2 Wafalme 1

1Baada ya Ahabu kufa, Moabu waliasi dhidi ya Israeli. 2Ahazia alianguka kupitia kimiani cha chumba chake cha ghorofani huko Samaria, akaumia. Basi akatuma wajumbe, akawaambia, “Nendeni mkamwulize Baal-zebubu, mungu wa Ekroni, kama nitapona jeraha hili.”

3Lakini malaika wa BWANA alimwambia Eliya Mtishbi, “Ondoka uende kuwalaki wajumbe wa mfalme wa Samaria. Uwaambie, ‘Je, mnakwenda kumwuliza Baal-zebubu, mungu wa Ekroni, kwa sababu hakuna Mungu katika Israeli? 4Kwa hiyo, hivi ndivyo BWANA asemavyo: Hutashuka kutoka kitanda ulichokipanda; hakika utakufa.’” Basi Eliya akaenda. 5Wajumbe waliporudi kwa mfalme, aliwauliza, “Mbona mmerudi?” 6Wakamjibu, “Mtu mmoja alipanda kuja kutulaki. Akasema, ‘Rudini kwa mfalme aliyewatuma, mkamwambie, Hivi ndivyo BWANA asemavyo: Je, unatuma watu kwenda kumwuliza Baal-zebubu, mungu wa Ekroni, kwa sababu hakuna Mungu katika Israeli? Kwa sababu hiyo hutashuka kutoka kitanda ulichokipanda; hakika utakufa.’” 7Akawauliza, “Yule mtu aliyekuja kuwalaki na kuwaambia mambo haya alikuwa mtu wa namna gani?” 8Wakamjibu, “Alikuwa mtu mwenye nywele nyingi, naye amejifunga mshipi wa ngozi kiunoni.” Mfalme akasema, “Huyo ni Eliya Mtishbi.” 9Kisha mfalme alimtuma kwa Eliya mkuu wa kikosi cha watu hamsini pamoja na watu wake hamsini. Mkuu huyo akapanda kwake, akamkuta ameketi juu ya kilele cha kilima. Akamwita, “Mtu wa Mungu, mfalme anasema, ‘Shuka!’” 10Eliya akamjibu yule mkuu wa hamsini, “Ikiwa mimi ni mtu wa Mungu, moto na ushuke kutoka mbinguni ukumeze wewe na watu wako hamsini!” Ndipo moto ukashuka kutoka mbinguni, ukamteketeza yeye na watu wake hamsini. 11Mfalme alimtuma kwake mkuu mwingine wa kikosi cha watu hamsini pamoja na watu wake hamsini. Huyu naye akasema, “Mtu wa Mungu, hivi ndivyo mfalme asemavyo: Shuka mara moja!” 12Eliya akawajibu, “Ikiwa mimi ni mtu wa Mungu, moto na ushuke kutoka mbinguni ukumeze wewe na watu wako hamsini!” Ndipo moto wa Mungu ukaanguka kutoka mbinguni, ukamteketeza yeye na watu wake hamsini. 13Kisha mfalme alimtuma mkuu wa tatu wa kikosi cha watu hamsini pamoja na watu wake hamsini. Mkuu huyo wa tatu akapanda, akapiga magoti mbele ya Eliya, akamsihi, “Mtu wa Mungu, tafadhali, uhai wangu na uhai wa hawa watumishi wako hamsini uwe na thamani kwako. 14Moto umeshuka kutoka mbinguni ukawateketeza wakuu wawili wa kwanza wa vikosi vya hamsini pamoja na watu wao. Lakini sasa uhai wangu na uwe na thamani kwako.”

15Malaika wa BWANA alimwambia Eliya, “Shuka pamoja naye, wala usimwogope.” Basi Eliya akainuka, akashuka pamoja naye kwa mfalme. 16Eliya akamwambia mfalme, “Hivi ndivyo BWANA asemavyo: Ulituma wajumbe kwenda kumwuliza Baal-zebubu, mungu wa Ekroni. Je, ulifanya hivyo kwa sababu hakuna Mungu katika Israeli ambaye ungeweza kumtafuta akupe neno? Kwa kuwa umefanya hivi, hutashuka kutoka kitanda ulichokipanda; hakika utakufa.” 17Basi Ahazia akafa, sawasawa na neno la BWANA alilokuwa amelisema Eliya. Kwa kuwa Ahazia hakuwa na mwana, Yehoramu akawa mfalme mahali pake, katika mwaka wa pili wa Yehoramu mwana wa Yehoshafati mfalme wa Yuda. 18Mambo mengine ya Ahazia, aliyoyafanya, yameandikwa katika Kitabu cha Historia ya Wafalme wa Israeli.