Matendo 3

1Petro na Yohana walikuwa wakienda hekaluni kwa ajili ya maombi ya saa tisa mchana. 2Watu fulani walikuwa wakimbeba huko mtu mmoja aliyekuwa kiwete tangu kuzaliwa. Kila siku walimweka karibu na lango la hekalu lililoitwa Lango Zuri, ili awaombe sadaka watu waliokuwa wakiingia. 3Alipowaona Petro na Yohana karibu kuingia hekaluni, akawaomba sadaka. 4Petro, pamoja na Yohana, alimkazia macho, akasema, “Tutazame.” 5Akaendelea kuwatazama, akitumaini kwamba wangempa kitu. 6Lakini Petro akasema, “Sina fedha wala dhahabu, lakini nitakupa kile nilicho nacho. Kwa jina la Yesu Kristo wa Nazareti, tembea!” 7Petro akamshika mkono wa kulia, akamwinua. Mara moja miguu na vifundo vya miguu ya mtu yule vikapata nguvu; 8akaruka juu, akasimama, akaanza kutembea. Akaingia pamoja nao hekaluni, akitembea, akirukaruka na kumsifu Mungu. 9Watu wote walimwona akitembea huku akimsifu Mungu. 10Wakamtambua kuwa ndiye yule mtu aliyekuwa akiketi akiomba sadaka kwenye Lango Zuri la hekalu, nao wakajaa mshangao na mastaajabu kwa yale yaliyompata.

11Yule mtu alipokuwa bado amewashikilia Petro na Yohana, watu wote wakawakimbilia mahali palipoitwa Ukumbi wa Sulemani, wakiwa wameshangaa kabisa. 12Petro alipoona hivyo, akawaambia watu, “Enyi Waisraeli, kwa nini mnashangazwa na jambo hili? Kwa nini mnatutazama hivyo, kana kwamba ni kwa nguvu zetu wenyewe au kwa uchaji wetu wa Mungu tumemfanya mtu huyu atembee? 13Mungu wa Ibrahimu, wa Isaka na wa Yakobo, Mungu wa mababu zetu, amemtukuza mtumishi wake Yesu. Ninyi mlimkabidhi, mkamkana mbele ya Pilato, hata Pilato alipokuwa ameamua kwamba aachiliwe. 14Ninyi mlimkana yule Mtakatifu na Mwenye Haki, mkaomba mfanyiwe hisani ya kuachiliwa muuaji, 15mkamwua Mwanzilishi wa uzima. Mungu alimfufua kutoka kwa wafu; sisi ni mashahidi wa jambo hilo. 16Mtu huyu mnayemwona na kumjua amepewa nguvu na jina la Yesu, kwa njia ya imani katika jina hilo. Imani inayokuja kupitia yeye imempa afya kamili hapa mbele yenu nyote.

17Basi sasa, ndugu, najua kwamba hamkuelewa mlichokuwa mkifanya, wala wakuu wenu hawakuelewa. 18Lakini kwa matukio haya Mungu ametimiza yale aliyosema tangu zamani kupitia manabii wote, kwamba Kristo wake atateseka. 19Basi tubuni na kugeuka, ili dhambi zenu zifutwe kabisa, 20ili nyakati za nafuu zije kutoka mbele za Bwana, naye awatumie Yesu, Kristo aliyemchagua kwa ajili yenu tangu mwanzo. 21Yesu anapaswa kupokewa mbinguni na kukaa huko mpaka wakati ambapo kila kitu kitarejeshwa upya, kama Mungu alivyosema zamani kwa vinywa vya manabii wake watakatifu. 22Musa mwenyewe alisema, ‘Bwana Mungu wenu atawainulia nabii kama mimi kutoka miongoni mwa watu wenu wenyewe. Mtamsikiliza katika kila jambo atakalowaambia. 23Kila mtu atakayekataa kumsikiliza nabii huyo ataangamizwa na kuondolewa kutoka miongoni mwa watu.’ 24Na kila nabii aliyenena, tangu Samweli na wale waliomfuata, ametangaza pia habari za siku hizi. 25Ninyi ni wana wa manabii na wa agano ambalo Mungu alifanya na mababu zenu, alipomwambia Ibrahimu, ‘Koo zote za dunia zitabarikiwa kupitia uzao wako.’ 26Ni kwenu kwanza Mungu alimwinua mtumishi wake na kumtuma awabariki, kwa kumgeuza kila mmoja wenu aache matendo yake maovu.”