Warumi 3

1Basi, Myahudi ana ubora gani? Tohara ina manufaa gani? 2Ni mwingi, kwa kila hali. Kwanza kabisa, Wayahudi waliaminiwa maneno yenyewe ya Mungu. 3Basi, je? Ikiwa baadhi yao hawakuwa waaminifu, je, kutokuwa kwao waaminifu kunaubatilisha uaminifu wa Mungu? 4Hasha! Mungu na aonekane kuwa wa kweli, hata kama kila mwanadamu ni mwongo. Kama ilivyoandikwa, “Ili uonekane kuwa mwenye haki unaposema, na ushinde kesi yako unapohukumiwa.” 5Lakini ikiwa kutokuwa kwetu na haki kunaifanya haki ya Mungu ionekane wazi zaidi, tuseme nini? Je, basi, Mungu ni dhalimu anapoleta ghadhabu yake juu yetu? Ninasema kama wanadamu wasemavyo. 6Hasha! Kama ingekuwa hivyo, Mungu angewezaje kuuhukumu ulimwengu? 7Lakini ikiwa uongo wangu unaifanya kweli ya Mungu ionekane wazi zaidi, kwa utukufu wake, kwa nini mimi pia bado ninahukumiwa kuwa mwenye dhambi? 8Na kwa nini tusifanye kama wengine wanavyotusingizia kwamba tunafundisha: “Tutende maovu ili mema yatokee”? Watu kama hao wanastahili kuhukumiwa.

9Basi, ni nini? Je, sisi Wayahudi tuna ubora wowote? Hapana kabisa. Tumekwisha kutoa mashtaka kwamba wote, Wayahudi na Wagiriki vilevile, wako chini ya nguvu ya dhambi. 10Kama ilivyoandikwa, “Hakuna mtu aliye mwenye haki, hakuna hata mmoja. 11Hakuna anayeelewa; hakuna anayemtafuta Mungu.” 12“Wote wamegeuka mbali; kwa pamoja wameharibika. Hakuna anayetenda mema, hakuna hata mmoja.” 13“Koo lao ni kama kaburi lililoachwa wazi; kwa ndimi zao wanafanya hila. Sumu ya nyoka imejificha nyuma ya midomo yao. 14Vinywa vyao vinafurika maneno ya laana na ya uchungu.” 15“Wanakimbilia kumwaga damu; 16popote waendapo huacha maangamizi na dhiki, 17nao hawajawahi kuijua njia ya amani.” 18“Kumcha Mungu hakuonekani popote machoni pao.”

19Tunajua kwamba yale ambayo sheria inasema yanawahusu wale wanaoishi chini ya sheria. Yamesemwa ili kila kinywa kinyamaze, na ulimwengu wote uwajibike mbele za Mungu. 20Hakuna mtu atakayehesabiwa haki mbele yake kwa matendo ya sheria. Kazi ya sheria ni kuifanya dhambi itambulike.

21Lakini sasa haki ya Mungu imeonyeshwa wazi bila sheria, ingawa Maandiko ya Sheria na Manabii yanaishuhudia. 22Ni haki ya Mungu kupitia imani katika Yesu Kristo, kwa ajili ya wote wanaoamini. Hakuna anayetendewa tofauti. 23Wote wametenda dhambi, na wote wanaukosa utukufu wa Mungu. 24Lakini wanahesabiwa haki kama zawadi, bila malipo, kwa neema yake, kupitia ukombozi unaopatikana katika Kristo Yesu. 25Mungu alimweka yeye hadharani kuwa njia ya upatanisho, kwa damu yake, ipokewe kwa imani. Alifanya hivyo ili kuonyesha haki yake, kwa kuwa alikuwa ameziacha bila adhabu dhambi zilizotendwa zamani, 26wakati Mungu alipoizuia hukumu yake. Alifanya hivyo ili kuonyesha haki yake wakati huu wa sasa, ili yeye awe mwenye haki, na pia awe yule anayemhesabia haki kila mtu aliye na imani katika Yesu.

27Basi, kuna nafasi gani iliyobaki ya kujivuna? Kumefungiwa nje. Kwa sheria gani? Sheria ya matendo? Hapana, kwa sheria ya imani. 28Kwa maana tuna hakika kwamba mtu anahesabiwa haki kwa imani, bila matendo ya sheria. 29Au je, Mungu ni Mungu wa Wayahudi peke yao? Je, yeye si Mungu wa watu wa mataifa pia? Ndiyo, wa watu wa mataifa pia, 30kwa kuwa Mungu ni mmoja. Atawahesabia haki waliotahiriwa kwa imani, na wasiotahiriwa kupitia imani hiyo hiyo. 31Je, basi, imani hii inamaanisha kwamba tunaibatilisha sheria? Hasha! Badala yake, tunaitegemeza sheria.