Matendo 25

1Festo alikuwa amekaa katika jimbo lake siku tatu tu, kisha akaondoka Kaisaria, akapanda Yerusalemu. 2Wakuu wa makuhani na Wayahudi mashuhuri wakaeleza mashtaka yao dhidi ya Paulo mbele yake, wakaendelea kumsihi. 3Walimwomba awafanyie fadhila itakayomdhuru Paulo: amwite aje Yerusalemu. Walikusudia kumvizia na kumwua njiani. 4Festo alijibu kwamba Paulo alikuwa akishikiliwa Kaisaria, na kwamba yeye mwenyewe angerudi huko hivi karibuni. 5“Kwa hiyo viongozi wenu na washuke pamoja nami,” akasema, “na kama kuna jambo lolote lisilofaa kwa mtu huyu, wamshtaki huko.”

6Alikaa nao siku zisizozidi nane au kumi, kisha akashuka Kaisaria. Siku iliyofuata aliketi katika kiti cha hukumu, akaamuru Paulo aletwe. 7Paulo alipofika tu, Wayahudi waliokuwa wameshuka kutoka Yerusalemu wakamzunguka, wakamtwika mashtaka mengi mazito ambayo hawakuweza kuthibitisha hata moja. 8Paulo akajitetea hivi: “Sijafanya kosa lolote dhidi ya sheria ya Wayahudi, wala dhidi ya hekalu, wala dhidi ya Kaisari.” 9Lakini Festo alikuwa akitafuta kujipatia fadhila kwa Wayahudi. Akamgeukia Paulo, akasema, “Je, uko tayari kupanda Yerusalemu, mambo haya yahukumiwe huko, mimi nikiwa hakimu?” 10Paulo akasema, “Mahakama ninayosimama mbele yake ni ya Kaisari, na hapa ndipo shauri langu linapostahili kusikilizwa. Sijawakosea Wayahudi kwa jambo lolote, nawe unalijua hilo vizuri kabisa. 11Ikiwa nina hatia na nimefanya jambo linalostahili kifo, sikatai kufa. Lakini ikiwa hakuna ukweli katika mashtaka ya watu hawa, hakuna mtu anayeweza kunikabidhi kwao ili kuwafurahisha. Ninakata rufaa kwa Kaisari!” 12Kisha Festo alijadiliana na washauri wake, akajibu, “Umekata rufaa kwa Kaisari. Kwa Kaisari utakwenda!”

13Baada ya siku kadhaa kupita, Mfalme Agripa na Bernike walikuja Kaisaria kumtembelea Festo na kumkaribisha. 14Ziara yao ilichukua siku nyingi, na wakati huo Festo alimweleza mfalme habari za Paulo. Akasema, “Yuko mtu mmoja ambaye Feliki alimwacha kizuizini. 15Nilipokwenda Yerusalemu, wakuu wa makuhani na wazee wa Wayahudi walileta mashtaka juu yake, wakaniomba nimhukumu. 16Niliwaambia kwamba si desturi ya Kirumi kumtoa mtu yeyote ili kuwafurahisha watu kabla mshtakiwa hajakutana ana kwa ana na washtaki wake na kupewa nafasi ya kujibu shtaka. 17Kwa hiyo walipofika hapa pamoja nami, sikupoteza muda. Siku iliyofuata kabisa niliketi katika kiti cha hukumu, nikaamuru mtu huyo aletwe. 18Washtaki wake walisimama, lakini mashtaka waliyoleta hayakuwa ya uhalifu niliokuwa nikiutarajia. 19Walichokuwa nacho dhidi yake ni maswali fulani kuhusu dini yao wenyewe, na kuhusu mtu mmoja aitwaye Yesu, aliyekufa, ambaye Paulo alidai kwamba yu hai. 20Sikujua jinsi ya kuchunguza maswali ya namna hii, kwa hiyo nilimwuliza kama angependa kwenda Yerusalemu shauri hilo likahukumiwe huko. 21Lakini Paulo alikata rufaa ili ashikiliwe mpaka mfalme mkuu atoe uamuzi, kwa hiyo niliamuru alindwe kizuizini mpaka nitakapoweza kumpeleka kwa Kaisari.” 22Agripa akamwambia Festo, “Nimekuwa nikitamani kumsikia mtu huyo mimi mwenyewe.” “Utamsikia kesho,” Festo akajibu.

23Kwa hiyo siku iliyofuata Agripa na Bernike walikuja kwa fahari kubwa. Wakaingia katika ukumbi wa kusikilizia mashauri pamoja na makamanda na watu mashuhuri wa mji, na Festo akaamuru Paulo aletwe. 24Kisha Festo akasema, “Mfalme Agripa, na ninyi nyote mlio hapa pamoja nasi, mtazameni mtu huyu. Taifa zima la Wayahudi limenijia kuhusu yeye, huko Yerusalemu na hapa pia, wakipiga kelele kwamba hastahili kuendelea kuishi. 25Mimi kwa upande wangu niliona kwamba hajafanya uhalifu wowote unaostahili kifo. Na kwa kuwa yeye mwenyewe amekata rufaa kwa mfalme mkuu, niliamua kumpeleka. 26Hata hivyo sina jambo la uhakika la kumwandikia bwana wangu kumhusu. Ndiyo sababu nimemleta hapa mbele yenu nyote, na hasa mbele yako, Mfalme Agripa, ili baada ya kuhojiwa, nipate kitu cha kuandika. 27Kwa maana kumpeleka mfungwa bila kueleza wazi mashtaka yake kunaonekana kwangu kuwa ni upuuzi.”