Warumi 9

1Ninasema kweli katika Kristo; sidanganyi. Dhamiri yangu, katika Roho Mtakatifu, inashuhudia pamoja nami 2kwamba nina huzuni kubwa, na maumivu ya moyo wangu hayakomi. 3Ningeweza hata kutamani mimi mwenyewe niwe chini ya laana na kutengwa na Kristo, kwa ajili ya ndugu zangu, watu wa taifa langu kwa ukoo wa kibinadamu. 4Wao ni Waisraeli. Ni wao waliofanywa kuwa wana wa Mungu; ni wao wenye utukufu, maagano, sheria waliyopewa, ibada na ahadi. 5Mababu wa taifa ni wao, na kutoka kwao, kwa ukoo wa kibinadamu, ametoka Kristo, aliye Mungu juu ya vyote, anayehimidiwa milele. Amina.

6Lakini hii haimaanishi kwamba neno la Mungu limeshindwa. Kwa maana si kila aliyetoka katika ukoo wa Israeli ni wa Israeli kweli. 7Wala si wote ni watoto wa Ibrahimu kwa sababu tu ni wazawa wake. Badala yake, “Uzao wako utatajwa kupitia Isaka.” 8Maana yake ni kwamba si watoto waliozaliwa kwa njia ya kawaida ya kibinadamu walio watoto wa Mungu. Ni watoto wa ahadi wanaohesabiwa kuwa uzao wa Ibrahimu. 9Kwa maana hivi ndivyo ahadi ilivyosema: “Wakati kama huu nitarudi, na Sara atazaa mwana.” 10Na hilo silo pekee. Rebeka pia alipata mimba ya watoto kwa mwanamume mmoja, babu yetu Isaka. 11Watoto walikuwa bado hawajazaliwa, na hawakuwa wamefanya lolote jema au baya. Hata hivyo, ili kusudi la Mungu katika kuchagua lisimame imara, 12kusudi lisilotegemea matendo bali yule anayeita, Rebeka aliambiwa, “Mkubwa atamtumikia mdogo wake.” 13Kama ilivyoandikwa, “Nilimpenda Yakobo, lakini Esau nilimchukia.”

14Basi, tuseme nini? Je, Mungu anatenda udhalimu? Hata kidogo! 15Kwa maana Mungu anamwambia Musa, “Nitamrehemu yeyote nitakayemrehemu, na nitamhurumia yeyote nitakayemhurumia.” 16Basi jambo hili halitegemei kile mtu anachotaka wala jinsi anavyojitahidi, bali linamtegemea Mungu, anayerehemu. 17Kwa maana Maandiko yanamwambia Farao, “Hii ndiyo sababu hasa nilikuinua: ili nionyeshe nguvu zangu kupitia wewe, na ili jina langu lijulikane katika dunia nzima.” 18Kwa hiyo Mungu anamrehemu yeyote anayemchagua, na anaufanya mgumu moyo wa yeyote anayemchagua.

19Basi utaniambia, “Kwa nini basi Mungu bado anawalaumu watu?” Kwa maana ni nani awezaye kusimama dhidi ya mapenzi yake? 20Lakini wewe, uliye mwanadamu tu, ni nani hata ujibizane na Mungu? Je, kilichotengenezwa kitamwuliza aliyekitengeneza, “Kwa nini umenifanya namna hii?” 21Je, mfinyanzi hana mamlaka juu ya udongo? Kutoka katika bonge moja lilelile anaweza kutengeneza chungu kimoja kwa matumizi ya heshima na kingine kwa matumizi ya kawaida. 22Je, ikiwa Mungu, akitaka kuonyesha ghadhabu yake na kujulisha nguvu zake, amevistahimili kwa uvumilivu mkubwa vyombo vya ghadhabu, vilivyoandaliwa kwa ajili ya uharibifu? 23Je, ikiwa alifanya hivyo ili kujulisha utajiri wa utukufu wake kwa vyombo vya rehema, alivyoviandaa tangu mwanzo kwa ajili ya utukufu, 24yaani sisi, ambao ametuita si kutoka miongoni mwa Wayahudi tu, bali pia kutoka miongoni mwa watu wa mataifa? 25Kama asemavyo katika Hosea, “Wale ambao hawakuwa watu wangu nitawaita ‘watu wangu,’ na yule ambaye hakupendwa nitamwita ‘mpendwa.’” 26“Na palepale walipoambiwa, ‘Ninyi si watu wangu,’ ndipo watakapoitwa wana wa Mungu aliye hai.” 27Na Isaya anatangaza kwa sauti kuhusu Israeli: “Ingawa watu wa Israeli ni wengi kama chembe za mchanga wa pwani, mabaki yataokolewa.” 28“Kwa maana Bwana atatekeleza hukumu yake duniani, kikamilifu na bila kukawia.” 29Na kama Isaya alivyosema hapo awali, “Kama Bwana wa Majeshi hangetuachia wazao wachache, tungekuwa kama Sodoma, tungefanana na Gomora.”

30Basi, tuseme nini? Kwamba watu wa mataifa, ambao hawakuwa wakiitafuta haki, wameipata, yaani haki inayokuja kwa imani. 31Lakini Israeli, walioikimbilia sheria iliyowawekea haki mbele yao, hawakuifikia sheria hiyo. 32Kwa nini hawakuifikia? Kwa sababu hawakuitafuta kwa imani, bali kana kwamba ingepatikana kwa matendo. Walijikwaa juu ya jiwe linalowakwaza watu, 33kama ilivyoandikwa: “Angalia, ninaweka katika Sayuni jiwe la kujikwalia, mwamba unaowaangusha, na yeyote anayemwamini yeye hataaibishwa.”