Yohana 18

1Baada ya Yesu kusema maneno haya, alitoka na wanafunzi wake, akavuka bonde la Kidroni. Hapo palikuwa na bustani, naye akaingia humo pamoja na wanafunzi wake. 2Yuda, aliyekuwa akimsaliti, aliijua sehemu hiyo pia, kwa sababu Yesu alikuwa amezoea kukutana huko na wanafunzi wake. 3Basi Yuda alifika huko akiwaleta kikosi cha askari na walinzi wa hekalu waliotumwa na wakuu wa makuhani na Mafarisayo. Walikuwa na taa, mienge na silaha. 4Yesu alijua yote yaliyokuwa karibu kumpata, basi akatoka kuwaendea, akawauliza, “Ni nani mnayemtafuta?” 5Walimjibu, “Yesu wa Nazareti.” Akawaambia, “Mimi ndiye.” Yuda, aliyekuwa akimsaliti, alikuwa pale amesimama pamoja nao. 6Yesu alipowaambia, “Mimi ndiye,” walirudi hatua kadhaa nyuma, wakaanguka chini. 7Basi akawauliza tena, “Ni nani mnayemtafuta?” “Yesu wa Nazareti,” wakasema. 8Yesu akajibu, “Nimekwisha kuwaambia kwamba mimi ndiye. Basi kama mnayemtafuta ni mimi, waacheni watu hawa waende.” 9Hii ilikuwa ili neno lake litimie: “Sijampoteza hata mmoja wa wale ulionipa.” 10Simoni Petro alikuwa na upanga. Aliuchomoa, akamshambulia mtumishi wa kuhani mkuu na kumkata sikio la kulia. Jina la mtumishi huyo lilikuwa Malko. 11Kisha Yesu akamwambia Petro, “Weka upanga wako ndani ya ala yake! Je, nisikinywe kikombe ambacho Baba amenipa?” 12Kisha kikosi cha askari pamoja na kamanda wake, na walinzi wa hekalu waliotumwa na viongozi wa Wayahudi, walimkamata Yesu na kumfunga kamba. 13Walimpeleka kwanza kwa Anasi, baba mkwe wa Kayafa, aliyekuwa kuhani mkuu mwaka ule. 14Kayafa ndiye aliyekuwa amewashauri viongozi wa Wayahudi kwamba ni afadhali mtu mmoja afe kwa ajili ya watu.

15Simoni Petro alikuwa akimfuata Yesu, pamoja na mwanafunzi mwingine. Mwanafunzi huyo alikuwa anafahamika kwa kuhani mkuu, naye aliingia na Yesu katika ua wa nyumba ya kuhani mkuu. 16Lakini Petro alisimama nje mlangoni. Basi mwanafunzi huyo mwingine, aliyefahamika kwa kuhani mkuu, alitoka nje, akazungumza na mwanamke aliyekuwa akilinda mlango, akamwingiza Petro. 17Yule mtumishi wa kike aliyekuwa akilinda mlango alimwambia Petro, “Wewe pia hu mmoja wa wanafunzi wa mtu huyu, sivyo?” Akasema, “Mimi siye.” 18Watumishi na walinzi wa hekalu walikuwa wamewasha moto wa makaa kwa sababu kulikuwa na baridi, wakasimama kuuzunguka wakijipasha joto. Petro pia alikuwa amesimama pamoja nao, akijipasha joto.

19Wakati huo kuhani mkuu alianza kumwuliza Yesu maswali kuhusu wanafunzi wake na kuhusu mafundisho yake. 20Yesu akajibu, “Nimezungumza na ulimwengu waziwazi. Siku zote nimefundisha katika masinagogi na katika nyua za hekalu, mahali ambapo Wayahudi wote hukusanyika. Sijasema neno lolote kwa siri. 21Kwa nini unanihoji? Waulize wale walionisikia kile nilichowaambia. Tazama, wao wanajua nilichosema.” 22Aliposema hayo, mmoja wa walinzi wa hekalu aliyekuwa amesimama karibu alimzaba Yesu kofi, akasema, “Je, hivyo ndivyo unavyomjibu kuhani mkuu?” 23Yesu akamjibu, “Kama nilisema jambo baya, basi shuhudia ni lipi lililokuwa baya. Lakini kama nilisema vyema, kwa nini unanipiga?” 24Kisha Anasi akamtuma kwa Kayafa kuhani mkuu, akiwa bado amefungwa.

25Wakati huo Simoni Petro alikuwa bado amesimama pale akijipasha joto. Basi wakamwambia, “Wewe pia hu mmoja wa wanafunzi wake, sivyo?” Alikana, akisema, “Mimi siye.” 26Mmoja wa watumishi wa kuhani mkuu, ndugu wa yule mtu ambaye Petro alimkata sikio, akasema, “Je, sikukuona kwa macho yangu pamoja naye bustanini?” 27Petro alikana tena, na saa ileile jogoo aliwika.

28Kisha walimpeleka Yesu kutoka kwa Kayafa hadi ikulu ya mkuu wa mkoa. Ilikuwa asubuhi na mapema. Wao wenyewe hawakuingia ikulu, ili wasiwe najisi kidini, kwa sababu walitaka kula Pasaka. 29Basi Pilato alitoka nje kwao, akauliza, “Mnamshtaki mtu huyu kwa kosa gani?” 30Wakamjibu, “Tusingemkabidhi kwako kama mtu huyu asingekuwa mhalifu.” 31Pilato akawaambia, “Basi ninyi wenyewe mchukueni mkasikilize kesi yake chini ya sheria yenu.” Viongozi wa Wayahudi wakajibu, “Sisi hatuna mamlaka ya kumhukumu mtu yeyote kifo.” 32Hii ilikuwa ili litimie neno ambalo Yesu alikuwa amesema, akionyesha ni kifo cha namna gani atakachokufa.

33Kisha Pilato akarudi ndani ya ikulu ya mkuu wa mkoa. Akamwita Yesu, akamwuliza, “Je, wewe ndiwe Mfalme wa Wayahudi?” 34Yesu akajibu, “Unauliza hivyo kwa mawazo yako mwenyewe, au wengine wamekuambia habari zangu?” 35Pilato akajibu, “Unadhani mimi ni Myahudi? Wale waliokukabidhi kwangu ni taifa lako mwenyewe na wakuu wa makuhani. Umefanya nini?” 36Yesu akajibu, “Ufalme wangu hautoki katika ulimwengu huu. Kama ungetoka huko, watumishi wangu wangepigana ili nisikabidhiwe kwa viongozi wa Wayahudi. Lakini ilivyo, ufalme wangu hautoki hapa.” 37Pilato akamwambia, “Kumbe wewe ni mfalme?” Yesu akajibu, “Wewe ndiye unayesema kwamba mimi ni mfalme. Nilizaliwa kwa ajili ya jambo hili, na nilikuja ulimwenguni kwa ajili yake: kuishuhudia kweli. Wote walio wa kweli huisikiliza sauti yangu.” 38Pilato akamwuliza, “Kweli ni nini?” Baada ya kusema hayo, alirudi nje kwa viongozi wa Wayahudi, akawaambia, “Sipati sababu yoyote ya kumshtaki. 39Lakini ninyi mna desturi kwamba kila Pasaka nimwachilie huru mfungwa mmoja kwa ajili yenu. Basi, je, nimwachilie huru Mfalme wa Wayahudi kwa ajili yenu?” 40Hapo walipaza sauti tena, “Siyo huyu! Baraba!” Baraba alikuwa mnyang’anyi.