Yohana 21

1Baadaye Yesu alijidhihirisha tena kwa wanafunzi, kando ya Bahari ya Tiberia. Ilitokea hivi. 2Simoni Petro alikuwa pamoja na Tomaso, aitwaye Didimo (maana yake Pacha), Nathanaeli wa Kana ya Galilaya, wana wa Zebedayo, na wanafunzi wake wengine wawili. 3Simoni Petro aliwaambia, “Ninakwenda kuvua samaki.” Wakamjibu, “Nasi tunakuja pamoja nawe.” Walitoka, wakapanda mashua, lakini usiku ule wote hawakuvua kitu.

4Kulipokuwa kunapambazuka, Yesu alisimama ufuoni, ingawa wanafunzi hawakutambua kwamba ni Yesu. 5Basi Yesu aliwaita kwa sauti, “Vijana, hamna samaki wa kula, sivyo?” Wakamjibu, “Hapana.” 6Akawaambia, “Tupeni wavu upande wa kulia wa mashua, nanyi mtapata samaki.” Basi wakautupa, na sasa hawakuweza kuuvuta kwa sababu samaki walikuwa wengi mno. 7Ndipo yule mwanafunzi ambaye Yesu alimpenda akamwambia Petro, “Ni Bwana!” Simoni Petro aliposikia kwamba ni Bwana, alijifunga vazi lake la nje, kwa kuwa alikuwa amelivua ili afanye kazi, akajitupa baharini. 8Wanafunzi wengine walikuja kwa mashua, wakiuvuta wavu uliojaa samaki. Hawakuwa mbali na nchi kavu, ila kama mita 90 hivi.

9Walipofika nchi kavu, waliona moto wa makaa tayari unawaka, na samaki juu yake, na mkate. 10Yesu akawaambia, “Leteni baadhi ya samaki mliowavua sasa hivi.” 11Basi Simoni Petro alipanda mashuani, akauvuta wavu ufuoni, umejaa samaki wakubwa, 153. Ingawa walikuwa wengi hivyo, wavu haukuchanika. 12Yesu akawaambia, “Njooni mle kifungua kinywa.” Hakuna hata mmoja wa wanafunzi aliyethubutu kumwuliza, “Wewe ni nani?” Walijua kwamba ni Bwana. 13Yesu alikuja, akauchukua mkate, akawapa, na samaki vivyo hivyo. 14Hii ilikuwa sasa mara ya tatu Yesu kudhihirishwa kwa wanafunzi tangu alipofufuliwa kutoka kwa wafu.

15Walipokwisha kufungua kinywa, Yesu alimwambia Simoni Petro, “Simoni, mwana wa Yohana, unanipenda kuliko hawa?” Petro akamwambia, “Ndiyo, Bwana, wewe unajua kwamba nakupenda.” Yesu akamwambia, “Lisha wanakondoo wangu.” 16Akamwuliza mara ya pili, “Simoni, mwana wa Yohana, unanipenda?” Petro akamwambia, “Ndiyo, Bwana, wewe unajua kwamba nakupenda.” Yesu akamwambia, “Chunga kondoo wangu.” 17Akamwuliza mara ya tatu, “Simoni, mwana wa Yohana, unanipenda?” Petro aliumia moyoni kwa sababu Yesu alimwuliza mara ya tatu, “Unanipenda?” Petro akamjibu, “Bwana, wewe unajua mambo yote; unajua kwamba nakupenda.” Yesu akamwambia, “Lisha kondoo wangu. 18Kweli kweli nakuambia, ulipokuwa kijana ulifunga mshipi wako mwenyewe na kwenda popote ulipotaka. Lakini ukisha kuzeeka, utanyosha mikono yako, kisha mtu mwingine atakufunga mshipi na kukupeleka mahali usipotaka kwenda.” 19Alisema hivi kuonyesha ni kwa kifo cha namna gani Petro atamtukuza Mungu. Baada ya kusema hivyo, akamwambia, “Nifuate.”

20Petro aligeuka, akamwona yule mwanafunzi ambaye Yesu alimpenda akiwafuata, yule yule ambaye wakati wa chakula cha jioni alikuwa ameegemea kifuani pa Yesu na kuuliza, “Bwana, ni nani atakayekusaliti?” 21Petro alipomwona, akamwambia Yesu, “Bwana, na huyu je?” 22Yesu akamwambia, “Kama ningetaka adumu hadi nitakapokuja, hilo linakuhusu nini? Kwa upande wako, nifuate!” 23Basi habari hii ilienea kati ya ndugu kwamba mwanafunzi huyo hatakufa. Lakini Yesu hakuwa amemwambia Petro kwamba mwanafunzi huyo hatakufa; alikuwa amesema, “Kama ningetaka adumu hadi nitakapokuja, hilo linakuhusu nini?” 24Mwanafunzi huyu ndiye anayeshuhudia kuhusu mambo haya, na ndiye aliyeyaandika. Tunajua kwamba ushuhuda wake ni wa kweli. 25Yesu alifanya pia mambo mengine mengi. Kama kila moja lingeandikwa, nadhani ulimwengu wote usingekuwa na nafasi ya kutosha kwa vitabu vyote ambavyo vingeandikwa.