Yohana 14

1“Mioyo yenu isifadhaike. Mwaminini Mungu, na niaminini mimi vilevile. 2Katika nyumba ya Baba yangu kuna makao mengi. La sivyo ningewaambia, kwa maana ninakwenda kuwaandalia mahali. 3Na nikiisha kwenda na kuwaandalia mahali, nitarudi na kuwachukua ili mkae pamoja nami, ili ninyi pia mwe pale nilipo. 4Nanyi mnaijua njia inayoelekea ninakokwenda.” 5Tomaso akamwambia, “Bwana, hatujui unakokwenda. Basi tutaijuaje njia?” 6Yesu akamjibu, “Mimi ni njia, kweli, na uzima. Mtu yeyote anakuja kwa Baba kupitia kwangu tu. 7Kama mngenijua, mngemjua Baba yangu pia. Na tangu sasa mnamjua; mmemwona.”

8Filipo akamwambia, “Bwana, tuonyeshe Baba; hatutahitaji kitu kingine.” 9Yesu akamwambia, “Nimekuwa pamoja nanyi muda wote huu, Filipo, nawe bado hunijui? Kuniona mimi ni kumwona Baba. Basi inakuwaje unasema, ‘Tuonyeshe Baba’? 10Je, huamini kwamba niko ndani ya Baba, na kwamba Baba yuko ndani yangu? Maneno ninayowaambia siyasemi kwa mamlaka yangu mwenyewe. Bali Baba anayekaa ndani yangu ndiye anayefanya kazi zake. 11Niaminini: niko ndani ya Baba, na Baba yuko ndani yangu. La sivyo, aminini kwa sababu ya kazi zenyewe. 12Kweli kweli nawaambia, yeyote anayeniamini atazifanya pia kazi ninazozifanya, naye atafanya kazi kubwa kuliko hizi, kwa kuwa ninakwenda kwa Baba. 13Na lolote mtakaloomba kwa jina langu, nitalitimiza, ili ndani ya Mwana Baba atukuzwe. 14Mkiniomba chochote kwa jina langu, mimi mwenyewe nitakifanya.

15Kama mnanipenda, mtashika amri nilizowapa. 16Nitamwomba Baba, naye kwa kujibu atawapa Mtetezi mwingine, atakayekuwa pamoja nanyi milele. 17Huyu ni Roho wa kweli. Ulimwengu hauwezi kumpokea, kwa kuwa haumwoni wala haumjui. Lakini ninyi mnamjua, kwa maana anakaa pamoja nanyi, naye atakuwa ndani yenu.

18Sitawaacha kama yatima wasio na baba; ninakuja kwenu. 19Baada ya muda mfupi ulimwengu hautaniona tena, lakini ninyi mtaniona. Kwa kuwa ninaishi, ninyi pia mtaishi. 20Siku hiyo mtakuja kujua kwamba niko ndani ya Baba yangu, na kwamba ninyi mko ndani yangu, nami niko ndani yenu. 21Yeyote aliye na amri zangu na kuzishika, huyo ndiye anayenipenda. Yeyote anayenipenda atapendwa na Baba yangu; nami kwa upande wangu nitampenda na kujionyesha kwake.” 22Yuda (si Yuda Iskariote) akamwambia, “Bwana, inakuwaje kwamba utajionyesha kwetu, lakini si kwa ulimwengu?” 23Yesu akajibu, “Yeyote anayenipenda atalishika neno langu. Baba yangu atampenda, nasi tutakuja kwake na kufanya makao yetu pamoja naye. 24Yeyote asiyenipenda hayashiki maneno yangu. Na neno mnalolisikia si langu; ni la Baba aliyenituma.

25Nimewaambia mambo haya wakati bado niko pamoja nanyi. 26Lakini Mtetezi, Roho Mtakatifu, ambaye Baba atamtuma kwa jina langu, ndiye atakayewafundisha kila kitu na kuwakumbusha yote niliyowaambia. 27Amani ninawaachia; ni amani yangu mwenyewe ninayowapa. Sitoi kama ulimwengu unavyotoa. Mioyo yenu isifadhaike, wala isikubali kushindwa na hofu. 28Mlinisikia nikiwaambia, ‘Ninaondoka, nami ninarudi kwenu.’ Kama mngenipenda, mngefurahi kwamba ninakwenda kwa Baba, kwa kuwa Baba ni mkuu kuliko mimi. 29Nimewaambia sasa, kabla halijatukia, ili litakapotukia mwamini. 30Sitasema mengi zaidi nanyi, kwa sababu mtawala wa ulimwengu anakuja. Hana mamlaka yoyote juu yangu. 31Lakini ili ulimwengu ujue kwamba nampenda Baba, ninafanya kama vile Baba alivyoniamuru. Simameni; tuondoke hapa.