Yohana 6

1Muda fulani baadaye Yesu alikwenda ng’ambo ya Bahari ya Galilaya, inayoitwa pia Bahari ya Tiberia. 2Umati mkubwa uliendelea kumfuata, kwa sababu waliendelea kuona ishara alizokuwa akifanya kwa kuwaponya wagonjwa. 3Yesu alipanda vilimani, akaketi huko pamoja na wanafunzi wake. 4Ulikuwa umekaribia wakati wa Pasaka, sikukuu ya Kiyahudi. 5Yesu alitazama juu, akaona kwamba umati mkubwa ulikuwa ukija kwake. Basi akamwuliza Filipo, “Tutanunua wapi mkate wa kuwalisha watu hawa?” 6Yesu alisema hivi ili kumjaribu Filipo; tayari alijua atakalofanya. 7Filipo akamjibu, “Mkate wa mshahara wa zaidi ya nusu mwaka usingetosha hata kumpa kila mmoja wao kipande kidogo.” 8Kisha Andrea, mmoja wa wanafunzi wake na ndugu yake Simoni Petro, akamwambia, 9“Yupo kijana mdogo hapa aliye na mikate mitano ya shayiri na samaki wawili wadogo. Lakini hivyo vinasaidia nini kwa watu wengi kiasi hiki?” 10Yesu akasema, “Waambieni watu waketi chini.” Mahali pale palikuwa na nyasi nyingi. Basi wanaume wakaketi, wapata elfu tano. 11Basi Yesu akaichukua mikate, akashukuru, akawagawia watu waliokuwa wameketi pale, na samaki pia, kadiri kila mmoja alivyotaka. 12Wote walipokwisha kushiba, aliwaambia wanafunzi wake, “Okoteni vipande vilivyobaki, ili kisipotee chochote.” 13Wakafanya hivyo, na kutoka kwa ile mikate mitano ya shayiri wakajaza vikapu kumi na viwili kwa vipande vilivyobaki baada ya wote kula. 14Watu walioiona ishara aliyoifanya waliendelea kusema, “Hakika huyu ndiye yule Nabii, yule anayekuja ulimwenguni!” 15Yesu alitambua kwamba walikuwa karibu kuja kumchukua kwa nguvu ili wamfanye mfalme, basi akarudi vilimani peke yake.

16Jioni ilipofika wanafunzi wake walishuka pwani. 17Wakapanda mashua, wakawa wakivuka bahari kwenda Kapernaumu. Giza lilikuwa limekwisha ingia, na bado Yesu hakuwa amewafikia. 18Bahari ilikuwa ikichafuka kwa sababu ya upepo mkali. 19Walipokuwa wamepiga makasia kama kilomita tano au sita, walimwona Yesu akitembea juu ya bahari na kuikaribia mashua, nao wakajawa na hofu. 20Lakini akawaambia, “Ni mimi. Msiogope.” 21Basi walitaka kumpokea mashuani, na mara moja mashua ikafika nchi kavu walikokuwa wakienda.

22Kesho yake umati uliokuwa umebaki ng’ambo ya bahari uliona kwamba palikuwa na mashua moja tu pale, na kwamba Yesu hakuwa amepanda pamoja na wanafunzi wake. Wanafunzi walikuwa wameondoka peke yao. 23Hata hivyo, mashua kadhaa kutoka Tiberia zilikuja karibu na mahali walipokuwa wamekula mkate baada ya Bwana kushukuru. 24Basi umati ulipoona kwamba Yesu hayupo pale wala wanafunzi wake, waliingia katika mashua, wakaenda Kapernaumu kumtafuta.

25Walipomkuta ng’ambo ya bahari, wakamwuliza, “Rabi, umefika lini hapa?” 26Yesu akawajibu, “Kweli kweli nawaambia, mnanitafuta, si kwa sababu mliona ishara, bali kwa sababu mlikula mikate mkashiba. 27Msifanye kazi kwa ajili ya chakula kinachopita, bali kwa ajili ya chakula kinachodumu hadi uzima wa milele, chakula ambacho Mwana wa Adamu atawapa. Kwa maana yeye ndiye ambaye Mungu Baba amemtia mhuri wake.” 28Basi wakamwuliza, “Tufanye nini ili tuwe tukitenda kazi ambazo Mungu anataka tufanye?” 29Yesu akawajibu, “Hii ndiyo kazi ya Mungu: mwamini yule aliyemtuma.” 30Basi wakamwambia, “Basi wewe utafanya ishara gani tuione, ili tukuamini? Unafanya kazi gani? 31Mababu zetu walikula mana jangwani; kama ilivyoandikwa, ‘Aliwapa mkate kutoka mbinguni wale.’” 32Yesu akawaambia, “Kweli kweli nawaambia, Musa hakuwa ndiye aliyewapa mkate kutoka mbinguni; Baba yangu ndiye anayewapa mkate wa kweli kutoka mbinguni. 33Kwa maana mkate wa Mungu ni ule unaoshuka kutoka mbinguni na kutoa uzima kwa ulimwengu.” 34Kisha wakamwambia, “Tupe mkate huu kila wakati, bwana.”

35Yesu akawaambia, “Mimi ni mkate wa uzima. Wanaokuja kwangu hawatakuwa na njaa kamwe, na wanaoniamini hawatakuwa na kiu wakati wowote. 36Lakini nilikwisha kuwaambia: mmeniona, lakini hamwamini. 37Kila mtu ambaye Baba ananipa atakuja kwangu, na sitamfukuza kamwe yeyote anayekuja kwangu. 38Kwa maana nimeshuka kutoka mbinguni, si ili kutimiza mapenzi yangu mwenyewe, bali mapenzi ya yule aliyenituma. 39Na mapenzi ya yule aliyenituma ni haya: nisipoteze chochote katika yote aliyonipa, bali niyafufue yote siku ya mwisho. 40Kwa maana Baba yangu anataka hivi: kila anayemwona Mwana na kumwamini atakuwa na uzima wa milele, nami mwenyewe nitamfufua siku ya mwisho.”

41Basi Wayahudi wakaanza kunung’unika juu yake, kwa sababu alikuwa amesema, “Mimi ni mkate ulioshuka kutoka mbinguni.” 42Wakaendelea kusema, “Hakika huyu ni Yesu, mwana wa Yusufu? Tunawajua baba yake na mama yake. Basi anamaanisha nini anaposema sasa, ‘Nimeshuka kutoka mbinguni’?” 43Yesu akawajibu, “Acheni kunung’unika miongoni mwenu. 44Hakuna awezaye kuja kwangu kama Baba aliyenituma hamvuti. Na siku ya mwisho nitamfufua. 45Katika Manabii imeandikwa, ‘Wote watafundishwa na Mungu.’ Kila aliyesikia mafundisho ya Baba na kujifunza anakuja kwangu. 46Hii haimaanishi kwamba mtu yeyote amemwona Baba. Ni yule tu aliyekuja kutoka kwa Mungu ndiye aliyemwona. 47Kweli kweli nawaambia, yeyote anayeamini ana uzima wa milele. 48Mimi ni mkate wa uzima. 49Wahenga wenu walikula mana jangwani, na bado wakafa. 50Lakini huu ni mkate unaoshuka kutoka mbinguni: yeyote atakayeula hatakufa. 51Mimi ni mkate ulio hai, ulioshuka kutoka mbinguni. Mtu yeyote akiula mkate huu, ataishi milele. Mkate nitakaoutoa ni mwili wangu, nami nautoa ili ulimwengu upate uzima.”

52Ndipo Wayahudi wakaanza kubishana vikali wao kwa wao. “Anawezaje huyu kutupa mwili wake tuule?” wakasema. 53Yesu akawajibu, “Kweli kweli nawaambia, kama hamtakula mwili wa Mwana wa Adamu na kunywa damu yake, hamna uzima ndani yenu. 54Yeyote anayekula mwili wangu na kunywa damu yangu ana uzima wa milele, na siku ya mwisho nitamfufua. 55Kwa maana mwili wangu ni chakula halisi, na damu yangu ni kinywaji halisi. 56Yeyote anayekula mwili wangu na kunywa damu yangu anakaa ndani yangu, nami ninakaa ndani yake. 57Baba aliye hai alinituma, nami ninaishi kwa sababu yake; vivyo hivyo, yeyote anayenila mimi ataishi kwa sababu yangu. 58Basi huu ndio mkate ulioshuka kutoka mbinguni. Si kama chakula walichokula wahenga, kwa maana wao walikufa; yeyote anayeula mkate huu ataishi milele.” 59Alisema mambo haya yote alipokuwa akifundisha katika sinagogi huko Kapernaumu.

60Waliposikia hayo, wengi wa wanafunzi wake walisema, “Ujumbe huu ni mzito. Ni nani anayeweza kuvumilia kuusikiliza?” 61Yesu alijua kwamba wanafunzi wake walikuwa wakinung’unika juu ya jambo hili, basi akawaambia, “Je, jambo hili linawakwaza? 62Basi itakuwaje mkimwona Mwana wa Adamu akipanda kwenda alikokuwa hapo awali? 63Roho ndiye anayetoa uzima; mwili haufai kitu chochote. Maneno niliyowaambia ni roho, nayo ni uzima. 64Hata hivyo baadhi yenu hamwamini.” Kwa maana Yesu alikuwa amejua tangu mwanzo ni akina nani wasioamini, na ni nani atakayemsaliti. 65Akaongeza, “Hii ndiyo sababu niliwaambia kwamba hakuna mtu anayeweza kuja kwangu isipokuwa amejaliwa na Baba.”

66Kwa sababu hiyo wengi wa wanafunzi wake walirudi nyuma, wakaacha kuandamana naye. 67Basi Yesu akawauliza wale Kumi na Wawili, “Hakika ninyi hamtaki kuondoka pia?” 68Simoni Petro akamjibu, “Bwana, tungeenda kwa nani? Una maneno yanayoleta uzima wa milele. 69Sisi tumeamini, na tunajua, kwamba wewe ndiwe Mtakatifu wa Mungu.” 70Yesu akawajibu, “Je, si mimi mwenyewe niliyewachagua ninyi kumi na wawili? Hata hivyo, mmoja wenu ni ibilisi.” 71Alimaanisha Yuda, mwana wa Simoni Iskariote. Yuda alikuwa mmoja wa wale Kumi na Wawili, naye alikuwa atamsaliti.