Matendo 21

1Tulipokwisha kuachana nao, ingawa ilikuwa vigumu, tuliingia baharini, tukasafiri moja kwa moja mpaka Kosi. Kesho yake tukafika Rodo, na kutoka huko tukaenda Patara. 2Huko tulipata meli iliyokuwa ikivuka bahari kwenda Foinike, tukaipanda, tukaondoka. 3Tulikiona kisiwa cha Kipro, tukakipita kikiwa upande wetu wa kushoto, tukaendelea kusafiri kuelekea Siria. Tukatia nanga Tiro, kwa sababu meli ilipaswa kushusha shehena yake huko. 4Tuliwatafuta wanafunzi wa huko, tukakaa nao siku saba. Wakisema kwa uongozi wa Roho, walimwambia Paulo tena na tena asipande kwenda Yerusalemu. 5Siku zetu huko zilipokwisha, tuliondoka tukaendelea na safari yetu. Wote, pamoja na wake zao na watoto, walitusindikiza mpaka nje ya mji. Tukapiga magoti pale ufuoni, tukaomba, 6kisha tukaagana. Tukapanda melini, nao wakarudi nyumbani kwao.

7Tulimaliza safari yetu ya baharini kutoka Tiro tukafika Ptolemai. Huko tukawasalimu ndugu, tukakaa nao siku moja. 8Kesho yake tuliondoka, tukafika Kaisaria. Tukaenda nyumbani kwa Filipo mwinjilisti, aliyekuwa mmoja wa wale saba, tukakaa kwake kama wageni wake. 9Filipo alikuwa na binti wanne ambao hawakuwa wameolewa, nao walikuwa wakitabiri. 10Tulipokuwa tumekaa huko siku kadhaa, nabii mmoja aitwaye Agabo alishuka kutoka Uyahudi. 11Alikuja kwetu, akauchukua mshipi wa Paulo, akajifunga nao miguu na mikono yake mwenyewe. Akasema, “Hivi ndivyo asemavyo Roho Mtakatifu: ‘Kama hivi Wayahudi wa Yerusalemu watamfunga mtu mwenye mshipi huu, na kumkabidhi mikononi mwa watu wa mataifa.’” 12Tuliposikia maneno hayo, sisi wenyewe pamoja na wenyeji wa mahali pale tulimsihi Paulo tena na tena asipande kwenda Yerusalemu. 13Paulo akajibu, “Mbona mnalia na kunivunja moyo hivi? Mimi niko tayari kufungwa huko Yerusalemu, na zaidi ya hayo, hata kufa huko, kwa ajili ya jina la Bwana Yesu.” 14Kwa kuwa hakukubali kushawishiwa, hatukusema zaidi isipokuwa, “Mapenzi ya Bwana yafanyike.”

15Baada ya siku hizo tuliandaa mizigo yetu, tukaanza safari ya kupanda kwenda Yerusalemu. 16Baadhi ya wanafunzi wa Kaisaria walifuatana nasi. Walitupeleka nyumbani kwa Mnasoni, mtu wa Kipro aliyekuwa mwanafunzi tangu siku za mwanzo, ili tukae kwake.

17Tulipofika Yerusalemu, ndugu walitukaribisha kwa furaha. 18Kesho yake Paulo alikwenda pamoja nasi kwa Yakobo, na wazee wote walikuja. 19Baada ya kuwasalimu, Paulo aliwaeleza kwa kina, jambo moja baada ya jingine, yote ambayo Mungu alikuwa ametenda kati ya watu wa mataifa kupitia huduma aliyokuwa amepewa. 20Waliposikia hayo walimtukuza Mungu, kisha wakamwambia Paulo, “Ndugu, tazama makumi ya maelfu ya waumini walioko kati ya Wayahudi, na kila mmoja wao ana juhudi kubwa kwa ajili ya sheria. 21Lakini wamesikia habari kwamba unawafundisha Wayahudi waliotawanyika kati ya watu wa mataifa wamwache Musa, na kwamba unawaambia wasiwatahiri tena watoto wao wala wasizifuate desturi. 22Basi, tufanye nini? Hakuna shaka kwamba watasikia kwamba umefika. 23Kwa hiyo, haya ndiyo tunayokushauri. Kuna wanaume wanne kati yetu ambao wamejiwekea nadhiri. 24Wachukue watu hawa, ujitakase pamoja nao, na uwalipie gharama za sadaka zao ili waweze kunyoa vichwa vyao. Ndipo kila mtu ataona kwamba habari walizosikia juu yako hazina ukweli wowote, na kwamba wewe mwenyewe unaishi kwa kufuata sheria na kuishika. 25Kuhusu watu wa mataifa walioamini, tumekwisha kuwaandikia yale tuliyoamua: wajiepushe na nyama iliyotolewa kwa sanamu, na damu, na nyama ya wanyama walionyongwa, na uasherati.” 26Basi Paulo aliwachukua wale wanaume. Kesho yake alijitakasa pamoja nao, akaingia hekaluni, akatangaza siku ambayo siku zao za utakaso zingekwisha na sadaka ingetolewa kwa ajili ya kila mmoja wao.

27Siku saba zilipokuwa karibu kwisha, baadhi ya Wayahudi kutoka Asia walimwona Paulo hekaluni. Wakauvuruga umati wote, wakamkamata, 28wakipiga kelele, “Enyi watu wa Israeli, saidieni! Huyu ndiye mtu ambaye kila aendako anawafundisha watu wote mambo yanayopinga taifa letu, sheria na mahali hapa. Na sasa ameleta hata Wagiriki ndani ya hekalu, akapanajisi mahali hapa patakatifu.” 29Walikuwa wamemwona Paulo mjini muda mfupi kabla pamoja na Trofimo, mtu wa Efeso, wakadhani kwamba Paulo alikuwa amemwingiza hekaluni. 30Mji mzima ukataharuki, na watu wakakimbia kutoka pande zote. Wakamkamata Paulo, wakamkokota nje ya hekalu, na mara malango yakafungwa. 31Walipokuwa wakitaka kumwua, habari zilimfikia kamanda wa kikosi cha askari kwamba Yerusalemu wote ulikuwa katika ghasia. 32Mara moja akachukua askari na maakida, akashuka mbio kuwaendea watu wale. Walipomwona kamanda na askari, wakaacha kumpiga Paulo. 33Kamanda alimkaribia Paulo, akamtia nguvuni, akaamuru afungwe kwa minyororo miwili. Kisha akaanza kuuliza mtu huyo ni nani na alikuwa amefanya nini. 34Lakini katika umati watu walipiga kelele, wengine hili na wengine lile. Kwa sababu ya makelele hakuweza kujua ukweli wa mambo, kwa hiyo akaamuru Paulo apelekwe ndani ya ngome. 35Walipofika kwenye ngazi, fujo ya umati ilikuwa kubwa hata askari wakalazimika kumbeba Paulo. 36Umati wote wa watu ulikuwa ukiwafuata, ukipiga kelele, “Mwondoe!”

37Walipokuwa karibu kumwingiza ndani ya ngome, Paulo alimwambia kamanda, “Je, naweza kusema nawe neno moja?” Kamanda akasema, “Unajua Kigiriki? 38Kumbe wewe si yule Mmisri aliyeanzisha uasi siku za nyuma, akawaongoza wanaume elfu nne wa kundi la Wauaji nyikani?” 39Paulo akajibu, “Mimi ni Myahudi, mtu wa Tarso huko Kilikia, raia wa mji wenye sifa. Nakuomba, niruhusu niseme na watu.” 40Kamanda alimruhusu, naye Paulo, akiwa amesimama kwenye ngazi, akawainulia watu mkono. Wote waliponyamaza kimya, akasema nao kwa lugha ya Kiebrania. Akasema: