Warumi 12

1Basi ndugu, nawasihi kwa rehema za Mungu: mtoe miili yenu kwa Mungu kama dhabihu hai, takatifu na inayompendeza. Hiyo ndiyo ibada yenu ya busara. 2Msikubali zama hizi za sasa ziwafinyange kwa umbo lake, bali mbadilishwe kabisa kadiri akili zenu zinavyofanywa mpya. Ndipo mtaweza kupima na kutambua mapenzi ya Mungu: yaliyo mema, yanayompendeza na yaliyo kamili.

3Kwa neema niliyopewa, ninamwambia kila mmoja wenu: usijione kuwa bora kuliko unavyopaswa. Badala yake, fikiri kwa kiasi na kwa busara, kulingana na kipimo cha imani ambacho Mungu amempa kila mmoja. 4Mwili mmoja una viungo vingi, na si viungo vyote vyenye kazi ileile. 5Vivyo hivyo, ingawa tu wengi, sisi ni mwili mmoja katika Kristo, na kila mmoja wetu ni kiungo cha wengine wote. 6Tuna karama zinazotofautiana, kulingana na neema tuliyopewa. Ikiwa karama ya mtu ni unabii, na atoe unabii kulingana na imani yake. 7Ikiwa ni kuhudumu, na ajitoe katika kuhudumu; anayefundisha, katika kufundisha; 8anayetia moyo, katika kutia moyo. Anayewagawia wengine na agawe kwa ukarimu; anayeongoza, kwa juhudi; anayeonyesha rehema, kwa moyo mkunjufu.

9Upendo wenu uwe wa kweli, bila kujifanya. Lichukieni kabisa lililo baya, na mng’ang’anie lililo jema. 10Pendaneni kwa moyo kama ndugu wa familia moja; muwe wa kwanza kuheshimiana. 11Bidii yenu isipungue kamwe; muwe na moto wa Roho; mtumikieni Bwana. 12Tumaini lenu liwape furaha daima; vumilieni katika dhiki; msiache kuomba. 13Changieni mahitaji ya watakatifu, na muwe na hamu ya kuwakaribisha wageni. 14Wabarikini watu wanaowatesa. Wabarikini, wala msiwalaani. 15Shirikini furaha ya walio na furaha, na machozi ya wanaolia. 16Muwe na mtazamo mmoja kati yenu. Msitamani mambo ya fahari, bali furahini kuandamana na watu wa hali ya chini. Msijione kuwa wenye hekima. 17Msimrudishie mtu yeyote uovu kwa uovu aliowatendea. Pangeni mapema kutenda yale ambayo kila mtu anayatambua kuwa mema. 18Ikiwezekana, na kwa kadiri inavyowategemea ninyi, dumisheni amani na kila mtu. 19Wapendwa, kamwe msijilipizie kisasi. Jiwekeni kando, iachieni ghadhabu ya Mungu ifanye kazi yake, kwa maana imeandikwa, “Kisasi ni changu; mimi nitalipa,” asema Bwana. 20Badala yake, ikiwa adui yako ana njaa, mpe chakula; ikiwa ana kiu, mpe kitu cha kunywa. Kwa kufanya hivyo utarundika makaa yanayowaka juu ya kichwa chake. 21Usiruhusu uovu ukushinde; uushinde uovu kwa mema.