2 Wafalme 3

1Katika mwaka wa kumi na nane wa Yehoshafati mfalme wa Yuda, Yehoramu mwana wa Ahabu alianza kutawala juu ya Israeli huko Samaria, akatawala miaka kumi na miwili. 2Alifanya maovu machoni pa BWANA, ingawa si kama baba yake na mama yake. Aliiondoa nguzo ya mawe ya Baali ambayo baba yake alikuwa ameifanya. 3Hata hivyo aliendelea kushikamana na dhambi za Yeroboamu mwana wa Nebati, alizowafanya Israeli kutenda; hakuziacha.

4Mesha mfalme wa Moabu alifuga kondoo, naye alikuwa akimlipa mfalme wa Israeli wana-kondoo 100,000 na manyoya ya kondoo dume 100,000. 5Lakini Ahabu alipokufa, mfalme wa Moabu aliasi dhidi ya mfalme wa Israeli. 6Basi wakati huo mfalme Yehoramu alitoka Samaria, akawakusanya Israeli wote. 7Pia alituma ujumbe kwa Yehoshafati mfalme wa Yuda, akasema, “Mfalme wa Moabu ameasi dhidi yangu. Je, utaungana nami kupigana na Moabu?” Yehoshafati akajibu, “Nitakwenda. Mimi ni kama wewe, askari wangu ni kama askari wako, farasi wangu kama farasi wako.” 8Kisha akauliza, “Tushambulie kwa njia ipi?” Akajibu, “Kwa njia ya jangwa la Edomu.” 9Basi mfalme wa Israeli aliondoka pamoja na mfalme wa Yuda na mfalme wa Edomu. Baada ya kuzunguka kwa siku saba, hapakuwa na maji yaliyobaki kwa ajili ya jeshi wala kwa ajili ya wanyama waliowafuata. 10Mfalme wa Israeli akasema, “Ni msiba ulioje! BWANA amewaita wafalme hawa watatu pamoja ili awatie mikononi mwa Moabu.” 11Lakini Yehoshafati akauliza, “Je, hakuna nabii wa BWANA hapa, ambaye kupitia yeye tunaweza kumwuliza BWANA?” Mmoja wa maafisa wa mfalme wa Israeli akajibu, “Elisha mwana wa Shafati yuko hapa, yule aliyekuwa akimimina maji mikononi mwa Eliya.” 12Yehoshafati akasema, “Neno la BWANA liko pamoja naye.” Basi mfalme wa Israeli akashuka kwake, pamoja na Yehoshafati na mfalme wa Edomu. 13Elisha akamwambia mfalme wa Israeli, “Mimi na wewe tuna uhusiano gani? Nenda kwa manabii wa baba yako na manabii wa mama yako.” Lakini mfalme wa Israeli akamwambia, “Hapana, kwa maana BWANA amewaita wafalme hawa watatu pamoja ili awatie mikononi mwa Moabu.” 14Elisha akasema, “Kama BWANA wa majeshi aishivyo, ninayemtumikia, kama nisingemheshimu Yehoshafati mfalme wa Yuda, nisingekutazama wala hata kukujali. 15Lakini sasa niletee mpiga kinanda.” Mpiga kinanda alipokuwa akipiga, mkono wa BWANA ukamjia Elisha. 16Kisha akasema, “Hivi ndivyo BWANA asemavyo: ‘Chimbeni mahandaki mengi katika bonde hili la kijito.’ 17Kwa maana hivi ndivyo BWANA asemavyo: ‘Hamtaona upepo wala mvua, lakini bonde lile la kijito litajaa maji, nanyi mtakunywa, ninyi na mifugo yenu na wanyama wenu wa kubeba mizigo.’ 18Hili ni jambo dogo tu machoni pa BWANA; naye atawatia Wamoabu mikononi mwenu pia. 19Mtashinda kila mji wenye ngome na kila mji mkubwa. Mtaukata kila mti mzuri, mtaziba kila chemchemi ya maji, na kuharibu kila shamba zuri kwa mawe.” 20Asubuhi iliyofuata, karibu na wakati wa sadaka ya asubuhi, ghafula maji yakaja yakitiririka kutoka upande wa Edomu, nayo nchi ikajaa maji. 21Wakati huo Wamoabu wote walikuwa wamesikia kwamba wafalme wamekuja kupigana nao. Kila mtu aliyefikia umri wa kujifunga mshipi wa upanga, na wazee zaidi, aliitwa, nao wakashika nafasi zao mpakani. 22Asubuhi na mapema waliamka, na jua lilikuwa likiangaza juu ya maji. Kwa Wamoabu waliokuwa wakiyaelekea, maji yalionekana mekundu kama damu. 23Wakasema, “Hii ni damu! Lazima wafalme wamepigana wao kwa wao na kuuana. Sasa, Moabu, twendeni tukateke nyara!” 24Lakini Wamoabu walipofika kwenye kambi ya Israeli, Waisraeli waliinuka ghafula, wakawashambulia, nao wakakimbia. Waisraeli wakaingia ndani ya nchi, wakiwaua Wamoabu. 25Wakaibomoa miji, na kila mtu akatupa jiwe juu ya kila shamba zuri mpaka likafunikwa. Wakaziba kila chemchemi ya maji na kukata kila mti mzuri. Mwishowe Kir-haresethi tu ndio uliobaki na mawe yake yamesimama, nao wapiga kombeo wakauzunguka, wakaushambulia. 26Mfalme wa Moabu alipoona kwamba vita vinamwendea vibaya, alichukua pamoja naye wapiga upanga 700 ili wajaribu kupenya mpaka kwa mfalme wa Edomu, lakini walishindwa. 27Kisha akamchukua mwanawe mzaliwa wa kwanza, ambaye angekuwa mfalme baada yake, akamtoa kuwa sadaka ya kuteketezwa juu ya ukuta. Ndipo ghadhabu kuu ikaja juu ya Israeli, nao wakaondoka kutoka kwake, wakarudi katika nchi yao wenyewe.