Yohana 10

1“Kweli kweli nawaambia, mtu yeyote asiyeingia zizini kupitia mlango, bali anapanda kuingia kupitia upande mwingine, ni mwizi na mnyang’anyi. 2Lakini yule anayeingia kupitia mlango ndiye mchungaji wa kondoo. 3Bawabu humfungulia mlango, na kondoo huisikia sauti yake. Huwaita kondoo wake mwenyewe kila mmoja kwa jina lake, na kuwaongoza nje. 4Akishawatoa nje kondoo wake wote, hutembea mbele yao, na kondoo humfuata kwa sababu wanaijua sauti yake. 5Hawatamfuata mgeni kamwe. Watamkimbia, kwa sababu hawazijui sauti za wageni.” 6Yesu aliwaambia mfano huu, lakini hawakuelewa alichomaanisha.

7Basi Yesu akasema nao tena: “Kweli kweli nawaambia, mimi ni mlango kwa ajili ya kondoo. 8Wote waliokuja kabla yangu ni wezi na wanyang’anyi, lakini kondoo hawakuwasikiliza. 9Mimi ni mlango. Mtu yeyote akiingia kupitia mimi, ataokolewa, akiingia na kutoka na kupata malisho. 10Mwizi huja kwa sababu moja tu: kuiba, kuchinja na kuharibu. Mimi nimekuja ili wawe na uzima, nao uwe tele kwao.

11Mimi ni mchungaji mwema. Mchungaji mwema huyatoa maisha yake kwa ajili ya kondoo. 12Kibarua si mchungaji, na kondoo si wake. Kwa hiyo anapomwona mbwa mwitu akija, huwaacha kondoo na kukimbia, na mbwa mwitu huwakamata na kulitawanya kundi. 13Hukimbia kwa sababu anafanya kazi kwa ajili ya mshahara tu, wala kondoo si kitu kwake. 14Mimi ni mchungaji mwema. Nawajua walio wangu, na walio wangu wananijua, 15kama vile Baba anavyonijua nami ninavyomjua Baba. Nami nayatoa maisha yangu kwa ajili ya kondoo. 16Nina kondoo wengine pia, ambao si wa zizi hili. Inanipasa kuwaleta hao nao, nao wataisikiliza sauti yangu, nao watakuwa kundi moja lenye mchungaji mmoja. 17Hii ndiyo sababu Baba ananipenda: kwa sababu nayatoa maisha yangu ili niyapokee tena. 18Hakuna anayeyachukua kutoka kwangu; nayatoa kwa hiari yangu mwenyewe. Nina mamlaka ya kuyatoa, na mamlaka ya kuyapokea tena. Hii ndiyo amri niliyopokea kutoka kwa Baba yangu.”

19Kwa mara nyingine Wayahudi waliokuwa wakisikiliza waligawanyika kwa sababu ya maneno haya. 20Wengi wao walisema, “Ana pepo, na amerukwa na akili. Kwa nini kumsikiliza?” 21Wengine walisema, “Hivi sivyo anavyosema mtu mwenye pepo. Hakika pepo hawezi kufumbua macho ya vipofu?” 22Kisha ukafika wakati wa Sikukuu ya Kuweka Wakfu huko Yerusalemu. Ilikuwa majira ya baridi, 23naye Yesu alikuwa akitembea katika nyua za hekalu, katika Ukumbi wa Solomoni. 24Basi Wayahudi waliokuwa pale wakamzunguka, wakamwambia, “Utatuacha katika wasiwasi mpaka lini? Ikiwa wewe ndiwe Kristo, tuambie kwa maneno yaliyo wazi.” 25Yesu akawajibu, “Nimekwisha kuwaambia, lakini hamwamini. Kazi ninazozifanya kwa jina la Baba yangu zenyewe zinanishuhudia. 26Lakini ninyi hamwamini, kwa sababu ninyi si miongoni mwa kondoo wangu. 27Kondoo walio wangu huisikiliza sauti yangu; nawajua, nao hunifuata. 28Nawapa uzima wa milele, nao hawataangamia kamwe. Hakuna atakayewanyakua kutoka mkononi mwangu. 29Baba yangu, aliyenipa hao, ni mkuu kuliko wote, wala hakuna awezaye kuwanyakua kutoka mkononi mwa Baba. 30Baba na mimi tu wamoja.”

31Kwa mara nyingine Wayahudi waliokuwa wamemzunguka waliokota mawe ili wampige. 32Yesu akawaambia, “Nimewaonyesha kazi nyingi njema zinazotoka kwa Baba. Ni kazi ipi kati ya hizo mnayotaka kunipigia mawe?” 33Wayahudi wakamjibu, “Hatukupigi mawe kwa sababu ya kazi njema. Ni kwa sababu ya kukufuru: wewe ni mwanadamu tu, nawe unajifanya mwenyewe kuwa Mungu.” 34Yesu akawajibu, “Sheria yenu wenyewe inasema, sivyo, ‘Mimi nilisema, “Ninyi ni miungu”’? 35Ikiwa aliwaita miungu, wale watu ambao neno la Mungu liliwajia, na Andiko haliwezi kutanguka, 36mnawezaje kumwambia yeye, yule ambaye Baba alimweka wakfu na kumtuma ulimwenguni, ‘Unakufuru,’ kwa sababu nilisema, ‘Mimi ni Mwana wa Mungu’? 37Ikiwa sifanyi kazi za Baba yangu, msiniamini. 38Lakini ikiwa nazifanya, basi hata kama hamniamini, ziaminini kazi hizo. Ndipo mtajua, na kuendelea kujua, kwamba Baba yuko ndani yangu nami niko ndani ya Baba.” 39Basi kwa mara nyingine walijaribu kumkamata, lakini akaponyoka mikononi mwao.

40Kisha Yesu alirudi ng’ambo ya Yordani mahali Yohana alipokuwa akibatiza siku za mwanzo, akakaa huko. 41Watu wengi walimjia. “Yohana hakufanya hata ishara moja,” walisema, “lakini kila neno Yohana alilosema juu ya mtu huyu lilikuwa kweli.” 42Na watu wengi huko walimwamini.