Matendo 27

1Safari yetu ya kwenda Italia ilipokwisha kuamuliwa, walimweka Paulo pamoja na wafungwa wengine kadhaa chini ya ulinzi wa Yulio, akida wa kikosi cha Augusto. 2Tulipanda meli kutoka Adramitio iliyokuwa ikienda kutia nanga katika bandari za pwani ya Asia, tukaanza safari. Aristarko, Mmakedonia kutoka Thesalonike, alikuwa pamoja nasi. 3Siku iliyofuata tulifika Sidoni. Yulio alimjali Paulo, akamruhusu aende kwa rafiki zake ili wamhudumie. 4Tulipoondoka huko, tulisafiri upande wa Kipro uliokingwa na upepo, kwa sababu upepo ulikuwa kinyume nasi. 5Tukavuka bahari iliyo mbele ya Kilikia na Pamfilia, tukafika Mira katika Likia. 6Huko Mira akida aliikuta meli ya Aleksandria iliyokuwa ikienda Italia, akatuhamishia humo. 7Kwa siku nyingi tulisafiri polepole, na kwa shida tukafika karibu na Kinido. Kwa kuwa upepo haukuturuhusu kuendelea na njia yetu, tulisafiri upande wa Krete uliokingwa na upepo, tukipita Salmone. 8Tulisafiri kwa shida kando ya pwani, tukafika mahali paitwapo Bandari Nzuri, karibu na mji wa Lasea.

9Muda mwingi ulikuwa umepita, na sasa kusafiri kulikuwa hatari, kwa kuwa hata ule Mfungo ulikuwa umekwisha kupita. Kwa hiyo Paulo akawashauri, 10akasema, “Enyi wanaume, naona kwamba safari hii inaelekea kwenye madhara na hasara kubwa, si kwa mzigo na meli tu, bali kwa maisha yetu pia.” 11Lakini akida aliwaamini zaidi nahodha na mwenye meli kuliko maneno ya Paulo. 12Bandari ile haikufaa kukaa majira ya baridi, kwa hiyo wengi wao walitaka kuendelea na safari, wakitumaini kwa namna fulani kufika Foinike ili wakae huko majira ya baridi. Foinike ni bandari ya Krete inayoelekea kusini-magharibi na kaskazini-magharibi.

13Upepo mwanana ulipoanza kuvuma kutoka kusini, walidhani kwamba mpango wao ungefanikiwa. Basi waling’oa nanga, wakasafiri kando ya Krete, karibu na pwani. 14Lakini muda mfupi baadaye upepo wa dhoruba uitwao Eurakilo, upepo wa kaskazini-mashariki, ukavuma kwa nguvu kutoka Krete. 15Meli ilinaswa na dhoruba hiyo, nayo haikuweza kugeuzwa kuukabili upepo, kwa hiyo tuliiachilia, tukasukumwa nao. 16Tulipita upande wa kisiwa kidogo kiitwacho Kauda uliokingwa na upepo, na huko, kwa juhudi kubwa, tukafaulu kuidhibiti mashua ya meli. 17Baada ya kuipandisha melini, mabaharia walitumia kamba kuiimarisha meli, wakizipitisha kuzunguka kiunzi chake. Waliogopa kusukumwa mpaka kwenye mafungu ya mchanga ya Sirti, kwa hiyo walishusha nanga ya kuburuta, nao wakachukuliwa na upepo hivyo hivyo. 18Dhoruba ilitupiga kwa ukali sana hata siku iliyofuata wakaanza kutupa mzigo baharini. 19Siku ya tatu walichukua vifaa vya akiba vya meli, wakavitupa baharini kwa mikono yao wenyewe. 20Siku baada ya siku hapakuonekana jua wala nyota, na dhoruba iliendelea kutuandama kwa nguvu nyingi. Mwishowe tumaini lote kwamba tungesalimika lilikuwa likitutoka.

21Hakuna aliyekuwa amekula kwa muda mrefu. Ndipo Paulo akasimama katikati yao, akasema, “Enyi wanaume, mlipaswa kunisikiliza na kubaki Krete badala ya kuanza safari. Mngeepuka madhara haya yote na hasara hii. 22Hata hivyo, sasa nawasihi mjipe moyo. Hakuna hata mmoja wenu atakayepoteza maisha; ni meli tu itakayopotea. 23Kwa maana usiku huu malaika wa Mungu, ambaye mimi ni wake na ambaye ninamwabudu, alikuja akasimama karibu nami. 24Akaniambia, ‘Paulo, usiogope. Ni lazima usimame mbele ya Kaisari. Na tazama, Mungu amekupa watu wote wanaosafiri pamoja nawe.’ 25Kwa hiyo jipeni moyo, enyi wanaume! Namwamini Mungu: itatokea sawasawa na jinsi nilivyoambiwa. 26Lakini ni lazima tutupwe pwani ya kisiwa fulani.”

27Ilikuwa usiku wa kumi na nne, nasi tulikuwa tukipelekwa huku na huko katika bahari ya Adria. Karibu na usiku wa manane mabaharia walianza kushuku kwamba walikuwa wanakaribia nchi kavu. 28Walishusha kamba ya kupimia kina, wakakuta kina cha mita 36. Walipoendelea mbele kidogo walipima tena, wakakuta mita 27. 29Waliogopa kwamba huenda tungegonga pwani yenye miamba mahali fulani, kwa hiyo walitupa nanga nne kutoka sehemu ya nyuma ya meli, wakaomba kupambazuke. 30Wakati huo mabaharia walikuwa wakijaribu kuikimbia meli. Walikuwa wameishusha mashua baharini kwa kisingizio kwamba walitaka kushusha nanga kutoka sehemu ya mbele ya meli. 31Lakini Paulo akamwambia akida na askari, “Watu hawa wasipobaki melini, hakuna njia ya ninyi kuokolewa.” 32Basi askari wakazikata kamba za mashua, wakaiacha iende.

33Walipokuwa wakingoja kupambazuke, Paulo aliendelea kuwasihi wote wale chakula kidogo. Akasema, “Leo ni siku ya kumi na nne mmekuwa mkingoja kwa wasiwasi bila kula, bila kutia chochote kinywani. 34Kwa hiyo nawasihi mle chakula kidogo. Ni kwa ajili ya kuendelea kuishi kwenu, kwa maana hakuna hata unywele mmoja wa kichwa cha yeyote kati yenu utakaopotea.” 35Alipokwisha kusema hayo, Paulo alichukua mkate, akamshukuru Mungu kwa ajili yake huku wote wakimtazama. Kisha akaumega, akaanza kula. 36Wote wakafarijika kwa hayo, nao pia wakala chakula kidogo. 37Tulikuwa watu mia mbili sabini na sita melini kwa jumla. 38Kila mtu alipokwisha kula na kushiba, waliitupa ngano baharini ili kuipunguzia meli uzito.

39Kulipopambazuka hawakuitambua nchi ile. Lakini waliona ghuba ndogo yenye ufuo wa mchanga, wakaamua kuiendesha meli mpaka ufuoni kama ingewezekana. 40Walikata nanga, wakaziacha ziende baharini, na wakati huo huo wakafungua kamba zilizofunga makasia ya kuongozea meli. Kisha wakatweka tanga dogo la mbele ili kunasa upepo, wakaielekeza meli ufuoni. 41Lakini walifika mahali ambapo bahari mbili zilikutana, wakaikwamisha meli. Sehemu ya mbele ikazama mchangani, ikakwama bila kuweza kusogea, na sehemu ya nyuma ikaanza kuvunjika kwa nguvu ya mawimbi. 42Askari walikusudia kuwaua wafungwa, ili hakuna hata mmoja wao atakayeweza kuogelea na kutoroka. 43Lakini akida alikuwa ameazimia kumwokoa Paulo, kwa hiyo akawazuia wasitekeleze kusudi lao. Akawaamuru wote wanaoweza kuogelea wajitupe baharini kwanza na kuelekea pwani, 44na wengine wawafuate, baadhi juu ya mbao na wengine juu ya mabaki ya meli. Na hivyo ndivyo wote walivyofika nchi kavu salama.