2 Wafalme 4

1Mke wa mtu mmoja wa kundi la manabii alimlilia Elisha, akasema, “Mume wangu, mtumishi wako, amekufa, nawe unajua kwamba mtumishi wako alimcha BWANA. Sasa mtu aliyekuwa akimdai amekuja kuwachukua watoto wangu wawili wawe watumwa wake.” 2Elisha akamwambia, “Nikufanyie nini? Niambie, una nini nyumbani mwako?” Akajibu, “Mtumishi wako hana kitu chochote nyumbani, isipokuwa kichupa kidogo cha mafuta.” 3Akasema, “Nenda ukaazime vyombo kwa jirani zako wote, vyombo vitupu, wala si vichache tu. 4Kisha ingia ndani pamoja na wanao, mfunge mlango nyuma yenu. Mimina mafuta katika vyombo hivyo vyote, na kila kimoja kikijaa, kiweke kando.” 5Basi akaondoka kwake, akafunga mlango nyuma yake na nyuma ya wanawe. Wao wakaendelea kumletea vyombo, naye akaendelea kumimina. 6Vyombo vyote vilipojaa, alimwambia mwanawe, “Niletee kingine.” Lakini akamwambia, “Hakuna vingine tena.” Ndipo mafuta yakaacha kutiririka. 7Akaenda, akamweleza mtu wa Mungu. Akasema, “Nenda ukauze mafuta, ulipe deni lako. Wewe na wanao mtaishi kwa yanayobaki.”

8Siku moja Elisha alikwenda Shunemu. Mwanamke mmoja tajiri aliishi huko, naye akamsisitiza akae ale chakula. Baadaye, kila alipopita njia ile, alikuwa akiingia huko kula. 9Akamwambia mumewe, “Sikiliza, nina hakika kwamba mtu huyu anayepita kwetu mara kwa mara ni mtu mtakatifu wa Mungu. 10Tumjengee chumba kidogo chenye kuta juu ya dari, tumwekee humo kitanda, meza, kiti na taa. Kisha kila atakapokuja kwetu, ataweza kukaa humo.” 11Siku moja Elisha alifika huko, akaingia katika chumba cha ghorofani, akalala humo. 12Akamwambia mtumishi wake Gehazi, “Mwite yule mwanamke Mshunami.” Basi akamwita, naye akaja akasimama mbele yake. 13Elisha akamwambia Gehazi, “Mwambie, ‘Umejisumbua sana hivi kwa ajili yetu. Ufanyiwe nini? Je, tukusemee kwa mfalme au kwa mkuu wa jeshi?’” Akajibu, “Ninaishi katikati ya watu wangu mwenyewe.” 14Elisha akauliza, “Basi, afanyiwe nini?” Gehazi akajibu, “Haya, hana mwana, na mumewe ni mzee.” 15Elisha akasema, “Mwite.” Basi Gehazi akamwita, naye akasimama mlangoni. 16Elisha akasema, “Mwaka ujao wakati kama huu utakuwa umembeba mwana mikononi mwako.” Akasema, “Hapana, bwana wangu, mtu wa Mungu! Usimdanganye mtumishi wako.” 17Lakini yule mwanamke akapata mimba, na majira kama yale mwaka uliofuata akazaa mwana, kama Elisha alivyokuwa amemwambia. 18Mtoto akakua. Siku moja alitoka kwenda kuungana na baba yake kati ya wavunaji. 19Akamwambia baba yake, “Kichwa changu! Kichwa changu!” Baba yake akamwambia mtumishi, “Mbebe umpeleke kwa mama yake.” 20Mtumishi akamchukua, akampeleka kwa mama yake. Akaketi mapajani mwa mama yake mpaka adhuhuri, kisha akafa. 21Akapanda ghorofani, akamlaza juu ya kitanda cha mtu wa Mungu, akamfungia mlango, akatoka. 22Akamwita mumewe, akasema, “Tafadhali niletee mtumishi mmoja na punda mmoja. Nataka kwenda haraka kwa mtu wa Mungu na kurudi mara moja.” 23Akamwuliza, “Kwa nini uende kwake leo? Si mwandamo wa mwezi wala Sabato.” Akasema, “Ni salama.” 24Akatandika punda, akamwambia mtumishi wake, “Endesha, twende! Usipunguze mwendo kwa ajili yangu mpaka nikuambie.” 25Basi akaondoka, akafika kwa mtu wa Mungu katika mlima Karmeli. Mara mtu wa Mungu alipomwona kwa mbali, alimwambia Gehazi mtumishi wake, “Tazama, yule mwanamke Mshunami anakuja. 26Kimbia sasa umlaki, umwulize, ‘Je, u salama? Je, mumeo yu salama? Je, mtoto yu salama?’” Akajibu, “Ni salama.” 27Alipomfikia mtu wa Mungu mlimani, alishika miguu yake. Gehazi akaja ili amsukume, lakini mtu wa Mungu akasema, “Mwache! Ana uchungu mwingi moyoni. BWANA amenificha jambo hili, wala hakuniambia.” 28Akasema, “Je, nilikuomba mwana, bwana wangu? Je, sikukwambia, ‘Usinipe matumaini ya uongo’?” 29Elisha akamwambia Gehazi, “Jifunge mshipi tayari kwa safari, chukua fimbo yangu mkononi, uende. Ukikutana na mtu yeyote, usimsalimu, na mtu akikusalimu, usimjibu. Weka fimbo yangu juu ya uso wa mtoto.” 30Lakini mama wa mtoto akasema, “Kama BWANA aishivyo, na kama wewe uishivyo, sitakuacha.” Basi Elisha akainuka, akamfuata. 31Gehazi akatangulia mbele yao, akaweka fimbo juu ya uso wa mtoto. Lakini hapakuwa na sauti wala dalili yoyote. Basi akarudi kumlaki Elisha, akamwambia, “Mtoto hajaamka.” 32Elisha alipofika nyumbani, tazama, mtoto alikuwa amekufa, amelala juu ya kitanda chake. 33Akaingia, akajifungia mlango yeye na mtoto, akamwomba BWANA. 34Kisha akapanda kitandani, akalala juu ya mtoto, akaweka kinywa chake juu ya kinywa cha mtoto, macho yake juu ya macho yake, na mikono yake juu ya mikono yake. Alipojinyoosha juu yake, mwili wa mtoto ukaanza kupata joto. 35Elisha akashuka, akatembea huku na huko ndani ya nyumba, kisha akapanda tena, akajinyoosha juu yake. Mtoto akapiga chafya mara saba, akafumbua macho. 36Elisha akamwita Gehazi, akamwambia, “Mwite yule mwanamke Mshunami.” Gehazi akamwita, naye alipoingia, Elisha akasema, “Mchukue mwanao.” 37Akaingia, akaanguka miguuni pake, akainama mpaka chini. Kisha akamwinua mwanawe, akatoka.

38Elisha alirudi Gilgali wakati kulikuwa na njaa katika nchi. Kundi la manabii lilipokuwa limeketi mbele yake, alimwambia mtumishi wake, “Teleka sufuria kubwa motoni, uwapikie kundi la manabii mchuzi.” 39Mmoja wao alitoka kwenda mashambani kuchuma mboga. Akapata mmea wa porini unaotambaa, akachuma matango ya porini mpaka vazi lake likajaa. Akarudi, akayakatakata ndani ya sufuria ya mchuzi, ingawa hakuna hata mmoja aliyejua ni nini. 40Wakawapakulia watu ili wale. Lakini walipokuwa wakila mchuzi, walipiga kelele, “Mtu wa Mungu, mauti yamo sufuriani!” Hawakuweza kuula. 41Elisha akasema, “Basi leteni unga.” Akautupa ndani ya sufuria, akasema, “Wapakulieni watu, wale.” Wala hapakuwa na kitu chochote chenye madhara sufuriani.

42Mtu mmoja alikuja kutoka Baal-shalisha, akamletea mtu wa Mungu mikate ya malimbuko: mikate ishirini ya shayiri, na masuke mabichi ya nafaka katika gunia lake. Elisha akasema, “Wape watu wale.” 43Mtumishi wake akasema, “Nitawezaje kuweka hiki mbele ya watu mia moja?” Lakini Elisha akasema, “Wape watu wale, kwa maana hivi ndivyo BWANA asemavyo: ‘Watakula na kusaza.’” 44Basi akaweka mbele yao. Wakala, na kingine kikabaki, kama BWANA alivyokuwa amesema.