Warumi 11

1Basi nauliza: Je, Mungu amewakataa watu wake? Hasha! Mimi mwenyewe ni Mwisraeli, mzao wa Ibrahimu, wa kabila la Benyamini. 2Mungu hajawakataa watu wake, aliowajua tangu awali. Au hamjui Maandiko yanavyosema katika habari za Eliya, jinsi alivyomlalamikia Mungu kuhusu Israeli? 3“Bwana, wamewaua manabii wako na kuzivunjavunja madhabahu zako. Ni mimi peke yangu niliyesalia, na sasa wanajaribu kuniondolea uhai.” 4Lakini jibu la Mungu kwake lilikuwa nini? “Nimejiwekea watu elfu saba ambao hawakupiga magoti mbele ya Baali.” 5Vivyo hivyo, hata wakati huu wa sasa kuna mabaki, yaliyochaguliwa kwa neema. 6Na ikiwa ni kwa neema, basi haitokani tena na matendo; vinginevyo neema ingekoma kuwa neema. 7Basi je? Israeli hakukipata kile alichokuwa akikitafuta. Wale ambao Mungu aliwachagua walikipata, lakini wengine walifanywa wagumu, 8kama ilivyoandikwa: “Mungu amewapa roho ya bumbuazi, macho yasiyoona na masikio yasiyosikia, hadi leo hii.” 9Na Daudi anasema: “Meza yao na igeuke kuwa mtego na wavu, kikwazo na adhabu wanayostahili. 10Macho yao na yafunikwe na giza wasiweze kuona, na migongo yao uipinde milele.”

11Basi nauliza: Je, walijikwaa hata wakaanguka kabisa? Hasha! Badala yake, kupitia kosa lao wokovu umewafikia watu wa mataifa, ili kuwafanya Waisraeli waone wivu. 12Basi, ikiwa kosa lao limeleta utajiri kwa ulimwengu, na kushindwa kwao kumeleta utajiri kwa watu wa mataifa, utimilifu wao utaleta utajiri mkubwa zaidi kiasi gani!

13Sasa ninasema nanyi mlio watu wa mataifa. Basi, kwa kuwa mimi ni mtume kwa watu wa mataifa, naipa huduma yangu uzito mkubwa, 14nikitumaini kwamba kwa namna fulani nitawatia wivu ndugu zangu wa damu na kuwaokoa baadhi yao. 15Kwa maana ikiwa kukataliwa kwao kunaleta upatanisho wa ulimwengu, kupokelewa kwao kutaleta nini? Si kitu kingine ila uzima kutoka kwa wafu! 16Ikiwa sehemu ya unga uliokandwa inayotolewa kama limbuko ni takatifu, basi donge zima ni takatifu; na ikiwa mzizi ni mtakatifu, matawi nayo ni matakatifu.

17Basi, ikiwa baadhi ya matawi yalivunjwa, nawe, ingawa ulikuwa chipukizi la mzeituni mwitu, ukapandikizwa katikati yao na sasa unashiriki mzizi wenye rutuba wa mzeituni, 18usijigambe mbele ya matawi. Ukijigamba, kumbuka: wewe hauushikilii mzizi; mzizi ndio unaokushikilia wewe. 19Hapo utasema: “Matawi yalivunjwa ili nipate kupandikizwa mimi.” 20Ni kweli. Yalivunjwa kwa sababu ya kutoamini kwao, lakini wewe umesimama imara kwa imani. Usiwe na kiburi, bali uwe na hofu. 21Kwa maana ikiwa Mungu hakuyahurumia matawi yaliyoota kwa asili kwenye mti, hatakuhurumia wewe pia. 22Basi angalia fadhili na ukali wa Mungu: ukali kwa wale walioanguka, lakini fadhili za Mungu kwako, maadamu unadumu katika fadhili zake. Vinginevyo, wewe pia utakatwa. 23Na wao pia, wasipoendelea katika kutoamini, watapandikizwa, kwa sababu Mungu ana uwezo wa kuwapandikiza tena. 24Hata hivyo, ikiwa wewe ulikatwa kutoka kwenye mzeituni ambao kwa asili ni mwitu, na kinyume cha asili ukapandikizwa katika mzeituni uliopandwa, itakuwa rahisi zaidi kiasi gani matawi haya ya asili kupandikizwa tena katika mzeituni wao wenyewe!

25Ndugu, nataka mwielewe siri hii, ili msijione kuwa wenye hekima: ugumu umekuja juu ya sehemu ya Israeli hadi idadi kamili ya watu wa mataifa itakapoingia. 26Na hivyo ndivyo Israeli wote watakavyookolewa. Kama ilivyoandikwa: “Mwokoaji atakuja kutoka Sayuni; ataondoa kutomcha Mungu kutoka kwa Yakobo.” 27“Nitakapoziondoa dhambi zao, hili ndilo litakalokuwa agano langu pamoja nao.” 28Kwa upande wa Injili, wao ni maadui kwa faida yenu; lakini kwa upande wa uchaguzi wa Mungu, wanapendwa kwa sababu ya mababu. 29Kwa maana karama na wito wa Mungu haviwezi kamwe kurudishwa nyuma. 30Hapo zamani mlikuwa wasiomtii Mungu, lakini sasa mmeonyeshwa rehema kwa sababu ya kutotii kwao. 31Vivyo hivyo, wao sasa wamekuwa wasiotii, ili kwa rehema ambayo Mungu amewaonyesha ninyi, wao pia sasa waonyeshwe rehema. 32Kwa maana Mungu amewafungia watu wote pamoja ndani ya kutotii, ili apate kuwaonyesha wote rehema.

33Utajiri na hekima na maarifa ya Mungu ni ya kina kirefu mno! Hakuna awezaye kuzichunguza hukumu zake, wala kuzifuatilia njia zake!

34Kwa maana “ni nani amepata kuijua akili ya Bwana?” “Au ni nani amekuwa mshauri wake?” 35“Au ni nani aliyempa kitu kwanza, hata alazimike kumlipa?” 36Kwa maana vitu vyote vimetoka kwake, vipo kupitia yeye, na ni kwa ajili yake. Utukufu uwe kwake milele! Amina.