Yohana 20

1Siku ya kwanza ya juma, Mariamu Magdalene alifika kaburini mapema asubuhi, wakati bado kulikuwa na giza, akakuta jiwe limekwisha kuondoshwa kaburini. 2Basi alikimbia kwenda kwa Simoni Petro na kwa yule mwanafunzi mwingine, ambaye Yesu alimpenda. “Wamemtoa Bwana kaburini,” akawaambia, “nasi hatujui wamemweka wapi.” 3Basi Petro na yule mwanafunzi mwingine waliondoka, wakashika njia kwenda kaburini. 4Wote wawili walikimbia pamoja, lakini yule mwanafunzi mwingine alikuwa na kasi kuliko Petro, akafika kaburini kabla yake. 5Akainama ili kutazama ndani, akaona vitambaa vya kitani vimelala pale; hata hivyo hakuingia. 6Kisha Simoni Petro, aliyekuwa akimfuata, alifika, akaingia kaburini. Akaona vitambaa vya kitani vimelala pale, 7na kile kitambaa cha uso kilichokuwa juu ya kichwa chake. Kitambaa hicho hakikuwa pamoja na vitambaa vya kitani; kilikuwa kimekunjwa na kuwekwa kando peke yake. 8Kisha yule mwanafunzi mwingine, aliyefika kaburini kwanza, naye aliingia; akaona, akaamini. 9Kwa maana mpaka wakati huo hawakuwa wameelewa Andiko linalosema kwamba yeye lazima afufuke kutoka kwa wafu. 10Kisha wanafunzi walirudi mahali walipokuwa wakikaa. 11Lakini Mariamu alisimama nje, karibu na kaburi, akilia. Akiwa bado analia, aliinama ili kutazama ndani ya kaburi. 12Humo aliona malaika wawili waliovaa nguo nyeupe, wameketi pale mwili wa Yesu ulipokuwa umelala, mmoja kichwani, mwingine miguuni. 13Wakamwambia, “Mama, kwa nini unalia?” “Bwana wangu amechukuliwa,” akajibu, “nami sijui wamemweka wapi.” 14Baada ya kusema maneno hayo aligeuka, akamwona Yesu amesimama pale, ingawa hakujua kwamba ni Yesu. 15Yesu akamwambia, “Mama, kwa nini unalia? Ni nani unayemtafuta?” Akidhani kwamba yeye ni mtunza bustani, akamwambia, “Ikiwa wewe ndiye uliyembeba, bwana, niambie ulikomweka, nami nitakwenda kumchukua.” 16Yesu akamwambia, “Mariamu!” Akamgeukia, akamwambia kwa Kiebrania, “Rabuni!” (maana yake ni Mwalimu). 17Yesu akamwambia, “Usiendelee kunishikilia, kwa sababu bado sijapaa kwa Baba. Badala yake nenda kwa ndugu zangu na ujumbe huu: ‘Ninapaa kwa Baba yangu na Baba yenu, kwa Mungu wangu na Mungu wenu.’” 18Mariamu Magdalene alikwenda, akawaletea wanafunzi habari: “Nimemwona Bwana!” Akawaeleza mambo aliyoambiwa naye.

19Jioni ya siku ile, siku ya kwanza ya juma, wanafunzi walikuwa ndani, milango imefungwa kwa kufuli, kwa sababu waliwaogopa viongozi wa Wayahudi. Yesu akaja, akasimama katikati yao, akasema, “Amani iwe nanyi.” 20Baada ya kusema hivyo, aliwaonyesha mikono yake na ubavu wake. Basi wanafunzi walipomwona Bwana, walifurahi. 21Yesu akawaambia tena, “Amani iwe nanyi. Kwa jinsi ileile Baba alivyonituma, ndivyo mimi ninavyowatuma ninyi.” 22Baada ya kusema hayo, akawapumulia, akawaambia, “Pokeeni Roho Mtakatifu.” 23Wale mtakaowasamehe dhambi zao, wamesamehewa; wale mtakaowashikilia dhambi zao, dhambi hizo zinabaki zimeshikiliwa. 24Lakini Tomaso, mmoja wa wale Kumi na Wawili, aitwaye pia Didimo (maana yake Pacha), hakuwa pamoja nao Yesu alipokuja. 25Basi wanafunzi wengine wakaendelea kumwambia, “Tumemwona Bwana!” Lakini yeye akawaambia, “Sitaamini kamwe mpaka nione alama zilizoachwa na misumari katika mikono yake, na kutia kidole changu katika alama hizo, na kutia mkono wangu katika ubavu wake.”

26Juma moja baadaye wanafunzi wake walikuwa tena ndani ya nyumba, na Tomaso alikuwa pamoja nao. Ingawa milango ilikuwa imefungwa kwa kufuli, Yesu alikuja, akasimama katikati yao, akasema, “Amani iwe nanyi.” 27Kisha akamwambia Tomaso, “Weka kidole chako hapa; tazama mikono yangu. Lete mkono wako, uutie katika ubavu wangu. Acha kuwa mtu asiyeamini; uwe mtu anayeamini.” 28Tomaso akamjibu, “Bwana wangu na Mungu wangu!” 29Yesu akamwambia, “Je, umeamini kwa sababu umeniona? Heri wale walioamini bila kuona.”

30Yesu alifanya pia ishara nyingine nyingi wanafunzi wakiwa wanatazama, ishara ambazo hazijaandikwa katika kitabu hiki. 31Hizi, hata hivyo, zimeandikwa ili mwamini kwamba Yesu ndiye Kristo, Mwana wa Mungu, na kwa njia ya kuamini muwe na uzima katika jina lake.