Yohana 15

1Mimi ni mzabibu wa kweli, na Baba yangu ndiye mkulima wa mizabibu. 2Yeye huliondoa kila tawi ndani yangu lisilozaa matunda, na kila tawi linalozaa matunda hulipogoa likawa safi, ili lizae matunda zaidi. 3Kwa sababu ya neno nililowaambia, ninyi ni safi tayari. 4Kaeni ndani yangu, nami nitakaa ndani yenu. Tawi haliwezi kuzaa matunda peke yake; ni lazima likae katika mzabibu. Vivyo hivyo, ninyi hamwezi kuzaa matunda msipokaa ndani yangu. 5Mimi ni mzabibu; ninyi ni matawi. Yeyote anayekaa ndani yangu, nami nikikaa ndani yake, ndiye anayezaa matunda mengi, kwa sababu bila mimi hamwezi kufanya kitu. 6Yeyote asiyekaa ndani yangu anatupwa nje kama tawi na kukauka. Watu huyakusanya matawi hayo, huyatupa motoni, nayo huungua. 7Mkikaa ndani yangu na maneno yangu yakakaa ndani yenu, ombeni chochote mnachotaka, nanyi mtafanyiwa. 8Hivi ndivyo Baba yangu anavyotukuzwa: mzae matunda mengi, na hivyo mthibitike kuwa wanafunzi wangu. 9Nimewapenda kama vile Baba alivyonipenda. Kaeni katika upendo wangu. 10Mtakaa katika upendo wangu mkizishika amri zangu, kama vile nimezishika amri ambazo Baba yangu alinipa, na ninakaa katika upendo wake. 11Nimewaambia haya ili furaha yangu iwe ndani yenu, na furaha yenu iwe kamili.

12Amri yangu ni hii: pendaneni kwa namna ile ile niliyowapenda. 13Hakuna aliye na upendo unaozidi huu: mtu kuyatoa maisha yake kwa ajili ya rafiki zake. 14Ninyi ni rafiki zangu mkitekeleza ninayowaamuru. 15Siwaiti tena watumishi, kwa kuwa mtumishi hajui bwana wake anachofanya. Badala yake nimewaita rafiki, kwa sababu nimewajulisha kila kitu nilichosikia kutoka kwa Baba yangu. 16Hamkunichagua mimi; mimi niliwachagua ninyi. Niliwateua kwa ajili ya hili: mwende mkazae matunda, na matunda yenu yakae, ili Baba awape chochote mtakachomwomba kwa jina langu. 17Nawapa amri hizi ili mpendane.

18Ulimwengu ukiwachukia, jueni kwamba ulinichukia mimi kwanza, kabla yenu. 19Kama mngekuwa mali ya ulimwengu, ulimwengu ungewapenda kama walio wake. Lakini ninyi si wa ulimwengu; niliwachagua kutoka katika ulimwengu, na ndiyo sababu ulimwengu unawachukia. 20Kumbukeni neno nililowaambia: ‘Mtumishi hamzidi bwana wake.’ Ikiwa wamenitesa mimi, watawatesa ninyi pia. Ikiwa wamelishika neno langu, watalishika na lenu pia. 21Lakini haya yote watawatendea kwa sababu ya jina langu, kwa sababu hawamjui yule aliyenituma. 22Kama nisingekuja na kuzungumza nao, wasingekuwa na dhambi. Lakini ilivyo sasa, hawana kisingizio kwa dhambi yao. 23Yeyote anayenichukia mimi anamchukia Baba yangu vilevile. 24Kama nisingefanya miongoni mwao kazi ambazo hakuna mwingine amefanya, wasingekuwa na dhambi. Lakini ilivyo sasa, wameona, na wamechukia, mimi na Baba yangu pia. 25Lakini hili limetokea ili litimie neno lililoandikwa katika sheria yao: ‘Walinichukia bila sababu.’

26Mtetezi, ambaye nitamtuma kwenu kutoka kwa Baba, ndiye Roho wa kweli, anayetoka kwa Baba. Atakapokuja, yeye atashuhudia kuhusu mimi. 27Nanyi pia mnashuhudia kuhusu mimi, kwa sababu mmekuwa pamoja nami tangu mwanzo.