2 Wafalme 20

1Siku hizo Hezekia aliugua, akakaribia kufa. Nabii Isaya mwana wa Amozi akaja kwake, akamwambia, “Hivi ndivyo BWANA asemavyo: Toa maagizo yako ya mwisho kwa watu wa nyumba yako, kwa maana unakufa, wala hutapona.” 2Hezekia aligeuza uso wake kuelekea ukutani, akamwomba BWANA: 3“Tafadhali, Ee BWANA, kumbuka jinsi nilivyoishi mbele yako kwa uaminifu na kwa moyo usiogawanyika, nikifanya yaliyo mema machoni pako.” Naye Hezekia akalia kwa sauti kubwa.

4Isaya alikuwa bado hajatoka katika ua wa kati, neno la BWANA likamjia: 5“Rudi ukamwambie Hezekia, kiongozi wa watu wangu, ‘BWANA, Mungu wa babu yako Daudi, asema hivi: Nimeyasikia maombi yako; nimeyaona machozi yako. Nitakuponya, na siku ya tatu utapanda kwenda nyumba ya BWANA. 6Nitakuongezea miaka kumi na mitano ya kuishi. Nitakuokoa wewe na mji huu kutoka katika makucha ya mfalme wa Ashuru, nami nitaukinga mji huu kwa ajili yangu mwenyewe na kwa ajili ya mtumishi wangu Daudi.’” 7Kisha Isaya akasema, “Leteni donge la tini zilizoshindiliwa.” Wakalileta, wakalipaka juu ya jipu, naye akapona. 8Hezekia alikuwa amemwuliza Isaya, “Kutakuwa na ishara gani kwamba BWANA ataniponya, na kwamba siku ya tatu nitapanda kwenda nyumba ya BWANA?” 9Isaya akajibu, “Hii itakuwa ishara yako kutoka kwa BWANA kwamba BWANA atalitimiza alilosema: Je, kivuli kiende mbele hatua kumi, au kirudi nyuma hatua kumi?” 10Hezekia akajibu, “Ni rahisi kivuli kurefuka hatua kumi. Sivyo, kivuli kirudi nyuma hatua kumi.” 11Kisha nabii Isaya akamlilia BWANA, naye akakifanya kivuli kirudi nyuma hatua kumi, kipande juu ya ngazi za Ahazi kilizokuwa kimeshuka.

12Karibu wakati huo Berodaki-baladani mwana wa Baladani, mfalme wa Babeli, alimtumia Hezekia barua na zawadi, kwa sababu alikuwa amesikia kwamba Hezekia alikuwa mgonjwa. 13Hezekia aliwasikiliza, akawaonyesha nyumba yake yote ya hazina: fedha na dhahabu, manukato na mafuta mazuri, ghala lake la silaha, na kila kitu kilichokuwa katika ghala zake. Katika ikulu yake na katika ufalme wake wote hakukuwa na kitu ambacho hakuwaonyesha. 14Kisha nabii Isaya alikuja kwa mfalme Hezekia, akamwuliza, “Watu hawa walisema nini? Na wametoka wapi kuja kukutembelea?” Hezekia akajibu, “Walitoka nchi ya mbali, kutoka Babeli.” 15Akauliza, “Waliona nini katika ikulu yako?” Hezekia akajibu, “Waliona vyote vilivyomo katika ikulu yangu. Hakuna kitu katika ghala zangu ambacho sikuwaonyesha.” 16Kisha Isaya akamwambia Hezekia, “Sikiliza neno la BWANA: 17Tazama, wakati unakuja ambapo vyote vilivyomo katika ikulu yako, kila kitu ambacho babu zako wameweka akiba mpaka leo, vitachukuliwa mpaka Babeli. Hakitabaki hata kitu kimoja, asema BWANA. 18Baadhi ya wazao wako, watakaozaliwa katika ukoo wako mwenyewe, watachukuliwa, nao watakuwa matowashi katika jumba la mfalme wa Babeli.” 19Hezekia akamjibu Isaya, “Neno hili la BWANA ulilolileta ni jema.” Kwa maana alikuwa akiwaza, “Je, si jema, ikiwa kutakuwa na amani na uthabiti maadamu ningali hai?” 20Mambo mengine ya Hezekia, nguvu zake zote, na bwawa na mfereji alioufanya kuleta maji ndani ya mji, yameandikwa katika Kitabu cha Historia ya Wafalme wa Yuda. 21Kisha Hezekia alipumzika pamoja na babu zake, na mwanawe Manase akawa mfalme mahali pake.