Yohana 5

1Muda fulani baada ya hayo kulikuwa na sikukuu ya Kiyahudi, na Yesu alipanda kwenda Yerusalemu. 2Huko Yerusalemu, karibu na Lango la Kondoo, kuna bwawa lenye matao matano; kwa Kiebrania linaitwa Bethesda. 3Wagonjwa wengi walikuwa wakilala katika matao hayo: vipofu, viwete na waliopooza. 5Mtu mmoja pale alikuwa mgonjwa kwa miaka thelathini na minane. 6Yesu alimwona amelala pale, akajua kwamba alikuwa katika hali hiyo kwa muda mrefu, basi akamwuliza, “Je, unataka kuwa mzima?” 7Yule mgonjwa akamjibu, “Maji yanapovurugwa, bwana, sina mtu wa kuniingiza bwawani. Na ninapojaribu kwenda, mtu mwingine hushuka kabla yangu.” 8Yesu akamwambia, “Simama, chukua mkeka wako, uanze kutembea.” 9Mara moja yule mtu akawa mzima. Akachukua mkeka wake, akaanza kutembea huku na huko. Na jambo hili lilitokea siku ya Sabato. 10Basi viongozi wa Wayahudi wakawa wakimwambia yule aliyeponywa, “Leo ni Sabato. Ni kinyume cha sheria kwako kubeba mkeka wako.” 11Lakini akawajibu, “Yule aliyenifanya mzima ndiye aliyeniambia, ‘Chukua mkeka wako, uanze kutembea.’” 12Basi wakamwuliza, “Ni nani huyo mtu aliyekuambia uuchukue, utembee?” 13Lakini yule aliyeponywa hakujua ni nani, kwa kuwa palikuwa na umati mahali pale, na Yesu alikuwa ameondoka bila kuonekana. 14Baadaye Yesu alimkuta katika nyua za hekalu, akamwambia, “Angalia, sasa u mzima. Usiendelee kutenda dhambi, la sivyo jambo baya zaidi linaweza kukupata.” 15Yule mtu aliondoka, akawaambia viongozi wa Wayahudi kwamba aliyemfanya mzima ni Yesu. 16Kwa sababu hiyo viongozi wa Wayahudi walianza kumtesa Yesu, kwa kuwa aliendelea kufanya mambo kama hayo siku ya Sabato. 17Yesu akawajibu, “Baba yangu amekuwa akifanya kazi mpaka sasa, nami pia ninafanya kazi.” 18Basi viongozi wa Wayahudi wakazidi kuazimia kumwua. Mbali na kuivunja Sabato, alikuwa akisema kwamba Mungu ni Baba yake mwenyewe, na hivyo alikuwa akijifanya sawa na Mungu.

19Basi Yesu akawajibu hivi: “Kweli kweli nawaambia, Mwana hawezi kufanya chochote peke yake; hufanya tu kile anachomwona Baba akifanya. Kwa maana kile Baba anachofanya, Mwana naye hufanya vivyo hivyo, kwa namna ile ile. 20Kwa maana Baba anampenda Mwana na kumwonyesha kila kitu ambacho yeye mwenyewe anakifanya. Na kuna kazi kubwa kuliko hizi atakazomwonyesha, ili ninyi mshangae. 21Kwa maana Baba huwafufua wafu na kuwarudishia uzima, na vivyo hivyo Mwana huwapa uzima wale anaowachagua. 22Wala Baba hamhukumu mtu yeyote; amemkabidhi Mwana kazi yote ya kuhukumu, 23ili kila mtu amheshimu Mwana kama wanavyomheshimu Baba. Yeyote anayekataa kumheshimu Mwana anakataa kumheshimu Baba aliyemtuma.

24Kweli kweli nawaambia, yeyote anayesikia neno langu na kumwamini aliyenituma ana uzima wa milele. Mtu huyo hahukumiwi, bali amekwisha toka kifoni na kuingia uzimani.

25Kweli kweli nawaambia, saa inakuja, na kwa hakika imekwisha anza, ambapo wafu wataisikia sauti ya Mwana wa Mungu, na wale watakaoisikia wataishi. 26Kwa maana kama vile Baba alivyo na uzima ndani yake mwenyewe, vivyo hivyo amempa Mwana pia kuwa na uzima ndani yake mwenyewe. 27Pia amempa mamlaka ya kuhukumu, kwa kuwa yeye ni Mwana wa Adamu. 28Msishangae kwa hili. Saa inakuja ambapo wote walio makaburini wataisikia sauti yake 29na kutoka. Waliotenda mema watatoka kwa ufufuo unaoleta uzima; waliotenda maovu, kwa ufufuo unaoleta hukumu.

30Siwezi kufanya chochote peke yangu. Ninahukumu kulingana na ninayoyasikia, na hukumu ninayotoa ni ya haki, kwa sababu sitafuti kutimiza mapenzi yangu, bali mapenzi ya yule aliyenituma.

31Nikitoa ushuhuda juu yangu mwenyewe, ushuhuda huo si kweli. 32Kuna mwingine anayeshuhudia habari zangu, nami najua kwamba ushuhuda anaotoa juu yangu ni kweli. 33Ninyi wenyewe mlipeleka wajumbe kwa Yohana, naye ametoa ushuhuda kwa ajili ya kweli. 34Lakini sipokei ushuhuda kutoka kwa mwanadamu; nasema haya ili mpate kuokolewa. 35Yohana alikuwa taa iliyowaka na kung’aa, na kwa muda mfupi mlifurahi kushangilia katika nuru yake. 36Lakini mimi nina ushuhuda ulio mkuu kuliko wa Yohana. Kazi Baba alizonipa nizikamilishe, kazi zenyewe ninazozifanya, zinashuhudia habari zangu: zinaonyesha kwamba Baba amenituma. 37Na Baba aliyenituma amenishuhudia yeye mwenyewe. Hamjawahi kuisikia sauti yake wala kuuona umbo lake. 38Na neno lake halikai ndani yenu, kwa kuwa hammwamini yule hasa aliyemtuma.

39Mnayasoma Maandiko kwa bidii, kwa kuwa mnadhani kwamba uzima wa milele unapatikana ndani yake; na hayo ndiyo yanayoshuhudia habari zangu. 40Lakini hamtaki kuja kwangu ili mpate uzima. 41Utukufu kutoka kwa watu si kitu ninachokikubali. 42Lakini nawajua ninyi, na hamna upendo kwa Mungu ndani yenu. 43Nimekuja kwa jina la Baba yangu, lakini hamnipokei. Mtu mwingine akija kwa jina lake mwenyewe, mtampokea huyo. 44Mnawezaje kuamini? Mnapokea utukufu kutoka kwa kila mmoja wenu, lakini utukufu unaotoka kwa Mungu pekee hamuutafuti. 45Msidhani kwamba mimi ndiye nitakayewashtaki mbele ya Baba. Tayari mnaye mshtaki: Musa, mliyemwekea tumaini lenu. 46Kama kweli mngemwamini Musa, mngeniamini mimi, kwa sababu aliyoyaandika yalikuwa juu yangu. 47Lakini ikiwa hamyaamini maandiko ya Musa, mtayaaminije kamwe maneno ninayoyasema?”