Matendo 24

1Siku tano baadaye kuhani mkuu Anania alishuka pamoja na baadhi ya wazee na wakili mmoja aitwaye Tertulo, nao wakaeleza mashtaka yao dhidi ya Paulo mbele ya mkuu wa mkoa. 2Paulo alipoitwa, Tertulo alianza kutoa mashtaka, akasema, “Kwa sababu yako tunaishi katika amani kubwa, na mipango yako ya busara imerekebisha mambo mengi katika taifa hili. 3Mheshimiwa Feliki, tunayapokea mambo haya yote kwa kila namna na kila mahali, kwa shukrani za dhati. 4Lakini sitaki kukuchukulia muda mrefu, kwa hiyo nakuomba, kwa uungwana wako, utusikilize kwa ufupi. 5Tumegundua kwamba mtu huyu ni hatari kwa umma. Anachochea ghasia miongoni mwa Wayahudi katika kila sehemu ya dunia, naye ni kiongozi wa madhehebu ya Wanazareti. 6Hata alijaribu kulinajisi hekalu, nasi tukamkamata. 8Mhoji wewe mwenyewe, nawe utajua kutoka kwake habari zote za mambo tunayomshtaki.” 9Wayahudi waliokuja nao wakaunga mkono mashtaka, wakisema kwamba yote yalikuwa hivyo.

10Mkuu wa mkoa alimwashiria Paulo aseme, naye akajibu, “Najua kwamba umekuwa hakimu wa taifa hili kwa miaka mingi, kwa hiyo ninajitetea mbele yako kwa furaha. 11Ni siku kumi na mbili tu, si zaidi, tangu nilipopanda Yerusalemu kuabudu, kama unavyoweza kuthibitisha. 12Hawakuniona hekaluni nikibishana na mtu yeyote wala nikikusanya umati, wala katika masinagogi, wala popote mjini. 13Hawana ushahidi wa kukuletea juu ya mambo wanayonishtaki sasa. 14Lakini hili nakiri mbele yako: ninamtumikia Mungu wa wahenga wetu kama mfuasi wa ile Njia, ambayo wao wanaiita madhehebu. Ninaamini yote yanayokubaliana na sheria na yote yaliyoandikwa katika Manabii. 15Tumaini langu liko kwa Mungu, na watu hawa nao wanalitazamia: kwamba kutakuwa na ufufuo wa wenye haki na wa waovu pia. 16Ndiyo sababu mimi, kwa upande wangu, najibidiisha kuishi kila wakati na dhamiri safi mbele ya Mungu na mbele ya watu. 17Baada ya kukaa mbali kwa miaka kadhaa, nilikuja kuleta misaada kwa watu wa taifa langu na kutoa sadaka. 18Nilikuwa nikifanya hivyo waliponikuta hekaluni, nikiwa nimekwisha kutakaswa kwa desturi, bila umati karibu nami na bila fujo yoyote. 19Lakini walioniona ni Wayahudi fulani kutoka Asia. Hao ndio waliopaswa kufika mbele yako kunishtaki, kama wana lalamiko lolote dhidi yangu. 20La sivyo, watu hawa walioko hapa na waseme ni kosa gani walilonikuta nalo niliposimama mbele ya Baraza Kuu, 21isipokuwa lile neno moja nililolitamka kwa sauti kubwa nikiwa nimesimama kati yao: ‘Leo mnanihukumu kwa habari ya ufufuo wa wafu.’”

22Feliki alikuwa akijua mambo mengi kuhusu ile Njia, naye akaahirisha shauri hilo. Akawaambia, “Nitatoa uamuzi juu ya shauri lenu Lisia, kamanda wa jeshi, atakaposhuka.” 23Akamwagiza akida kwamba Paulo aendelee kulindwa, lakini apewe nafuu kiasi, na asimzuie yeyote wa watu wake kumhudumia.

24Siku chache baadaye Feliki alikuja pamoja na mkewe Drusila, mwanamke Myahudi. Akamwita Paulo, akamsikiliza akizungumza juu ya imani katika Kristo Yesu. 25Paulo alipokuwa akijadiliana naye kuhusu haki, kujizuia na hukumu inayokuja, Feliki alishtuka. Akamjibu, “Niache kwa sasa. Nitakuita tena nitakapopata wakati unaofaa.” 26Wakati huo huo alitumaini kwamba Paulo angempa fedha, kwa hiyo alikuwa akimwita mara nyingi na kuzungumza naye.

27Miaka miwili ilipotimia, Porkio Festo alichukua nafasi ya Feliki. Feliki alitaka kujipatia fadhila kwa Wayahudi, kwa hiyo akamwacha Paulo akiwa amefungwa minyororo.