Warumi 8

1Basi sasa, wale walio katika Kristo Yesu hawakabiliwi na hukumu yoyote ya kuadhibiwa. 2Kwa maana katika Kristo Yesu, sheria ya Roho anayetoa uzima imekuweka huru kutoka kwa sheria ya dhambi na kifo. 3Sheria haikuwa na uwezo, kwa kuwa asili ya dhambi iliidhoofisha. Kwa hiyo Mungu alitenda. Alimtuma Mwana wake mwenyewe akiwa na mfano wa mwili wenye dhambi, kama sadaka kwa ajili ya dhambi, na katika mwili huo akaitolea dhambi hukumu. 4Alifanya hivyo ili matakwa ya haki ya sheria yatimizwe kikamilifu ndani yetu, sisi tunaoishi tukiongozwa na Roho, wala si na asili ya dhambi. 5Wale walio chini ya utawala wa asili ya dhambi huelekeza mawazo yao kwenye mambo ya asili ya dhambi, lakini wale walio chini ya utawala wa Roho, kwenye mambo ya Roho. 6Mtazamo wa asili ya dhambi unaleta kifo, lakini mtazamo wa Roho unaleta uzima na amani. 7Hii ni kwa sababu mtazamo wa asili ya dhambi uko vitani na Mungu. Hautii sheria ya Mungu, na kwa kweli hauwezi kuitii. 8Watu walio chini ya utawala wa asili ya dhambi hawana uwezo wa kumpendeza Mungu.

9Lakini ninyi hamko chini ya utawala wa asili ya dhambi; mko chini ya utawala wa Roho, ikiwa kweli Roho wa Mungu amefanya makao ndani yenu. Ikiwa mtu hana Roho wa Kristo, mtu huyo si wake. 10Lakini ikiwa Kristo yuko ndani yenu, mwili umeandikiwa kufa kwa sababu ya dhambi, lakini Roho ni uzima kwenu kwa sababu ya haki. 11Na ikiwa Roho wa yule aliyemfufua Yesu kutoka kwa wafu amefanya makao ndani yenu, basi Mungu, aliyemfufua Kristo Yesu kutoka kwa wafu, ataipa uzima pia miili yenu inayokufa, kwa sababu Roho wake anaishi ndani yenu.

12Kwa hiyo, ndugu, tunadaiwa, lakini si na asili ya dhambi, ili tuishi kama inavyotuamuru. 13Mkiishi kama asili ya dhambi inavyoamuru, mnaelekea kifo. Lakini kwa Roho mkiendelea kuyaua matendo ya mwili, mtaishi. 14Wale ambao Roho wa Mungu anawaongoza siku kwa siku, hao ndio wana wa Mungu. 15Hamkupokea roho ya utumwa ambayo ingewarudisha tena chini ya hofu. Mlimpokea Roho wa kufanywa wana, na katika Roho tunaita, “Aba, Baba!” 16Roho mwenyewe anaungana na roho yetu katika kutoa ushahidi kwamba sisi ni watoto wa Mungu. 17Ikiwa sisi ni watoto, basi sisi ni warithi pia. Sisi ni warithi wa Mungu, na tunarithi pamoja na Kristo, ikiwa tunateseka pamoja naye ili tutukuzwe pia pamoja naye.

18Nimelipima jambo hili: tunayoteseka katika wakati huu uliopo hayakaribii hata kidogo uzito wa utukufu utakaofunuliwa kwetu. 19Ulimwengu ulioumbwa unanyoosha shingo kwa hamu, ukingoja wana wa Mungu wadhihirishwe. 20Uumbaji ulifanywa kuwa chini ya hali ya kukosa maana. Haukuchagua hivyo wenyewe; ilikuwa kwa sababu ya yule aliyeutiisha. Hata hivyo kulikuwa na tumaini: 21uumbaji wenyewe pia utafunguliwa kutoka katika utumwa wake wa kuoza, na kuingia katika uhuru unaoambatana na utukufu wa watoto wa Mungu. 22Tunajua kwamba uumbaji wote, hadi leo hii, unaugua kwa pamoja na kuteseka pamoja kwa uchungu wa kuzaa. 23Wala si uumbaji peke yake. Sisi wenyewe, tulio na Roho kama sehemu ya kwanza ya mavuno, nasi tunaugua ndani yetu huku tukitamani kufanywa wana, mwili wetu utakapokombolewa. 24Ilikuwa katika tumaini kwamba tuliokolewa. Lakini tumaini ambalo tayari linaonekana si tumaini hata kidogo. Ni nani anayeendelea kutumainia kitu kilicho mbele yake tayari? 25Lakini ikiwa tunachotumainia ni kitu ambacho bado hatukioni, tunaendelea kukingoja kwa uvumilivu.

26Vivyo hivyo, Roho naye anatushika mkono katika udhaifu wetu. Hatujui tuombe nini, wala jinsi ya kuomba. Lakini Roho mwenyewe anaomba kwa niaba yetu, kwa kuugua ambako maneno hayawezi kubeba. 27Naye Mungu, anayetazama ndani kabisa ya mioyo, anajua kile Roho anachokusudia, kwa sababu Roho anawaombea watu watakatifu wa Mungu kulingana na mapenzi ya Mungu.

28Tunajua kwamba, kwa watu wanaompenda Mungu, mambo yote yanashirikiana na kuelekea kwenye mema. Hao ndio wale walioitwa kulingana na kusudi lake. 29Wale ambao Mungu aliwajua tangu awali, aliwatenga pia tangu awali wafanywe kuwa na sura ya Mwana wake, ili Mwana awe mzaliwa wa kwanza kati ya ndugu wengi. 30Na wale aliowatenga tangu awali, aliwaita pia. Wale aliowaita, aliwahesabia haki pia. Na wale aliowahesabia haki, aliwatukuza pia.

31Basi, tujibu nini kuhusu haya yote? Ikiwa Mungu yuko upande wetu, ni nani anayeweza kusimama dhidi yetu? 32Mungu hakumzuilia hata Mwana wake mwenyewe, bali alimkabidhi kwa ajili yetu sote. Basi angewezaje kukosa kutupa kila kitu pamoja naye kama zawadi ya bure? 33Ni nani atakayeleta shtaka lolote dhidi ya wale ambao Mungu amewachagua? Ni Mungu anayewahesabia haki. 34Ni nani atakayewatia hatiani? Kristo ndiye aliyekufa; zaidi ya hapo, alifufuliwa, naye yuko mkono wa kulia wa Mungu, ambapo anaomba kwa niaba yetu. 35Ni nani anayeweza kutung’oa kutoka katika upendo wa Kristo? Je, ni taabu, au dhiki, au kuteswa? Je, ni njaa, au kukosa mavazi, au hatari, au upanga? 36Kama ilivyoandikwa, “Kwa sababu yako tunauawa siku nzima; tunatazamwa kama kondoo wa kupelekwa kwa mchinjaji.” 37Lakini katikati ya haya yote tunashinda, tena tunashinda kwa mbali, kupitia yule aliyetupenda. 38Kwa maana nina hakika kabisa kwamba si kifo wala uzima, si malaika wala watawala, si mambo yaliyopo sasa wala yale yatakayokuja, si nguvu zozote, 39si vilivyo juu sana wala vilivyo chini kabisa, wala kitu kingine chochote kilichoumbwa: hakuna kitakachoweza kutukatilia mbali na upendo wa Mungu, ambao ni wetu katika Kristo Yesu Bwana wetu.