2 Wafalme 21

1Manase alikuwa na umri wa miaka kumi na miwili alipoanza kutawala, naye akatawala miaka hamsini na mitano huko Yerusalemu. Mama yake aliitwa Hefsiba. 2Alifanya maovu machoni pa BWANA, akifuata desturi za kuchukiza za mataifa ambayo BWANA aliyafukuza mbele ya Waisraeli. 3Alijenga upya mahali pa juu ambapo baba yake Hezekia alipaharibu. Akamjengea Baali madhabahu, akafanya mti wa Ashera, kama Ahabu mfalme wa Israeli alivyofanya. Akalisujudia jeshi lote la mbinguni na kulitumikia. 4Alijenga madhabahu katika nyumba ya BWANA, nyumba ambayo BWANA alikuwa amesema habari zake, “Katika Yerusalemu nitaliweka jina langu.” 5Alilijengea jeshi lote la mbinguni madhabahu katika nyua mbili za nyumba ya BWANA. 6Alimpitisha mwanawe motoni, akabashiri na kutazama ishara, akawaendea wanaowaita wafu na wapiga ramli. Alizidi kufanya maovu machoni pa BWANA, akamkasirisha. 7Aliweka sanamu ya kuchonga ya Ashera aliyoifanya ndani ya nyumba ambayo BWANA alikuwa amemwambia Daudi na mwanawe Sulemani habari zake, “Katika nyumba hii, na katika Yerusalemu, mji niliouchagua katikati ya makabila yote ya Israeli, nitaliweka jina langu milele. 8Wala sitaifanya tena miguu ya Israeli itangetange kutoka katika nchi niliyowapa babu zao, ikiwa tu watakuwa waangalifu kufanya yote niliyowaamuru, sheria yote aliyowaamuru mtumishi wangu Musa.” 9Lakini hawakusikiliza. Manase aliwapotosha, hata wakafanya maovu zaidi kuliko mataifa ambayo BWANA aliyaangamiza mbele ya Waisraeli. 10BWANA alisema kupitia watumishi wake manabii, akisema, 11“Kwa kuwa Manase mfalme wa Yuda amefanya mambo haya ya kuchukiza, akifanya maovu kuliko yote waliyoyafanya Waamori waliomtangulia, naye amewafanya Yuda pia watende dhambi kwa sanamu zake,

12kwa hiyo BWANA, Mungu wa Israeli, asema hivi: Tazama, ninakaribia kuleta juu ya Yerusalemu na Yuda maafa makubwa hata masikio yote mawili ya kila atakayeyasikia yatawasha. 13Nitanyoosha juu ya Yerusalemu kamba ya kupimia iliyotumika juu ya Samaria na timazi iliyotumika juu ya nyumba ya Ahabu. Nitaifuta Yerusalemu kabisa kama mtu afutavyo sahani, akaifuta na kuipindua. 14Nitawaacha wale waliobaki wa watu wangu mwenyewe na kuwatia mikononi mwa adui zao, nao watakuwa mawindo na nyara kwa adui zao wote, 15kwa sababu wamefanya yaliyo maovu machoni pangu, nao wameendelea kunikasirisha tangu siku babu zao walipotoka Misri mpaka leo.” 16Manase pia alimwaga damu isiyo na hatia nyingi sana hata akaijaza Yerusalemu kutoka mwisho mmoja hadi mwingine. Hiyo ilikuwa mbali na dhambi aliyowaongoza Yuda kuitenda, hata wakafanya maovu machoni pa BWANA. 17Mambo mengine ya Manase, yote aliyoyafanya na dhambi aliyoitenda, yameandikwa katika Kitabu cha Historia ya Wafalme wa Yuda. 18Kisha Manase alipumzika pamoja na babu zake, akazikwa katika bustani ya ikulu yake, bustani ya Uza. Na mwanawe Amoni akawa mfalme mahali pake.

19Amoni alikuwa na umri wa miaka ishirini na miwili alipoanza kutawala, naye akatawala miaka miwili huko Yerusalemu. Mama yake aliitwa Meshulemethi binti Haruzi, wa Yotba. 20Alifanya maovu machoni pa BWANA, kama baba yake Manase alivyofanya. 21Aliifuata kila njia aliyoifuata baba yake. Alizitumikia sanamu alizozitumikia baba yake, akazisujudia. 22Alimwacha BWANA, Mungu wa babu zake, wala hakuenenda katika njia ya BWANA. 23Maafisa wa Amoni walifanya njama dhidi yake, wakamwua mfalme ndani ya ikulu yake. 24Kisha watu wa nchi wakawaua wote waliokuwa wamefanya njama dhidi ya mfalme Amoni, nao watu wa nchi wakamtawaza mwanawe Yosia kuwa mfalme mahali pake. 25Mambo mengine ya Amoni, aliyoyafanya, yameandikwa katika Kitabu cha Historia ya Wafalme wa Yuda. 26Amoni alilazwa katika kaburi lake katika bustani ya Uza, na mwanawe Yosia akawa mfalme mahali pake.