Warumi 4

1Basi, tuseme Ibrahimu, babu yetu kwa ukoo wa kimwili, aligundua nini? 2Tuseme Ibrahimu alihesabiwa haki kwa sababu ya matendo yake: basi angekuwa na sababu ya kujivuna, lakini si mbele za Mungu. 3Maandiko yanasema nini? “Ibrahimu alimwamini Mungu, na hilo likahesabiwa kwake kuwa haki.” 4Mshahara wa mfanyakazi hauhesabiwi kuwa neema, bali kuwa deni analostahili kulipwa. 5Lakini kwa mtu asiyefanya kazi, ila anamwamini Mungu anayemhesabia haki mtu asiyemcha Mungu, imani hiyo inahesabiwa kuwa haki. 6Daudi anasema vivyo hivyo anapozungumza juu ya furaha ya mtu ambaye Mungu anamhesabu kuwa mwenye haki bila matendo: 7“Wana furaha kweli wale ambao maovu yao yamesamehewa, ambao dhambi zao zimefunikwa! 8Ana furaha kweli mtu ambaye Bwana hatamhesabia dhambi yake kamwe!”

9Je, basi, baraka hii ni kwa ajili ya waliotahiriwa tu, au pia kwa ajili ya wasiotahiriwa? Tumekuwa tukisema kwamba imani ya Ibrahimu ilihesabiwa kwake kuwa haki. 10Basi, ilihesabiwa katika hali gani? Je, ilikuwa baada ya yeye kutahiriwa, au kabla? Haikuwa baada, bali kabla. 11Tohara ilitolewa kwake baadaye kama ishara, muhuri juu ya haki ambayo tayari ilikuwa yake kwa imani kabla hajatahiriwa. Kwa njia hii yeye ni baba wa kila mtu anayeamini bila kutahiriwa, ili haki ihesabiwe kwao. 12Naye ni baba wa waliotahiriwa pia: si wa wale waliotahiriwa tu, bali wa wale wanaotembea katika njia ile ile ya imani ambayo baba yetu Ibrahimu aliitembea alipokuwa bado hajatahiriwa.

13Ahadi kwamba angeurithi ulimwengu haikumjia Ibrahimu wala uzao wake kupitia sheria, bali kupitia haki ya imani. 14Ikiwa warithi ni wale wanaotegemea sheria, imani inakuwa haina maana, na ahadi inakuwa haina thamani. 15Sheria huleta ghadhabu. Lakini mahali pasipo na sheria, hakuna kuivunja sheria pia.

16Kwa hiyo ahadi inakuja kwa imani, ili itegemee neema na iwe imara kwa uzao wote wa Ibrahimu: si kwa wale walio wa sheria tu, bali pia kwa wale walio wa imani ya Ibrahimu, baba yetu sote. 17Maandiko yanasema, “Nimekufanya kuwa baba wa mataifa mengi.” Mbele za Mungu yeye ni baba yetu, Mungu yule aliyemwamini, anayewapa wafu uzima na kuviita viwepo vitu visivyokuwepo. 18Akitumaini wakati hapakuwa na sababu ya kutumaini, Ibrahimu aliamini, na hivyo akawa baba wa mataifa mengi, kama Mungu alivyokuwa amemwambia: “Hivyo ndivyo uzao wako utakavyokuwa mwingi.” 19Imani yake haikudhoofika alipoutazama mwili wake, uliokuwa kama umekufa kwa kuwa alikuwa na umri wa karibu miaka mia moja, wala alipofikiria tumbo la Sara lililokuwa limekufa. 20Hakuwa na shaka juu ya ahadi ya Mungu, wala hakusitasita kwa kutoamini. Badala yake imani yake ilipata nguvu, akampa Mungu utukufu, 21akiwa na hakika kamili kwamba Mungu ana uwezo wa kutimiza kile alichoahidi. 22Ndiyo sababu “lilihesabiwa kwake kuwa haki.”

23Maneno “lilihesabiwa kwake” hayakuandikwa kwa ajili ya Ibrahimu peke yake, 24bali kwa ajili yetu pia. Litahesabiwa kwetu sisi tunaomwamini Mungu aliyemfufua Yesu Bwana wetu kutoka kwa wafu. 25Yesu alitolewa afe kwa sababu ya makosa yetu, naye akafufuliwa ili sisi tupate kuhesabiwa haki.