Yohana 2

1Siku ya tatu kulifanyika harusi huko Kana ya Galilaya, na mama yake Yesu alikuwa huko. 2Yesu pia alikuwa amealikwa kwenye harusi hiyo, pamoja na wanafunzi wake. 3Divai ilipokwisha, mama yake Yesu alimwambia, “Hawana divai tena.” 4Yesu akamwambia, “Mama, jambo hilo linatuhusu nini mimi na wewe? Saa yangu bado haijafika.” 5Mama yake akawaambia watumishi, “Fanyeni lolote atakalowaambia.” 6Hapo palikuwa na mitungi sita ya mawe ya maji, iliyotumiwa kwa ajili ya kunawa kwa desturi ya Kiyahudi; kila mmoja ulichukua kama lita 80 hadi 120. 7Yesu akawaambia, “Ijazeni mitungi maji.” Wakaijaza mpaka juu. 8Kisha akawaambia, “Sasa choteni kidogo mkampelekee msimamizi wa karamu.” Wakafanya hivyo. 9Msimamizi wa karamu aliyaonja maji yaliyokuwa yamegeuka divai. Hakujua ilikotoka, ingawa watumishi waliochota maji walijua. Akamwita bwana harusi 10akamwambia, “Kila mwenye karamu huandaa divai nzuri kwanza, kisha divai duni wageni wakishalewa. Lakini wewe umeiweka divai nzuri mpaka sasa.” 11Yesu alifanya hivi huko Kana ya Galilaya kama ishara ya kwanza. Kwa hiyo aliudhihirisha utukufu wake, na wanafunzi wake wakamwamini.

12Baada ya hayo alishuka Kapernaumu pamoja na mama yake, ndugu zake na wanafunzi wake. Hawakukaa huko siku nyingi.

13Sikukuu ya Kiyahudi ya Pasaka ilikuwa imekaribia, na Yesu akapanda kwenda Yerusalemu. 14Katika nyua za hekalu aliwakuta watu wakiuza ng’ombe, kondoo na njiwa, na wabadilishaji fedha wameketi hapo. 15Akatengeneza mjeledi wa kamba, akawafukuza wote kutoka nyua za hekalu, kondoo na ng’ombe pia. Akazimwaga sarafu za wabadilishaji fedha na kuzipindua meza zao. 16Akawaambia wauza njiwa, “Ondoeni vitu hivi hapa! Msiifanye nyumba ya Baba yangu kuwa nyumba ya biashara.” 17Wanafunzi wake wakakumbuka kwamba imeandikwa: “Ari kwa ajili ya nyumba yako itaniteketeza.” 18Basi viongozi wa Wayahudi wakamwambia, “Unatuonyesha ishara gani kuthibitisha kwamba una mamlaka ya kufanya mambo haya?” 19Yesu akawajibu, “Bomoeni hekalu hili, nami nitalisimamisha tena katika siku tatu.” 20Viongozi wa Wayahudi wakasema, “Hekalu hili limekuwa likijengwa kwa miaka arobaini na sita, na wewe utalisimamisha katika siku tatu?” 21Lakini hekalu alilomaanisha lilikuwa mwili wake mwenyewe. 22Baadaye, alipokuwa amefufuliwa kutoka kwa wafu, wanafunzi wake wakakumbuka kwamba alikuwa amesema hivi, nao wakaliamini Andiko na maneno aliyokuwa amesema Yesu.

23Wakati wa sikukuu ya Pasaka, alipokuwa Yerusalemu, watu wengi walianza kuliamini jina lake walipoona ishara alizokuwa akifanya. 24Lakini Yesu, kwa upande wake, hakuwaaminia nafsi yake, kwa sababu aliwajua watu wote. 25Hakuhitaji mtu yeyote amweleze habari za watu, kwa maana yeye mwenyewe alijua yaliyomo ndani ya mtu.