2 Wafalme 14

1Katika mwaka wa pili wa Yoashi mwana wa Yehoahazi mfalme wa Israeli, Amazia mwana wa Yoashi alianza kutawala Yuda. 2Alikuwa na umri wa miaka ishirini na mitano alipoanza kutawala, naye akatawala miaka ishirini na tisa huko Yerusalemu. Mama yake aliitwa Yehoadini; alikuwa wa Yerusalemu. 3Alifanya yaliyo sawa machoni pa BWANA, lakini si kama babu yake Daudi alivyofanya. Alifanya kila kitu kama baba yake Yoashi alivyofanya. 4Lakini mahali pa juu hapakuondolewa; watu waliendelea kutoa dhabihu na kufukiza uvumba mahali pa juu. 5Mara ufalme ulipokuwa imara chini ya mamlaka yake, aliwaua maafisa wale waliomwua baba yake mfalme. 6Lakini hakuwaua watoto wa wauaji hao. Katika hilo alishika kitabu cha Sheria ya Musa, ambamo BWANA aliamuru, “Wazazi wasiuawe kwa ajili ya watoto wao, wala watoto wasiuawe kwa ajili ya wazazi wao. Kila mtu atauawa kwa ajili ya dhambi yake mwenyewe tu.” 7Aliwashinda Waedomu katika Bonde la Chumvi, watu 10,000 kati yao, akauteka mji wa Sela vitani. Akauita Yoktheeli, nao unaitwa hivyo mpaka leo.

8Kisha Amazia alituma wajumbe kwa Yehoashi mwana wa Yehoahazi mwana wa Yehu, mfalme wa Israeli, kumwambia, “Njoo, tukutane uso kwa uso.” 9Yehoashi mfalme wa Israeli akamjibu Amazia mfalme wa Yuda: “Mbigili mmoja huko Lebanoni ulituma ujumbe kwa mwerezi huko Lebanoni: ‘Mpe mwanangu binti yako awe mke wake.’ Kisha mnyama wa mwituni wa Lebanoni akapita, akaukanyaga mbigili huo. 10Kweli umewashinda Waedomu, na sasa moyo wako umekufanya ujivune. Furahia utukufu wako, lakini kaa nyumbani. Kwa nini kuchochea taabu itakayokuangusha tu, wewe na Yuda pamoja nawe?” 11Lakini Amazia hakutaka kusikiliza. Basi Yehoashi mfalme wa Israeli akapanda dhidi yake, nao wafalme hao wawili, yeye na Amazia mfalme wa Yuda, wakakutana uso kwa uso huko Beth-shemeshi, ulio wa Yuda. 12Yuda walishindwa na Israeli, na kila mtu akakimbilia nyumbani kwake. 13Yehoashi mfalme wa Israeli alimkamata Amazia mfalme wa Yuda huko Beth-shemeshi; Amazia alikuwa mwana wa Yehoashi mwana wa Ahazia. Kisha Yehoashi akaja Yerusalemu, akabomoa ukuta wa Yerusalemu kwa urefu wa karibu mita 180, kutoka Lango la Efraimu mpaka Lango la Pembeni. 14Akachukua dhahabu yote na fedha, na kila chombo kilichoonekana katika nyumba ya BWANA na katika hazina za ikulu. Akachukua pia mateka kama rehani, kisha akarudi Samaria. 15Mambo mengine ya Yehoashi, aliyoyafanya, nguvu zake na jinsi alivyopigana dhidi ya Amazia mfalme wa Yuda, yameandikwa katika Kitabu cha Historia ya Wafalme wa Israeli. 16Kisha Yehoashi alipumzika pamoja na babu zake, akazikwa huko Samaria pamoja na wafalme wa Israeli. Na mwanawe Yeroboamu akawa mfalme mahali pake.

17Amazia mwana wa Yoashi mfalme wa Yuda aliishi miaka kumi na mitano baada ya kifo cha Yehoashi mwana wa Yehoahazi mfalme wa Israeli. 18Mambo mengine ya Amazia yameandikwa katika Kitabu cha Historia ya Wafalme wa Yuda. 19Watu fulani huko Yerusalemu walifanya njama dhidi yake, naye akakimbilia Lakishi. Lakini wakatuma watu wamfuate huko Lakishi, wakamwua huko. 20Wakauleta mwili wake juu ya farasi, naye akazikwa huko Yerusalemu pamoja na babu zake katika mji wa Daudi. 21Kisha watu wote wa Yuda walimchukua Azaria, aliyekuwa na umri wa miaka kumi na sita wakati huo, wakamtawaza kuwa mfalme mahali pa baba yake Amazia. 22Yeye ndiye aliyeijenga upya Elathi na kuirudisha kwa Yuda, baada ya mfalme Amazia kupumzika pamoja na babu zake.

23Katika mwaka wa kumi na tano wa Amazia mwana wa Yoashi mfalme wa Yuda, Yeroboamu mwana wa Yoashi alianza kutawala juu ya Israeli huko Samaria, akatawala miaka arobaini na mmoja. 24Alifanya maovu machoni pa BWANA. Hakuiacha hata moja ya dhambi za Yeroboamu mwana wa Nebati, aliyewafanya Israeli kutenda dhambi. 25Aliurudisha mpaka wa Israeli kutoka Lebo-hamathi mpaka bahari ya Araba, sawasawa na neno la BWANA, Mungu wa Israeli, alilokuwa amelinena kupitia mtumishi wake Yona mwana wa Amitai, nabii wa Gath-heferi. 26Kwa maana BWANA aliona kwamba mateso ya Israeli yalikuwa machungu sana. Hakuna aliyebaki, aliyefungwa wala aliye huru, wala hapakuwa na mtu wa kuwasaidia Israeli. 27BWANA hakuwa amesema kwamba angelifuta jina la Israeli chini ya mbingu, kwa hiyo akawaokoa kupitia Yeroboamu mwana wa Yoashi. 28Mambo mengine ya Yeroboamu, yote aliyoyafanya, nguvu zake, jinsi alivyopigana, na jinsi alivyoirudishia Israeli Dameski na Hamathi, zilizokuwa za Yuda, yameandikwa katika Kitabu cha Historia ya Wafalme wa Israeli. 29Kisha Yeroboamu alipumzika pamoja na babu zake, wafalme wa Israeli. Na mwanawe Zekaria akawa mfalme mahali pake.