Matendo 18

1Baada ya hayo Paulo aliondoka Athene, akaenda Korintho. 2Huko alimkuta Myahudi mmoja aitwaye Akila, mzaliwa wa Ponto, ambaye alikuwa amewasili karibuni kutoka Italia pamoja na mke wake Prisila, kwa kuwa Klaudio alikuwa ameamuru kila Myahudi aondoke Roma. Paulo alikwenda kuwaona, 3na kwa sababu yeye na wao walikuwa na ufundi mmoja, alikaa nyumbani kwao, akafanya kazi pamoja nao. Kazi yao ilikuwa kushona mahema. 4Kila Sabato alijadiliana nao katika sinagogi, akijaribu kuwavuta Wayahudi na Wagiriki pia.

5Sila na Timotheo walipofika kutoka Makedonia, Paulo alijitoa kikamilifu kwa kazi ya kuhubiri neno, akiwashuhudia Wayahudi kwamba Yesu ndiye Kristo. 6Lakini walimpinga na kumtukana. Basi akayakung’uta mavazi yake, akawaambia, “Damu yenu iko juu ya vichwa vyenu wenyewe. Mimi sina hatia. Tangu sasa nakwenda kwa watu wa mataifa.” 7Paulo aliwaacha, akahamia nyumbani kwa mtu mmoja aitwaye Titio Yusto, aliyemwabudu Mungu. Nyumba yake ilikuwa karibu kabisa na sinagogi. 8Krispo, kiongozi wa sinagogi, alimwamini Bwana, na vivyo hivyo watu wote wa nyumbani mwake. Wakorintho wengine wengi walisikia ujumbe, wakaamini, wakabatizwa. 9Usiku mmoja Bwana alimwambia Paulo katika maono, “Acha kuogopa. Endelea kuhubiri, wala usinyamaze. 10Mimi niko pamoja nawe. Hakuna mtu atakayekushambulia ili akudhuru, kwa sababu katika mji huu kuna watu wengi walio wangu.” 11Paulo alikaa huko kwa mwaka mmoja na nusu, akilifundisha neno la Mungu kati yao. 12Lakini wakati Galio alipokuwa mkuu wa jimbo la Akaya, Wayahudi waliungana dhidi ya Paulo, wakamleta mbele ya kiti cha hukumu. 13Wakamshtaki hivi: “Mtu huyu anawavuta watu wamwabudu Mungu kwa namna ambayo sheria hairuhusu.” 14Paulo alipokuwa karibu kusema, Galio aliwaambia Wayahudi, “Kama hili lingekuwa kosa fulani au uhalifu mzito, enyi Wayahudi, ningekuwa na sababu nzuri ya kusikiliza shauri lenu. 15Lakini haya ni mabishano juu ya mafundisho na vyeo na sheria yenu wenyewe. Yashughulikieni wenyewe. Mimi sitaketi kuhukumu mambo kama haya.” 16Kisha akaamuru wafukuzwe mbele ya kiti cha hukumu. 17Kisha wote walimkamata Sostene, kiongozi wa sinagogi, wakampiga mbele ya kiti cha hukumu. Lakini Galio hakujali lolote kati ya hayo.

18Paulo alikaa huko siku nyingi zaidi. Kisha akaagana na ndugu, akasafiri kwa meli kwenda Siria, na Prisila na Akila wakaenda pamoja naye. Huko Kenkrea alinyoa kichwa chake, kwa sababu alikuwa ameweka nadhiri. 19Walifika Efeso, ambako Paulo angewaacha Prisila na Akila. Yeye mwenyewe aliingia katika sinagogi, akajadiliana na Wayahudi. 20Walimsihi akae muda mrefu zaidi, lakini hakukubali. 21Alipokuwa akiwaaga, aliwaambia, “Nitarudi kwenu, Mungu akipenda,” kisha akaanza safari ya baharini kutoka Efeso. 22Alishuka pwani huko Kaisaria, akapanda kulisalimu kanisa, kisha akashuka Antiokia. 23Baada ya kukaa huko kwa muda, aliondoka tena, akapita katika nchi ya Galatia na Frigia mji kwa mji, akiwaimarisha wanafunzi wote. 24Myahudi mmoja aitwaye Apolo, mzaliwa wa Aleksandria, alifika Efeso. Alikuwa msemaji hodari, na aliweza kuyatumia Maandiko kwa nguvu. 25Alikuwa amefundishwa njia ya Bwana, na kwa bidii kubwa alinena na kufundisha kwa usahihi habari za Yesu, ingawa ubatizo pekee alioujua ulikuwa ule wa Yohana. 26Alianza kuhubiri bila hofu katika sinagogi. Prisila na Akila walimsikia huko, wakamkaribisha kwao, wakamfundisha njia ya Mungu kwa usahihi zaidi. 27Apolo alipanga kuvuka kwenda Akaya, na ndugu wakamtia moyo. Wakawaandikia wanafunzi wa huko barua, wakiwaomba wamkaribishe. Alipofika, aliwasaidia sana wale waliokuwa wamekuja kuamini kupitia neema, 28kwa maana alihojiana na Wayahudi kwa nguvu hadharani, akiwathibitishia kwamba walikosea, na kwa Maandiko akaonyesha kwamba Yesu ndiye Kristo.