Warumi 2

1Kwa hiyo huna cha kujitetea, yeyote yule uliye, unapowahukumu wengine. Kwa kumhukumu mwingine unajitia hatiani mwenyewe, kwa sababu wewe, mwamuzi, unafanya mambo hayo hayo. 2Tunajua kwamba hukumu ya Mungu juu ya wale wanaofanya mambo kama hayo inategemea kweli. 3Unapowahukumu wale wanaofanya mambo kama hayo na huku wewe mwenyewe unayafanya, je, kweli unadhani wewe utaikwepa hukumu ya Mungu? 4Au unaudharau utajiri wa wema wake, wa uvumilivu wake na wa subira yake? Je, huoni kwamba Mungu anakutendea wema ili akuongoze utubu? 5Lakini moyo wako ni mgumu na haukubali kutubu, na hivyo unajilimbikizia hazina ya ghadhabu kwa ajili ya siku ya ghadhabu, siku ambayo Mungu atadhihirisha hukumu yake ya haki. 6Yeye atampa kila mtu kile ambacho matendo yake yanastahili. 7Wale wanaodumu katika kutenda mema, wakitafuta utukufu, heshima na kutokufa, yeye atawapa uzima wa milele. 8Lakini kwa wale wanaoongozwa na ubinafsi, wanaoikataa kweli na kufuata udhalimu badala yake, kutakuwa na ghadhabu na ukali. 9Kutakuwa na dhiki na taabu kwa kila mwanadamu atendaye uovu, Myahudi kwanza na Mgiriki pia. 10Lakini kutakuwa na utukufu, heshima na amani kwa kila mtu atendaye mema, Myahudi kwanza na Mgiriki pia. 11Kwa maana Mungu hampendelei mtu mmoja kuliko mwingine.

12Wale wanaotenda dhambi bila kuwa na sheria wataangamia bila sheria, na wale wanaotenda dhambi wakiwa chini ya sheria watahukumiwa kwa sheria. 13Kusikia sheria hakumfanyi mtu yeyote kuwa mwenye haki mbele za Mungu; wale wanaotenda yale ambayo sheria inasema ndio watakaohesabiwa haki. 14Watu wa mataifa hawana sheria. Lakini wanapotenda kwa asili yale ambayo sheria inasema, wao wenyewe wanakuwa sheria kwa nafsi zao, ingawa hawakupewa sheria. 15Mwenendo wao unaonyesha kwamba kazi ya sheria imeandikwa mioyoni mwao. Dhamiri yao nayo inashuhudia, na mawazo yao yanabishana yenyewe kwa yenyewe, mara yakiwashtaki, mara yakiwatetea, 16katika siku ile ambayo Mungu, kupitia Kristo Yesu, atahukumu mambo yaliyofichika katika maisha ya watu, kama Injili ninayoihubiri inavyosema.

17Basi, wewe unajiita Myahudi. Unaitegemea sheria na kujivunia Mungu. 18Unayajua mapenzi yake, na kwa kuwa sheria imekufundisha, unaweza kupambanua yaliyo muhimu zaidi. 19Una uhakika kwamba unaweza kuwaongoza vipofu na kuwa nuru kwa watu walio gizani, 20mtu anayewaonya wapumbavu na kuwafundisha wachanga, kwa sababu katika sheria unacho kielelezo kamili cha maarifa na kweli. 21Basi unawafundisha wengine; je, hutajifundisha mwenyewe? Unahubiri kwamba watu wasiibe; je, wewe unaiba? 22Unasema kwamba watu wasizini; je, wewe unazini? Unazichukia sanamu za miungu; je, unayaibia mahekalu? 23Unajivunia sheria; je, unamvunjia Mungu heshima kwa kuivunja? 24Kama ilivyoandikwa, “Kwa sababu yenu jina la Mungu linatukanwa kati ya watu wa mataifa.”

25Tohara ina thamani ukiishika sheria. Lakini ukiivunja sheria, ni sawa na kwamba hukutahiriwa. 26Basi ikiwa mtu asiyetahiriwa anashika yale ambayo sheria inataka, je, Mungu hatamhesabu kuwa ametahiriwa? 27Mtu ambaye hakutahiriwa kwa kuzaliwa lakini anaitimiza sheria atakuhukumu wewe, uliye na sheria iliyoandikwa na umetahiriwa, lakini unaivunja sheria. 28Kwa maana mtu hawi Myahudi kwa sababu ya mambo ya nje, wala tohara si jambo la nje katika mwili. 29Bali Myahudi wa kweli ni yule aliye Myahudi ndani yake, na tohara yenye maana ni ile ya moyo, kwa Roho wala si kwa andiko. Mtu huyo hupata sifa kutoka kwa Mungu, si kutoka kwa wanadamu.