaokataa kuamini, na kwamba watakatifu wa Mungu huko Yerusalemu wapokee vizuri msaada ninaowaletea. 32Ndipo, Mungu akipenda, nitaweza kuja kwenu kwa furaha na kuburudika pamoja nanyi. 33Mungu wa amani akae pamoja nanyi nyote. Amina.