2 Wafalme 8

1Elisha alikuwa amemwambia yule mwanamke ambaye alikuwa amemrudishia mwanawe uhai, “Ondoka uende pamoja na nyumba yako, ukaishi popote utakapopata mahali pa kukaa, kwa maana BWANA ameiita njaa, nayo itaijia nchi kwa miaka saba.” 2Basi yule mwanamke akaondoka, akafanya kama mtu wa Mungu alivyosema. Akaenda pamoja na nyumba yake, akaishi katika nchi ya Wafilisti kwa miaka saba. 3Mwisho wa miaka saba, yule mwanamke alirudi kutoka nchi ya Wafilisti, akaenda kumwomba mfalme haki kwa ajili ya nyumba yake na shamba lake. 4Wakati huo mfalme alikuwa akizungumza na Gehazi, mtumishi wa mtu wa Mungu, akasema, “Tafadhali nieleze mambo yote makuu aliyoyafanya Elisha.” 5Alipokuwa akimweleza mfalme jinsi Elisha alivyomrudishia uhai mvulana aliyekufa, yule mwanamke ambaye mwanawe alirudishiwa uhai akaingia, akimwomba mfalme haki kwa ajili ya nyumba yake na shamba lake. Gehazi akasema, “Bwana wangu mfalme, huyu ndiye yule mwanamke, na huyu ndiye mwanawe ambaye Elisha alimrudishia uhai!” 6Mfalme akamwuliza yule mwanamke habari hiyo, naye akamweleza. Kisha mfalme akamweka afisa mmoja kushughulikia shauri lake, akamwamuru, “Mrudishie kila kitu kilichokuwa chake, pamoja na mazao yote ya shamba lake tangu siku alipoondoka nchini mpaka sasa.”

7Elisha alikwenda Dameski wakati Ben-hadadi mfalme wa Aramu alipokuwa mgonjwa. Mfalme akaambiwa, “Mtu wa Mungu amekuja hapa.” 8Mfalme akamwambia Hazaeli, “Chukua zawadi pamoja nawe, uende kumlaki mtu wa Mungu. Umwulize BWANA kupitia yeye, ‘Je, nitapona ugonjwa huu?’” 9Basi Hazaeli akaenda kumlaki, akichukua pamoja naye zawadi ya vitu vizuri vya kila aina vya Dameski, mizigo ya ngamia arobaini. Akaja, akasimama mbele ya Elisha, akasema, “Mwanao Ben-hadadi mfalme wa Aramu amenituma kwako kuuliza, ‘Je, nitapona ugonjwa huu?’” 10Elisha akamwambia, “Nenda umwambie, ‘Hakika utapona.’ Lakini BWANA amenionyesha kwamba hakika atakufa.” 11Elisha akamkazia Hazaeli macho, akaendelea kumtazama mpaka Hazaeli akaona aibu. Kisha mtu wa Mungu akalia. 12Hazaeli akauliza, “Kwa nini bwana wangu analia?” Akajibu, “Kwa sababu najua madhara utakayowatendea Waisraeli. Utaziteketeza ngome zao kwa moto, utawaua vijana wao kwa upanga, utawaponda watoto wao wadogo vipande vipande, na kuwapasua wanawake wao wenye mimba.” 13Hazaeli akasema, “Lakini mtumishi wako ni nani, mbwa tu, hata afanye jambo kubwa kama hili?” Elisha akajibu, “BWANA amenionyesha kwamba utakuwa mfalme juu ya Aramu.” 14Kisha Hazaeli akaondoka kwa Elisha, akarudi kwa bwana wake. Mfalme akamwuliza, “Elisha alikuambia nini?” Akajibu, “Aliniambia kwamba hakika utapona.” 15Lakini siku iliyofuata Hazaeli alichukua kitambaa cha kitanda, akakiloweka majini, akakitandaza juu ya uso wa mfalme, naye akafa. Hazaeli akawa mfalme mahali pake.

16Katika mwaka wa tano wa Yoramu mwana wa Ahabu mfalme wa Israeli, Yehoshafati alipokuwa bado mfalme wa Yuda, Yehoramu mwana wa Yehoshafati mfalme wa Yuda alianza kutawala. 17Alikuwa na umri wa miaka thelathini na miwili alipoanza kutawala, naye akatawala miaka minane huko Yerusalemu. 18Alifuata njia ya wafalme wa Israeli, kama nyumba ya Ahabu ilivyofanya, kwa sababu alikuwa amemwoa binti Ahabu. Alifanya maovu machoni pa BWANA. 19Hata hivyo BWANA hakutaka kuiangamiza Yuda, kwa ajili ya mtumishi wake Daudi, kwa kuwa alikuwa ameahidi kumpa taa kwa ajili ya wazao wake milele. 20Wakati wa utawala wake Edomu waliasi dhidi ya utawala wa Yuda, wakajiwekea mfalme wao wenyewe. 21Basi Yoramu akavuka mpaka Sairi pamoja na magari yake yote ya vita. Akainuka usiku, akawashambulia Waedomu waliokuwa wamemzunguka pamoja na wakuu wa magari ya vita, nao askari wakakimbilia nyumbani kwao. 22Basi Edomu wamekuwa katika uasi dhidi ya utawala wa Yuda mpaka leo. Libna nao waliasi wakati huo huo. 23Mambo mengine ya Yoramu na yote aliyoyafanya yameandikwa katika Kitabu cha Historia ya Wafalme wa Yuda. 24Kisha Yoramu akapumzika pamoja na babu zake, akazikwa pamoja nao katika mji wa Daudi. Na mwanawe Ahazia akawa mfalme mahali pake.

25Katika mwaka wa kumi na mbili wa Yoramu mwana wa Ahabu mfalme wa Israeli, Ahazia mwana wa Yehoramu mfalme wa Yuda alianza kutawala. 26Ahazia alikuwa na umri wa miaka ishirini na miwili alipoanza kutawala, naye akatawala mwaka mmoja huko Yerusalemu. Mama yake aliitwa Athalia, mjukuu wa Omri mfalme wa Israeli. 27Alifuata njia ya nyumba ya Ahabu, akafanya maovu machoni pa BWANA, kama nyumba ya Ahabu ilivyofanya, kwa sababu alikuwa na uhusiano wa ndoa na nyumba ya Ahabu. 28Alikwenda pamoja na Yoramu mwana wa Ahabu vitani kupigana na Hazaeli mfalme wa Aramu huko Ramoth-gileadi, naye Yoramu akajeruhiwa na Waaramu. 29Mfalme Yoramu alirudi Yezreeli kuuguza majeraha ambayo Waaramu walimtia huko Rama, katika vita vyake na Hazaeli mfalme wa Aramu. Kisha Ahazia mwana wa Yehoramu mfalme wa Yuda akashuka kumwona Yoramu mwana wa Ahabu huko Yezreeli, kwa sababu alikuwa amejeruhiwa.