Yohana 19

1Kisha Pilato alimchukua Yesu, akaamuru apigwe mijeledi. 2Askari walisuka taji ya miiba, wakaiweka juu ya kichwa chake, wakamvika vazi la zambarau. 3Wakamjia tena na tena, wakisema, “Salamu, ee Mfalme wa Wayahudi!” wakimpiga makofi usoni. 4Pilato alitoka tena nje, akawaambia, “Tazameni, ninamleta nje kwenu, ili mjue kwamba sioni sababu yoyote ya kumshtaki.” 5Basi Yesu alikuja nje, bado amevaa taji ya miiba na vazi la zambarau. Pilato akawaambia, “Tazameni, mtu huyu hapa!” 6Wakuu wa makuhani na walinzi wa hekalu walipomwona, walipiga kelele, “Msulubishe! Msulubishe!” Pilato akawaambia, “Mchukueni ninyi wenyewe, mkamsulubishe. Mimi sioni sababu yoyote ya kumshtaki.” 7Viongozi wa Wayahudi walijibu, “Tuna sheria, na kwa sheria hiyo lazima afe, kwa sababu amejifanya Mwana wa Mungu.”

8Pilato aliposikia maneno hayo, aliogopa hata zaidi. 9Akarudi ndani ya ikulu ya mkuu wa mkoa, akamwuliza Yesu, “Unatoka wapi wewe?” Lakini Yesu hakumjibu chochote. 10Basi Pilato akamwambia, “Unakataa kusema nami?” Hujui kwamba nina mamlaka ya kukuachilia huru, na mamlaka ya kukusulubisha? 11Yesu akajibu, “Usingekuwa na mamlaka yoyote juu yangu kama usingepewa kutoka juu. Ndiyo sababu yule aliyenikabidhi kwako anabeba dhambi kubwa zaidi.” 12Tangu wakati huo Pilato alijaribu kumwachilia huru, lakini viongozi wa Wayahudi wakapiga kelele, “Ukimwacha mtu huyu aende, wewe si rafiki wa Kaisari. Yeyote anayejidai kuwa mfalme anajiweka kinyume cha Kaisari.”

13Pilato aliposikia maneno hayo, alimleta Yesu nje, akaketi katika kiti cha hukumu mahali panapojulikana kama Sakafu ya Mawe, kwa Kiebrania Gabatha. 14Ilikuwa Siku ya Maandalio ya Pasaka, yapata saa sita mchana. Pilato akawaambia viongozi wa Wayahudi, “Tazameni, Mfalme wenu huyu hapa!” 15Wao wakajibu kwa kelele, “Mwondoe! Mwondoe! Msulubishe!” Pilato akawauliza, “Je, nimsulubishe Mfalme wenu?” Wakuu wa makuhani wakajibu, “Mfalme wetu si mwingine ila Kaisari.” 16Ndipo Pilato alimkabidhi kwao ili asulubiwe. Basi wakampokea Yesu mikononi mwao. 17Akiubeba msalaba mwenyewe, alitoka kwenda mahali panapoitwa Mahali pa Fuvu (kwa Kiebrania, Golgotha). 18Huko walimsulubisha pamoja na wengine wawili, mmoja kila upande, na Yesu katikati. 19Pilato aliandika pia tangazo, akaagiza liwekwe juu ya msalaba. Maneno yake yalikuwa: “Yesu wa Nazareti, Mfalme wa Wayahudi.” 20Wayahudi wengi wa Yerusalemu walilisoma tangazo hilo, kwa kuwa mahali Yesu aliposulubiwa palikuwa karibu na mji. Tangazo hilo lilikuwa limeandikwa kwa Kiebrania, Kilatini na Kigiriki. 21Wakuu wa makuhani wa Wayahudi walipinga. “Usiandike, ‘Mfalme wa Wayahudi,’” wakamwambia Pilato. “Andika kwamba mtu huyu alisema, ‘Mimi ni Mfalme wa Wayahudi.’” 22Pilato alijibu, “Nilichoandika, nimekiandika.” 23Askari walipokwisha kumsulubisha Yesu, walichukua nguo zake, wakazigawa mafungu manne, kila askari fungu lake. Wakachukua pia kanzu yake. Kanzu hiyo haikuwa na mshono; ilikuwa imefumwa kipande kimoja kutoka juu hadi chini. 24Basi waliambiana, “Tusiichane. Tuipigie kura tuone nani atakayeipata.” Hili lilikuwa ili Maandiko yatimie yanayosema, “Walijigawia mavazi yangu, na kwa ajili ya vazi langu walitupa kura.” Hayo ndiyo askari waliyoyafanya.

25Wakati huo, karibu na msalaba wa Yesu walisimama mama yake, dada wa mama yake, Mariamu mke wa Klopa, na Mariamu Magdalene. 26Yesu alimwona mama yake pale, na karibu naye yule mwanafunzi ambaye alimpenda. Akamwambia mama yake, “Mama, tazama, huyu hapa ni mwana wako.” 27Kisha akamwambia yule mwanafunzi, “Tazama, huyu hapa ni mama yako.” Tangu wakati huo yule mwanafunzi alimchukua akae nyumbani kwake.

28Baada ya hayo, Yesu alijua kwamba sasa yote yamekwisha. Ili Maandiko yakamilike, akasema, “Nina kiu.” 29Palikuwa na mtungi uliojaa divai chungu. Basi wakachovya sifongo katika divai hiyo, wakaiweka juu ya ufito wa hisopo, wakaiinua mpaka midomoni mwake. 30Yesu alipokwisha kuipokea divai chungu, alisema, “Imekwisha.” Kisha akainamisha kichwa chake, akaikabidhi roho yake.

31Ilikuwa Siku ya Maandalio, na viongozi wa Wayahudi hawakutaka miili ibaki juu ya misalaba wakati wa Sabato, kwa sababu Sabato ile ilikuwa siku takatifu ya pekee. Kwa hiyo walimwomba Pilato aagize wale watu wavunjwe miguu na miili iondolewe. 32Basi askari walikuja. Wakamvunja miguu yule mtu wa kwanza, kisha yule mtu mwingine aliyesulubiwa pamoja na Yesu. 33Lakini walipomfikia Yesu, waliona kwamba alikuwa amekwisha kufa. Kwa hiyo hawakumvunja miguu. 34Hata hivyo mmoja wa askari alimdunga mkuki ubavuni, na papo hapo damu na maji vikatiririka. 35Mtu aliyeyaona mambo haya ametoa ushuhuda juu yake, na ushuhuda wake ni wa kweli. Anajua kwamba anayosema ni kweli, naye ameyasimulia ili ninyi pia mwamini. 36Mambo haya yalitokea ili Maandiko yatimie: “Hata mfupa mmoja wake hautavunjwa.” 37Na sehemu nyingine ya Maandiko inasema pia, “Watamtazama yule waliyemtoboa.”

38Baada ya hayo, Yosefu wa Arimathaya, mwanafunzi wa Yesu ambaye alikuwa ameficha jambo hilo kwa sababu aliwaogopa viongozi wa Wayahudi, alimwomba Pilato ruhusa ya kuuondoa mwili wa Yesu, naye Pilato akamruhusu. Basi Yosefu alikuja, akauchukua mwili wake. 39Nikodemo pia alikuja, yule mtu aliyekuja kwa Yesu usiku hapo mwanzo. Alileta mchanganyiko wa manemane na udi wenye uzito wa kilo 33 hivi. 40Waliuchukua mwili wa Yesu, wakauzungushia vitambaa vya kitani pamoja na manukato, kama Wayahudi wanavyouandaa mwili kwa ajili ya kuzikwa. 41Mahali pale alipokuwa amesulubiwa palikuwa na bustani, na katika bustani hiyo kulikuwa na kaburi jipya ambamo hakuna mtu aliyewahi kulazwa. 42Kaburi lilikuwa karibu, na ilikuwa Siku ya Maandalio ya Kiyahudi, kwa hiyo walimlaza Yesu humo.