Yohana 17

1Yesu alipokwisha kusema mambo haya, aliinua macho yake kuelekea mbinguni, akaomba: “Baba, saa imefika. Mtukuze Mwana wako, ili Mwana akutukuze wewe. 2Kwa maana umempa mamlaka juu ya watu wote, ili awape uzima wa milele wote ambao umempa. 3Na uzima wa milele ni huu: kwamba wakujue wewe, Mungu pekee aliye wa kweli, na yule uliyemtuma, Yesu Kristo. 4Nimekutukuza duniani kwa kuikamilisha kazi uliyonipa niifanye. 5Basi sasa, Baba, wewe mwenyewe unitukuze kando yako, kwa utukufu uliokuwa wangu kwako kabla haujakuwepo ulimwengu.

6Nimelijulisha jina lako kwa watu ulionipa kutoka ulimwenguni. Walikuwa mali yako, nawe ukanipa; nao wamelishika neno lako. 7Sasa wamekuja kujua kwamba yote uliyonipa yanatoka kwako. 8Kwa maana nimewapa maneno uliyonipa, nao wameyapokea. Wamejua kwa hakika kwamba nilitoka kwako, nao wanaamini kwamba ni wewe uliyenituma. 9Ninawaombea wao. Siuombei ulimwengu, bali ninawaombea wale ulionipa, kwa sababu ni wako. 10Vyote vilivyo vyangu ni vyako, na vyote vilivyo vyako ni vyangu, nami nimetukuzwa ndani yao. 11Siko tena ulimwenguni, lakini wao bado wako ulimwenguni, nami ninakuja kwako. Baba Mtakatifu, uwatunze katika jina lako, lile jina ambalo umenipa, ili wawe wamoja, kama sisi tulivyo wamoja. 12Nilipokuwa pamoja nao, niliwatunza katika jina lako, lile jina ambalo umenipa. Niliwalinda, na hakuna hata mmoja wao aliyepotea, isipokuwa yule aliyekusudiwa kupotea, ili Maandiko yatimie. 13Lakini sasa ninakuja kwako, na ninasema maneno haya nikiwa bado ulimwenguni, ili ndani yao wenyewe wawe na furaha yangu iliyo kamili. 14Nimewapa neno lako, na ulimwengu umewachukia, kwa sababu wao si wa ulimwengu, kama vile mimi nisivyo wa ulimwengu. 15Sikuombi uwaondoe ulimwenguni, bali uwalinde salama mbali na yule mwovu. 16Wao si wa ulimwengu, kama vile mimi nisivyo wa ulimwengu. 17Uwaweke wakfu kwa ajili yako kwa njia ya kweli; neno lako ni kweli. 18Kama ulivyonituma ulimwenguni, ndivyo nami nimewatuma ulimwenguni. 19Kwa ajili yao najiweka wakfu mimi mwenyewe, ili nao pia wawekwe wakfu kwa njia ya kweli.

20Siombi kwa ajili ya hawa peke yao. Ninaomba pia kwa ajili ya wale watakaoniamini mimi kupitia ujumbe wao. 21Baba, naomba wote wawe wamoja. Kama vile wewe ulivyo ndani yangu, nami nilivyo ndani yako, vivyo hivyo nao wawe ndani yetu, ili ulimwengu upate kuamini kwamba wewe ndiwe uliyenituma. 22Utukufu ulionipa nimewapa wao, ili wawe wamoja kama sisi tulivyo wamoja. 23Mimi niko ndani yao, nawe uko ndani yangu. Hivyo waletwe kwenye umoja kamili, na hapo ulimwengu utajua kwamba wewe ndiwe uliyenituma, na kwamba uliwapenda kama vile ulivyonipenda mimi. 24Baba, wale wote ulionipa: ni mapenzi yangu kwamba nao wawe pamoja nami pale nilipo, wauone utukufu wangu, ulionipa kwa sababu ulinipenda kabla ya kuumbwa kwa ulimwengu.

25Baba mwenye haki, ingawa ulimwengu haujakujua kamwe, mimi nimekujua, na wanafunzi hawa wamekuja kujua kwamba wewe ndiwe uliyenituma. 26Nimewajulisha jina lako, nami nitaendelea kulijulisha, ili upendo ambao umekuwa nao kwangu uwe ndani yao, nami ndani yao.”