2 Wafalme 24

1Katika siku za Yehoyakimu, Nebukadneza mfalme wa Babeli alipanda, naye Yehoyakimu akawa mfalme mtumishi wake kwa miaka mitatu. Kisha akageuka, akamwasi. 2BWANA alituma juu yake vikosi vya wavamizi vya Wakaldayo, Waaramu, Wamoabu na Waamoni. Akavituma juu ya Yuda ili kuiangamiza, sawasawa na neno ambalo BWANA alikuwa amelinena kupitia watumishi wake manabii. 3Hakika ilikuwa kwa amri ya BWANA kwamba jambo hili liliijia Yuda, ili kuwaondoa mbele yake kwa sababu ya dhambi za Manase, yote aliyoyafanya, 4na pia kwa sababu ya damu isiyo na hatia aliyoimwaga. Alikuwa ameijaza Yerusalemu damu isiyo na hatia, wala BWANA hakutaka kusamehe. 5Mambo mengine ya Yehoyakimu, na yote aliyoyafanya, yameandikwa katika Kitabu cha Historia ya Wafalme wa Yuda. 6Yehoyakimu alipumzika pamoja na babu zake, na mwanawe Yehoyakini akawa mfalme mahali pake. 7Mfalme wa Misri hakutoka tena katika nchi yake mwenyewe kwenda vitani, kwa sababu mfalme wa Babeli alikuwa ametwaa kila kitu kilichokuwa cha mfalme wa Misri, tangu Kijito cha Misri mpaka mto Frati.

8Yehoyakini alikuwa na umri wa miaka kumi na minane alipoanza kutawala, naye akatawala miezi mitatu huko Yerusalemu. Mama yake aliitwa Nehushta binti Elnathani wa Yerusalemu. 9Alifanya maovu machoni pa BWANA, kama baba yake alivyofanya. 10Wakati huo maafisa wa Nebukadneza mfalme wa Babeli walipanda kuishambulia Yerusalemu, na mji ukazingirwa. 11Nebukadneza mfalme wa Babeli alikuja mwenyewe kwenye mji maafisa wake walipokuwa wakiuzingira. 12Yehoyakini mfalme wa Yuda alitoka kwenda kujisalimisha kwa mfalme wa Babeli, yeye na mama yake, watumishi wake, maafisa wake na wakuu wa ikulu yake. Mfalme wa Babeli akamchukua mateka katika mwaka wa nane wa utawala wake. 13Akachukua kutoka huko hazina zote za nyumba ya BWANA na za ikulu, akavikatakata vyombo vyote vya dhahabu ambavyo Sulemani mfalme wa Israeli alikuwa amevifanya kwa ajili ya hekalu la BWANA, kama BWANA alivyokuwa amesema. 14Aliwachukua uhamishoni Yerusalemu wote: maafisa wote na mashujaa wote wa vita, mateka 10,000, na mafundi wote na wahunzi. Hakubaki mtu ila watu maskini kabisa wa nchi. 15Alimchukua Yehoyakini uhamishoni mpaka Babeli. Mama wa mfalme, wake za mfalme, wakuu wa ikulu yake na watu mashuhuri wa nchi pia aliwachukua uhamishoni kutoka Yerusalemu mpaka Babeli. 16Mfalme wa Babeli aliwaleta Babeli kama mateka mashujaa wote, 7,000, na mafundi na wahunzi, elfu moja, wote wakiwa watu wenye nguvu wanaofaa kwa vita. 17Mfalme wa Babeli alimtawaza Matania, baba mdogo wa Yehoyakini, kuwa mfalme mahali pake, akabadilisha jina lake kuwa Sedekia.

18Sedekia alikuwa na umri wa miaka ishirini na mmoja alipoanza kutawala, naye akatawala miaka kumi na mmoja huko Yerusalemu. Mama yake aliitwa Hamutali binti Yeremia wa Libna. 19Alifanya maovu machoni pa BWANA, kama Yehoyakimu alivyofanya. 20Ilikuwa kwa sababu ya hasira ya BWANA kwamba hayo yote yalitokea katika Yerusalemu na Yuda, mpaka alipowatupa kutoka mbele yake. Naye Sedekia akamwasi mfalme wa Babeli.