Yohana 4

1Yesu alipata habari kwamba Mafarisayo walikuwa wamesikia kwamba anafanya na kubatiza wanafunzi wengi kuliko Yohana. 2(Kwa hakika si Yesu mwenyewe aliyebatiza, bali wanafunzi wake.) 3Basi aliondoka Uyahudi, akarudi tena Galilaya. 4Ilimpasa apite katikati ya Samaria. 5Basi alifika katika mji mmoja wa Samaria uitwao Sikari, karibu na kipande cha ardhi ambacho Yakobo alikuwa amempa mwanawe Yusufu. 6Kisima cha Yakobo kilikuwa hapo. Yesu alikuwa amechoka kwa safari, basi akaketi kando ya kisima vile vile alivyokuwa. Ilikuwa yapata saa sita mchana.

7Mwanamke mmoja Msamaria alikuja kuteka maji. Yesu akamwambia, “Nipe maji ninywe.” 8Wanafunzi wake walikuwa wamekwenda mjini kununua chakula. 9Yule mwanamke Msamaria akamwambia, “Inakuwaje Myahudi kama wewe kuniomba maji ya kunywa mimi mwanamke Msamaria?” (Wayahudi hawatumii vyombo vile vile na Wasamaria.) 10Yesu akamjibu, “Kama ungejua zawadi anayotoa Mungu, na ni nani anayekuambia, ‘Nipe maji ninywe,’ wewe ndiwe ungemwomba, naye angekupa maji yaliyo hai.” 11Mwanamke akamwambia, “Huna ndoo, bwana, na kisima ni kirefu. Basi hayo maji yako yaliyo hai yatatoka wapi? 12Je, wewe ni mkuu kuliko baba yetu Yakobo? Yeye ndiye aliyetupa kisima hiki, naye pamoja na wanawe na wanyama wake wote walikunywa maji yake.” 13Yesu akamjibu, “Wote wanaokunywa maji haya wataona kiu tena. 14Lakini hakuna atakayekunywa maji nitakayompa atakayeona kiu tena kamwe. Maji nitakayompa yatakuwa ndani yake chemchemi ambayo maji yake yanabubujika hadi uzima wa milele.” 15Mwanamke akamwambia, “Nipe maji hayo, bwana! Ndipo sitaona kiu, wala sitalazimika kuja hapa kuteka maji.”

16Akamwambia, “Nenda umwite mumeo, kisha urudi hapa.” 17Mwanamke akajibu, “Sina mume.” Yesu akamwambia, “Uko sahihi kusema, ‘Sina mume.’ 18Kwa hakika umekuwa na waume watano, na yule unayeishi naye sasa si mume wako. Hapo umesema ukweli.” 19Mwanamke akamwambia, “Naona, bwana, kwamba wewe ni nabii. 20Mlima huu ndipo mababu zetu walipoabudu; lakini ninyi Wayahudi mnasema kwamba Yerusalemu ndipo mahali ambapo ibada inapaswa kufanyika.” 21Yesu akamwambia, “Niamini, Mama: saa inakuja ambapo ibada yenu kwa Baba haitakuwa katika mlima huu, wala Yerusalemu pia. 22Watu wenu wanaabudu bila kujua wanachokiabudu; sisi tunajua tunachokiabudu, kwa kuwa wokovu unatoka kwa Wayahudi. 23Lakini saa inakuja, na kwa hakika imekwisha anza, ambapo waabudu wa kweli watamwabudu Baba katika roho na kweli; kwa maana Baba anatafuta watu kama hao wamwabudu. 24Mungu ni roho, na yeyote anayemwabudu lazima afanye hivyo katika roho na kweli.” 25Mwanamke akamwambia, “Najua kwamba Masihi anakuja” (yule aitwaye Kristo). “Atakapokuja, atatueleza kila kitu wazi.” 26Yesu akamwambia, “Mimi ndiye, mimi ninayezungumza nawe.”

27Wakati huo huo wanafunzi wake walifika, wakashangaa kwamba alikuwa akizungumza na mwanamke. Hata hivyo hakuna aliyemwuliza, “Unatafuta nini?” au, “Kwa nini unazungumza naye?” 28Kisha yule mwanamke aliuacha mtungi wake, akarudi mjini, akawaambia watu, 29“Njooni mwone mtu aliyeniambia kila kitu nilichowahi kufanya. Inawezekana huyu ndiye Kristo?” 30Watu walitoka mjini, wakaanza kuja kwake.

31Wakati huo huo wanafunzi waliendelea kumsihi, “Rabi, kula kitu.” 32Lakini akawaambia, “Mimi nina chakula cha kula msichokijua ninyi.” 33Basi wanafunzi wakaulizana, “Hakuna aliyemletea chakula, sivyo?” 34Yesu akawaambia, “Chakula changu ni kufanya mapenzi ya yule aliyenituma, na kuikamilisha kazi yake.” 35“Je, hamsemi, ‘Bado miezi minne, kisha mavuno yatafika’? Sikilizeni, nawaambia: inueni macho mtazame mashamba. Yamekuwa meupe, tayari kwa mavuno. 36Tayari mvunaji analipwa, na anakusanya mavuno kwa ajili ya uzima wa milele, ili mpandaji afurahi pamoja na mvunaji. 37Kwa maana hapa msemo ule unathibitika kuwa kweli: ‘Mpandaji ni mtu mmoja, na mvunaji ni mwingine.’ 38Niliwatuma mvune kile ambacho hamkukifanyia kazi. Wengine walifanya kazi hiyo, nanyi mmeendeleza pale kazi yao ilipoishia.”

39Wasamaria wengi wa mji ule walimwamini kwa sababu ya neno la yule mwanamke, alipokuwa akishuhudia, “Aliniambia kila kitu nilichowahi kufanya.” 40Wasamaria walipomfikia, waliendelea kumwomba akae nao, naye akakaa huko kwa siku mbili. 41Kwa sababu ya neno lake mwenyewe watu wengi zaidi wakaamini. 42Wakamwambia yule mwanamke, “Sasa hatuamini kwa sababu ya habari yako. Tumemsikiliza sisi wenyewe, nasi tunajua kwamba yeye hakika ni Mwokozi wa ulimwengu.”

43Baada ya siku hizo mbili aliondoka huko kwenda Galilaya. 44Yesu mwenyewe alikuwa amesema wazi kwamba nabii haheshimiwi katika nchi ya kwao. 45Basi alipofika Galilaya, Wagalilaya walimkaribisha. Walikuwa wameona yote aliyofanya Yerusalemu wakati wa sikukuu, kwa kuwa wao pia walikuwa wamehudhuria sikukuu hiyo.

46Basi alirudi Kana ya Galilaya, mahali alipoyageuza maji kuwa divai. Kulikuwa na afisa mmoja wa mfalme ambaye mwanawe alikuwa mgonjwa huko Kapernaumu. 47Aliposikia kwamba Yesu amefika Galilaya kutoka Uyahudi, alimwendea, akaendelea kumsihi ashuke amponye mwanawe, kwa sababu kijana alikuwa anakaribia kufa. 48Yesu akamjibu, “Hakuna hata mmoja wenu atakayeamini msipoona ishara na maajabu.” 49Yule afisa akamsihi, “Shuka, bwana, kabla kijana wangu mdogo hajafa.” 50Yesu akamwambia, “Nenda. Mwanao yu hai.” Yule mtu aliamini yale Yesu aliyomwambia, akaanza safari ya kurudi nyumbani. 51Alipokuwa bado njiani akishuka, watumishi wake walikutana naye na habari kwamba mtoto wake yu hai. 52Basi akawauliza ni saa ngapi mtoto alianza kupata nafuu, nao wakamwambia, “Homa ilimwacha jana yapata saa saba mchana.” 53Ndipo baba yake alipotambua kwamba ilitokea saa ile ile ambayo Yesu alikuwa amemwambia, “Mwanao yu hai.” Basi akaamini, yeye pamoja na watu wote wa nyumbani mwake. 54Yesu alifanya ishara hii, ishara yake ya pili, baada ya kurudi kutoka Uyahudi hadi Galilaya.