Warumi 13

1Kila mtu anapaswa kujitiisha chini ya wenye mamlaka wanaotawala, kwa sababu hakuna mamlaka inayokuwepo isipokuwa kwa mpango wa Mungu, na wenye mamlaka waliopo wamewekwa hapo na Mungu. 2Kwa hiyo, mtu anayejiweka kinyume na mamlaka anasimama kinyume na utaratibu ambao Mungu ameuweka, na wanaosimama hivyo watajiletea hukumu. 3Watawala hawapaswi kuogopwa na mtu anayetenda mema, bali na anayetenda mabaya tu. Je, ungependa kutomwogopa yeye aliye na mamlaka? Basi tenda yaliyo mema, nawe utapata kibali chake. 4Kwa maana mtawala ni mtumishi wa Mungu, anayefanya kazi kwa faida yako. Lakini ukifanya mabaya, basi uogope, kwa sababu mtawala hashiki upanga bila sababu. Yeye ni mtumishi wa Mungu, anayelipiza kisasi na kuleta ghadhabu juu ya mtu yeyote anayefanya mabaya. 5Kwa hiyo ni lazima mjitiishe, si ili kuepuka ghadhabu tu, bali pia kwa ajili ya dhamiri. 6Hii ndiyo sababu pia mnalipa kodi: wenye mamlaka ni watumishi wa Mungu katika kazi ya umma, nao wanajitoa kwa kazi hii hasa. 7Mlipeni kila mtu kile mnachodaiwa naye: kodi kwa anayekusanya kodi, ushuru kwa anayekusanya ushuru, staha kwa anayestahili staha, heshima kwa anayestahili heshima.

8Msibaki na deni kwa mtu yeyote, isipokuwa deni la upendo, ambalo mnadaiwa ninyi kwa ninyi. Mtu anayempenda mtu mwingine ametimiza sheria. 9Amri hizi, “Usizini,” “Usiue,” “Usiibe,” “Usitamani,” pamoja na amri nyingine yoyote iliyopo, zote zimekusanywa katika neno hili moja: “Mpende jirani yako kama unavyojipenda mwenyewe.” 10Upendo haumdhuru jirani, na kwa hiyo upendo ndio unaotimiza sheria.

11Fanyeni hivyo kwa sababu mnajua ni wakati gani huu: tayari ni wakati wenu wa kuamka usingizini. Wokovu wetu uko karibu zaidi sasa kuliko wakati tulipoamini kwa mara ya kwanza. 12Usiku unakaribia kwisha; mchana u karibu. Kwa hiyo tuvue kama nguo matendo yaliyo ya giza, na tuvae deraya ya nuru. 13Tuishi kwa adabu, kama watu waishivyo mchana: si katika sherehe za anasa na ulevi, si katika uasherati na tabia za aibu zisizo na kiasi, si katika ugomvi na wivu. 14Badala yake, jivikeni Bwana Yesu Kristo kama vazi, wala msifanye mipango ya kutimiza tamaa za asili ya dhambi.