2 Wafalme 5

1Naamani alikuwa mkuu wa jeshi la mfalme wa Aramu. Bwana wake alimwona kuwa mtu mkuu na kumheshimu sana, kwa sababu kupitia yeye BWANA alikuwa amewapa Aramu ushindi. Alikuwa shujaa hodari, lakini alikuwa na ugonjwa mbaya wa ngozi. 2Vikosi vya uvamizi vya Waaramu vilikuwa vimetoka, vikachukua mateka msichana mdogo kutoka nchi ya Israeli, naye akamtumikia mke wa Naamani. 3Akamwambia bibi yake, “Laiti bwana wangu angesimama mbele ya nabii aliye Samaria! Angemwondolea ugonjwa wake wa ngozi.” 4Naamani akaingia, akamweleza bwana wake, “Hivi ndivyo alivyosema yule msichana kutoka nchi ya Israeli.” 5Mfalme wa Aramu akasema, “Nenda sasa hivi, nami nitampelekea mfalme wa Israeli barua.” Basi Naamani akaondoka, akachukua pamoja naye karibu kilo 340 za fedha, karibu kilo 69 za dhahabu na mavazi kumi ya fahari. 6Akaipeleka barua kwa mfalme wa Israeli. Ilisema, “Pamoja na barua hii ninakutumia mtumishi wangu Naamani, ili umwondolee ugonjwa wake wa ngozi.” 7Mfalme wa Israeli aliposoma barua, mara akararua mavazi yake. Akasema, “Je, mimi ni Mungu, niue na kuhuisha, hata mtu huyu ananitumia mtu ili aondolewe ugonjwa wake wa ngozi? Fikirini, mwone: anatafuta sababu ya kugombana nami.” 8Elisha mtu wa Mungu alisikia kwamba mfalme wa Israeli amerarua mavazi yake, akampelekea mfalme ujumbe huu: “Kwa nini umerarua mavazi yako? Mtu huyo na aje kwangu, naye atatambua kwamba Israeli ina nabii.” 9Basi Naamani akaja na farasi wake na gari lake, akasimama mlangoni pa nyumba ya Elisha. 10Elisha akamtumia mjumbe kumwambia, “Nenda ukaoge mara saba katika Yordani. Mwili wako utarudishwa kuwa mzima, nawe utakuwa safi.” 11Lakini Naamani akaondoka akiwa amekasirika. Akasema, “Nilidhani kwamba hakika angetoka kwangu, asimame na kuliitia jina la BWANA Mungu wake, apunge mkono wake juu ya mahali pale, na kuniondolea ugonjwa huu. 12Je, mito ya Dameski, Abana na Farpari, si bora kuliko maji yoyote ya Israeli? Je, nisingeweza kuoga humo nikatakaswa?” Kisha akageuka, akaondoka kwa ghadhabu. 13Watumishi wake wakamkaribia, wakasema, “Baba yangu, kama nabii angekuambia ufanye jambo kubwa, je, usingelifanya? Basi zaidi sana sasa, anapokuambia tu, ‘Oga uwe safi’!” 14Basi akashuka, akajichovya mara saba katika Yordani, kama mtu wa Mungu alivyosema. Mwili wake ukarudishwa ukawa kama mwili wa mvulana mdogo, naye akawa safi. 15Kisha akarudi kwa mtu wa Mungu pamoja na msafara wake wote. Akaja, akasimama mbele yake, akasema, “Sasa najua kwamba katika dunia yote hakuna Mungu isipokuwa katika Israeli. Basi sasa, tafadhali pokea zawadi kutoka kwa mtumishi wako.” 16Lakini Elisha akasema, “Kama BWANA aishivyo, ninayemtumikia, sitapokea kitu.” Naamani akamsisitiza apokee, lakini akakataa. 17Kisha Naamani akasema, “Kama sivyo, basi tafadhali mtumishi wako apewe udongo, kiasi ambacho nyumbu wawili wanaweza kubeba, kwa sababu mtumishi wako hatatoa tena kamwe sadaka ya kuteketezwa wala dhabihu kwa miungu mingine, ila kwa BWANA tu. 18Lakini katika jambo moja BWANA amsamehe mtumishi wako: bwana wangu anapoingia katika hekalu la Rimoni kusujudu huko, huegemea mkono wangu, nami pia hulazimika kusujudu katika hekalu la Rimoni. Ninaposujudu katika hekalu la Rimoni, BWANA amsamehe mtumishi wako katika jambo hili.” 19Elisha akamwambia, “Nenda kwa amani.” Basi Naamani akaondoka kwake, akaenda umbali fulani.

20Gehazi, mtumishi wa Elisha mtu wa Mungu, akasema moyoni mwake, “Bwana wangu amemwachilia huyu Mwaramu Naamani bila kupokea chochote katika vitu alivyoleta. Kama BWANA aishivyo, nitamkimbilia nichukue kitu kutoka kwake.” 21Basi Gehazi akamfuata Naamani mbio. Naamani alipoona mtu anapiga mbio kumfuata, alishuka kutoka garini mwake kumlaki, akamwuliza, “Je, ni salama?” 22Akajibu, “Ni salama. Bwana wangu amenituma kusema, ‘Vijana wawili wa kundi la manabii wamewasili sasa hivi kutoka nchi ya milima ya Efraimu. Tafadhali wape karibu kilo 34 za fedha na mavazi mawili.’” 23Naamani akasema, “Tafadhali chukua karibu kilo 68.” Akamsisitiza Gehazi azichukue, akafunga karibu kilo 68 za fedha katika mifuko miwili, pamoja na mavazi mawili. Akawapa watumishi wake wawili, nao wakavibeba mbele ya Gehazi. 24Gehazi alipofika kilimani, alivichukua vitu hivyo kutoka kwao, akaviweka ndani ya nyumba. Kisha akawaaga watu hao, nao wakaondoka. 25Kisha akaingia, akasimama mbele ya bwana wake. Elisha akamwuliza, “Ulikuwa wapi, Gehazi?” Akasema, “Mtumishi wako hakwenda popote.” 26Lakini Elisha akamwambia, “Je, moyo wangu haukuwa pamoja nawe mtu yule alipogeuka kutoka garini mwake kukulaki? Je, huu ni wakati wa kupokea fedha na mavazi, mashamba ya mizeituni na mashamba ya mizabibu, kondoo na ng’ombe, watumwa wa kiume na watumwa wa kike? 27Kwa hiyo ugonjwa wa ngozi wa Naamani utakushika wewe na wazao wako milele.” Gehazi akatoka mbele yake akiwa na ugonjwa mbaya wa ngozi, mweupe kama theluji.