2 Wafalme 18

1Katika mwaka wa tatu wa Hoshea mwana wa Ela mfalme wa Israeli, Hezekia mwana wa Ahazi mfalme wa Yuda alianza kutawala. 2Alikuwa na umri wa miaka ishirini na mitano alipoanza kutawala, naye akatawala miaka ishirini na tisa huko Yerusalemu. Mama yake aliitwa Abi binti Zekaria. 3Alifanya yaliyo sawa machoni pa BWANA, katika kila jambo kama babu yake Daudi alivyofanya. 4Aliondoa mahali pa juu, akazivunja nguzo za mawe na kuukata mti wa Ashera. Pia aliivunjavunja nyoka ya shaba aliyoifanya Musa, kwa sababu mpaka wakati huo Waisraeli walikuwa wakiifukizia uvumba. Iliitwa Nehushtani. 5Alimtumaini BWANA, Mungu wa Israeli. Katika wafalme wote wa Yuda hapakuwa na mwingine kama yeye, wala baada yake wala kati ya wale waliomtangulia. 6Alishikamana na BWANA, wala hakugeuka kuacha kumfuata. Alizishika amri ambazo BWANA alikuwa amempa Musa. 7BWANA alikuwa pamoja naye, naye akafanikiwa katika kila jambo alilokusudia kufanya. Alimwasi mfalme wa Ashuru, wala hakukubali kumtumikia. 8Aliwashinda Wafilisti mpaka Gaza na eneo lake, tangu mnara wa walinzi mpaka mji wenye ngome.

9Katika mwaka wa nne wa mfalme Hezekia, ambao ulikuwa mwaka wa saba wa Hoshea mwana wa Ela mfalme wa Israeli, Shalmaneseri mfalme wa Ashuru aliishambulia Samaria, akauzingira. 10Mwisho wa miaka mitatu waliuteka. Samaria ulitekwa katika mwaka wa sita wa Hezekia, ambao ulikuwa mwaka wa tisa wa Hoshea mfalme wa Israeli. 11Mfalme wa Ashuru aliwachukua Waisraeli uhamishoni mpaka Ashuru. Akawapeleka waishi katika Hala, kando ya Habori, mto wa Gozani, na katika miji ya Wamedi. 12Hayo yalitokea kwa sababu hawakuitii sauti ya BWANA Mungu wao, bali walilivunja agano lake, kila kitu alichoamuru Musa mtumishi wa BWANA. Hawakutaka kusikiliza wala kutenda.

13Katika mwaka wa kumi na nne wa mfalme Hezekia, Senakeribu mfalme wa Ashuru aliishambulia miji yote yenye ngome ya Yuda, akaiteka. 14Kisha Hezekia mfalme wa Yuda alituma ujumbe huko Lakishi kwa mfalme wa Ashuru: “Nimekosa. Ondoka kwangu, nami nitabeba lolote utakaloniwekea.” Mfalme wa Ashuru akamtaka Hezekia mfalme wa Yuda alipe karibu tani 10 za fedha na karibu kilo 1,000 za dhahabu. 15Hezekia alimkabidhi fedha yote iliyopatikana katika nyumba ya BWANA na katika hazina za ikulu. 16Wakati huo Hezekia aliibandua dhahabu kutoka kwenye milango ya hekalu la BWANA na kwenye miimo ambayo yeye, Hezekia mfalme wa Yuda, alikuwa ameifunika kwa dhahabu hiyo, akampa mfalme wa Ashuru.

17Kisha mfalme wa Ashuru alimtuma jemadari mkuu, mkuu wa maafisa wa ikulu na Rabshake kutoka Lakishi kwa mfalme Hezekia huko Yerusalemu, pamoja na jeshi kubwa. Wakapanda, wakafika Yerusalemu. Walipofika, wakasimama karibu na mfereji wa maji wa Bwawa la Juu, ulio katika njia ya kwenda Shamba la Dobi. 18Walimwita mfalme, naye Eliakimu mwana wa Hilkia, msimamizi wa ikulu, akatoka kwenda kwao, pamoja na Shebna katibu na Yoa mwana wa Asafu, mwandishi wa kumbukumbu. 19Kisha Rabshake akawaambia, “Mwambieni Hezekia, ‘Mfalme mkuu, mfalme wa Ashuru, asema hivi: Ni tumaini la namna gani hili unalolitegemea? 20Unadai kuwa una mpango na nguvu za vita, lakini hayo ni maneno matupu tu. Ni nani unayemtegemea hata ukaniasi? 21Sasa tazama, unaitegemea Misri, mwanzi huu uliopasuka unaoutumia kama fimbo. Mtu yeyote akiuegemea, utamchoma mkono na kuutoboa. Ndivyo Farao mfalme wa Misri alivyo kwa wote wanaomtegemea. 22Au mkiniambia, ‘Tumaini letu liko kwa BWANA Mungu wetu,’ je, Hezekia hakuondoa mahali pake pa juu na madhabahu zake? Je, hakuwaambia Yuda na Yerusalemu, ‘Mnapaswa kusujudu mbele ya madhabahu hii huko Yerusalemu’? 23Basi njoo, weka dau na bwana wangu mfalme wa Ashuru. Nitakupa farasi 2,000, kama unaweza kupata watu wa kuwapanda! 24Basi utawezaje kumrudisha nyuma hata liwali mmoja, mmoja wa maafisa wadogo kabisa wa bwana wangu? Hata hivyo unaitumainia Misri ikupe magari ya vita na wapanda farasi! 25Sasa, je, nimepanda kushambulia mahali hapa ili kupaharibu bila BWANA? Ni BWANA mwenyewe aliyeniambia, ‘Panda uishambulie nchi hii, uiharibu.’” 26Eliakimu mwana wa Hilkia, Shebna na Yoa wakamwambia Rabshake, “Tafadhali, sema na watumishi wako kwa Kiaramu, kwa sababu tunakijua. Usiseme nasi kwa lugha ya Yuda, watu walio juu ya ukuta wakisikia.” 27Lakini Rabshake akawajibu, “Je, bwana wangu amenituma niseme maneno haya kwako na kwa bwana wako tu? Hapana, ni kwa ajili ya watu wanaoketi juu ya ukuta, ambao watakula mavi yao wenyewe na kunywa mkojo wao wenyewe pamoja nanyi!” 28Kisha Rabshake akasimama, akapaza sauti kwa lugha ya Yuda: “Sikilizeni neno la mfalme mkuu, mfalme wa Ashuru! 29Mfalme asema hivi: ‘Msikubali Hezekia awadanganye. Hana uwezo wa kuwaokoa kutoka mkononi mwa mfalme. 30Wala msikubali Hezekia awafanye mmtegemee BWANA anapowaambia, “Hakika BWANA atatuokoa. Mji huu hautatiwa kamwe mikononi mwa mfalme wa Ashuru.”’ 31Msimsikilize Hezekia. Mfalme wa Ashuru asema hivi: ‘Fanyeni mapatano nami, mjisalimishe kwangu. Ndipo kila mmoja atakula matunda ya mzabibu wake na ya mtini wake, na kunywa maji ya kisima chake mwenyewe, 32mpaka nitakapokuja kuwahamishia katika nchi iliyo kama nchi yenu, nchi ya nafaka na divai mpya, ya mkate na mashamba ya mizabibu, ya mafuta ya mizeituni na asali. Ndipo mtaishi wala hamtakufa. Msimsikilize Hezekia, kwa maana anawapotosha anaposema, “BWANA atatuokoa.” 33Je, kuna mungu yeyote wa mataifa aliyewahi kuiokoa nchi yake kutoka mkononi mwa mfalme wa Ashuru? 34Iko wapi miungu ya Hamathi na Arpadi? Iko wapi miungu ya Sefarvaimu, Hena na Iva? Je, iliiokoa Samaria kutoka mkononi mwangu? 35Miongoni mwa miungu yote ya nchi hizi, ni ipi iliyoiokoa nchi yake kutoka mkononi mwangu, hata BWANA aiokoe Yerusalemu kutoka kwangu?’” 36Watu walinyamaza kimya, wala hawakumjibu hata neno moja, kwa sababu mfalme alikuwa ametoa amri: “Msimjibu.” 37Kisha Eliakimu mwana wa Hilkia, msimamizi wa ikulu, Shebna katibu, na Yoa mwana wa Asafu, mwandishi wa kumbukumbu, walikwenda kwa Hezekia wakiwa wameyararua mavazi yao, wakamweleza yale aliyosema Rabshake.