2 Wafalme 22

1Yosia alikuwa na umri wa miaka minane alipoanza kutawala, naye akatawala miaka thelathini na mmoja huko Yerusalemu. Mama yake aliitwa Yedida binti Adaya wa Boskathi. 2Alifanya yaliyo sawa machoni pa BWANA, akaenenda katika njia yote ya babu yake Daudi. Hakugeuka kwenda kulia wala kushoto.

3Katika mwaka wa kumi na nane wa mfalme Yosia, mfalme alimtuma katibu Shafani mwana wa Azalia, mwana wa Meshulamu, kwenda nyumba ya BWANA, akisema, 4“Panda uende kwa Hilkia kuhani mkuu, umwambie aihesabu fedha iliyoletwa katika nyumba ya BWANA, fedha ambayo mabawabu wameipokea kutoka kwa watu, 5nao waikabidhi kwa watu wanaofanya kazi, waliowekwa kuisimamia nyumba ya BWANA. Hao waitoe kwa mafundi walio katika nyumba ya BWANA wanaoyatengeneza maharibiko ya nyumba, 6yaani mafundi, wajenzi na waashi, na wanunue miti na mawe yaliyochongwa ili kuitengeneza nyumba. 7Lakini wasitakiwe kutoa hesabu ya fedha wanayokabidhiwa, kwa sababu wanafanya kazi kwa uaminifu.” 8Hilkia kuhani mkuu akamwambia Shafani katibu, “Katika nyumba ya BWANA nimekiona kitabu cha Sheria.” Hilkia akampa Shafani kitabu hicho, naye akakisoma. 9Shafani katibu alikwenda kwa mfalme, akampa taarifa: “Maafisa wako wameimimina fedha iliyopatikana ndani ya nyumba, nao wameikabidhi kwa watu wanaofanya kazi, waliowekwa kuisimamia nyumba ya BWANA.” 10Kisha Shafani katibu akamwambia mfalme, “Hilkia kuhani amenipa kitabu.” Naye Shafani akakisoma kwa sauti mbele ya mfalme. 11Mfalme alipoyasikia maneno yaliyoandikwa katika kitabu cha Sheria, aliyararua mavazi yake. 12Kisha mfalme akatoa amri kwa Hilkia kuhani, Ahikamu mwana wa Shafani, Akbori mwana wa Mikaya, Shafani katibu, na Asaya afisa wa mfalme: 13“Nendeni mkamwulize BWANA kwa niaba yangu, na kwa niaba ya watu na Yuda wote, kuhusu maneno ya kitabu hiki kilichopatikana. Hasira ya BWANA inawaka sana juu yetu, kwa sababu babu zetu hawakuyasikiliza maneno ya kitabu hiki wala kufanya yote kinayotuagiza.” 14Basi Hilkia kuhani, Ahikamu, Akbori, Shafani na Asaya walikwenda kwa nabii Hulda, mke wa Shalumu mwana wa Tikva, mwana wa Harhasi, mtunzaji wa mavazi. Aliishi katika Mtaa wa Pili wa Yerusalemu, nao wakazungumza naye. 15Akawaambia, “BWANA, Mungu wa Israeli, asema hivi: Mwambieni mtu yule aliyewatuma kwangu, 16‘Hivi ndivyo BWANA asemavyo: Ninakaribia kuleta maafa juu ya mahali hapa na juu ya wale wanaoishi humo, maneno yote ya kitabu alichokisoma mfalme wa Yuda, 17kwa sababu wameniacha na kuifukizia uvumba miungu mingine, wakinikasirisha kwa kazi yote ya mikono yao. Kwa hiyo ghadhabu yangu itawaka juu ya mahali hapa, wala haitazimwa.’ 18Lakini mwambieni mfalme wa Yuda, aliyewatuma kumwuliza BWANA, hivi: ‘BWANA, Mungu wa Israeli, asema hivi: Kuhusu maneno uliyoyasikia, 19kwa sababu moyo wako ulikuwa mwepesi wa kuguswa, nawe uliposikia niliyosema juu ya mahali hapa na watu wake, kwamba watakuwa kitisho na laana, ukajinyenyekeza mbele za BWANA; na kwa sababu uliyararua mavazi yako na kulia mbele yangu, mimi nami nimekusikia, asema BWANA. 20Kwa hiyo nitakukusanya kwa babu zako, nawe utakusanywa kaburini mwako kwa amani. Hutaona kwa macho yako maafa yote nitakayoleta juu ya mahali hapa.’” Kisha wakampelekea mfalme jibu lake.