2 Wafalme 23

1Kisha mfalme alituma ujumbe, na wazee wote wa Yuda na Yerusalemu wakakusanyika kwake. 2Mfalme alipanda kwenda nyumba ya BWANA, na pamoja naye wakaenda watu wote wa Yuda na wote walioishi Yerusalemu, makuhani na manabii, na watu wote, tangu mdogo hadi mkubwa. Akasoma wakisikia maneno yote ya kitabu cha agano, kilichokuwa kimepatikana katika nyumba ya BWANA. 3Mfalme alisimama karibu na nguzo, akafanya agano mbele za BWANA: kumfuata BWANA na kuzishika amri zake, maagizo yake na masharti yake kwa moyo wake wote na nafsi yake yote, na hivyo kuyatimiza maneno ya agano hili yaliyoandikwa katika kitabu hiki. Na watu wote wakajifunga kwa agano hilo. 4Mfalme alimwamuru Hilkia kuhani mkuu, makuhani wa daraja la pili na mabawabu, watoe katika hekalu la BWANA vyombo vyote vilivyofanywa kwa ajili ya Baali, Ashera na jeshi lote la mbinguni. Akaviteketeza nje ya Yerusalemu katika mashamba ya bonde la Kidroni, akayachukua majivu yake mpaka Betheli. 5Aliwaondoa makuhani wa sanamu, ambao wafalme wa Yuda walikuwa wamewaweka wafukize uvumba mahali pa juu katika miji ya Yuda na kandokando ya Yerusalemu, pamoja na wale waliomfukizia uvumba Baali, jua na mwezi, makundi ya nyota na jeshi lote la mbinguni. 6Aliutoa mti wa Ashera katika nyumba ya BWANA na kuupeleka bonde la Kidroni nje ya Yerusalemu. Akauteketeza huko katika bonde la Kidroni, akausaga kuwa mavumbi na kuyatupa mavumbi hayo juu ya makaburi ya watu wa kawaida. 7Alizibomoa nyumba za wanaume makahaba wa mahali pa ibada zilizokuwa katika nyumba ya BWANA, ambapo wanawake walifuma mapazia kwa ajili ya Ashera. 8Aliwaleta makuhani wote kutoka miji ya Yuda, akapanajisi mahali pa juu ambapo makuhani hao walifukiza uvumba, tangu Geba mpaka Beer-sheba. Akabomoa mahali pa juu pa malango palipokuwa kwenye njia ya kuingia Lango la Yoshua, mkuu wa mji, upande wa kushoto mtu anapoingia katika lango la mji. 9Makuhani wa mahali pa juu hawakuhudumu kwenye madhabahu ya BWANA huko Yerusalemu, lakini walikula mikate isiyotiwa chachu pamoja na makuhani wenzao. 10Alipanajisi Tofethi katika Bonde la Ben-hinomu, ili mtu yeyote asimpitishe tena mwana wala binti motoni kwa ajili ya Moleki. 11Aliwaondoa farasi ambao wafalme wa Yuda walikuwa wamewaweka wakfu kwa jua kwenye maingilio ya nyumba ya BWANA, karibu na chumba cha Nathan-meleki afisa, kilichokuwa katika ukumbi. Akayateketeza magari ya jua. 12Mfalme alizibomoa madhabahu ambazo wafalme wa Yuda walikuwa wamezijenga juu ya dari la chumba cha juu cha Ahazi, na madhabahu ambazo Manase alikuwa amezijenga katika nyua mbili za nyumba ya BWANA. Akazivunjavunja na kuziondoa huko, akayatupa mavumbi yake katika bonde la Kidroni. 13Mfalme alipanajisi mahali pa juu palipokuwa mashariki mwa Yerusalemu, upande wa kusini wa Mlima wa Uharibifu, ambapo Sulemani mfalme wa Israeli alikuwa amepajenga kwa ajili ya Ashtorethi, mungu wa kike wa kuchukiza wa Wasidoni, kwa ajili ya Kemoshi, mungu wa kuchukiza wa Moabu, na kwa ajili ya Milkomu, mungu wa kuchukiza wa Waamoni. 14Alizivunjavunja nguzo za mawe, akaikata miti ya Ashera, akapajaza mahali ilipokuwa imesimama kwa mifupa ya wanadamu. 15Hata madhabahu iliyokuwa Betheli, mahali pa juu palipofanywa na Yeroboamu mwana wa Nebati, aliyewafanya Israeli kutenda dhambi, hata madhabahu hiyo na mahali pa juu alivibomoa. Akapateketeza mahali pa juu na kupaponda kuwa mavumbi, akauteketeza na mti wa Ashera. 16Yosia alipogeuka, aliyaona makaburi yaliyokuwa huko kilimani, akatuma watu kuitoa mifupa katika makaburi hayo. Akaiteketeza juu ya madhabahu, akainajisi, sawasawa na neno la BWANA ambalo mtu wa Mungu alilipaza sauti alipotabiri mambo haya. 17Akauliza, “Ni alama gani ile ya kaburi ninayoiona?” Watu wa mji wakajibu, “Mtu wa Mungu aliyekuja kutoka Yuda amezikwa pale. Alipaza sauti dhidi ya madhabahu ya Betheli, akitangaza mambo haya hasa uliyoyafanya.” 18Akasema, “Mwacheni kwa amani. Mtu yeyote asiisumbue mifupa yake.” Basi wakaiacha salama mifupa yake, pamoja na mifupa ya nabii aliyekuwa amekuja kutoka Samaria. 19Yosia aliziondoa pia nyumba zote za ibada za mahali pa juu katika miji ya Samaria, ambazo wafalme wa Israeli walikuwa wamezijenga, wakimkasirisha BWANA. Akazitendea sawasawa kabisa na alivyotenda huko Betheli. 20Aliwachinja makuhani wote wa mahali pa juu waliokuwa huko juu ya madhabahu, akateketeza mifupa ya wanadamu juu yake. Kisha akarudi Yerusalemu. 21Mfalme aliwaamuru watu wote, “Mshikieni BWANA Mungu wenu Pasaka kama ilivyoandikwa katika kitabu hiki cha agano.” 22Hapakuwa na Pasaka iliyoshikwa kama hii tangu wakati wa waamuzi waliowaamua Israeli, wala katika wakati wote wa wafalme wa Israeli na wafalme wa Yuda. 23Lakini Pasaka hii ilishikwa kwa BWANA huko Yerusalemu katika mwaka wa kumi na nane wa mfalme Yosia. 24Yosia aliwaondoa kabisa pia wanaowaita wafu na wapiga ramli, vinyago vya nyumbani, sanamu, na machukizo yote yaliyoonekana katika nchi ya Yuda na katika Yerusalemu. Alifanya hivyo ili kuyatimiza maneno ya Sheria, kama yalivyoandikwa katika kitabu alichokipata Hilkia kuhani katika nyumba ya BWANA. 25Kabla yake hapakuwa na mfalme kama yeye, aliyemgeukia BWANA kwa moyo wake wote, kwa nafsi yake yote, na kwa nguvu zake zote, kwa kufuata Sheria yote ya Musa; wala baada yake hakutokea mwingine kama yeye. 26Hata hivyo BWANA hakugeuka kuacha ukali wa hasira yake kuu, iliyowaka juu ya Yuda kwa sababu ya mambo yote ambayo Manase alimkasirisha nayo. 27BWANA alisema, “Nitawaondoa Yuda pia mbele yangu, kama nilivyowaondoa Israeli. Nitaukataa mji huu niliouchagua, Yerusalemu, na nyumba niliyosema habari zake, ‘Jina langu litakuwa huko.’” 28Mambo mengine ya Yosia, na yote aliyoyafanya, yameandikwa katika Kitabu cha Historia ya Wafalme wa Yuda. 29Katika siku zake Farao Neko mfalme wa Misri alipanda kwenda kwa mfalme wa Ashuru kwenye mto Frati, naye mfalme Yosia akatoka kwenda kumkabili. Neko alipomwona, akamwua huko Megido. 30Maafisa wake waliubeba mwili wake garini kutoka Megido, wakauleta Yerusalemu, wakamzika katika kaburi lake mwenyewe. Kisha watu wa nchi wakamchukua Yehoahazi mwana wa Yosia, wakampaka mafuta na kumtawaza kuwa mfalme mahali pa baba yake.

31Yehoahazi alikuwa na umri wa miaka ishirini na mitatu alipoanza kutawala, naye akatawala miezi mitatu huko Yerusalemu. Mama yake aliitwa Hamutali binti Yeremia wa Libna. 32Alifanya maovu machoni pa BWANA, kama babu zake walivyofanya. 33Farao Neko alimfunga minyororo huko Ribla katika nchi ya Hamathi, ili asiendelee kutawala huko Yerusalemu, naye akaitoza nchi malipo ya karibu kilo 3,400 za fedha na karibu kilo 34 ya dhahabu. 34Farao Neko alimtawaza Eliakimu mwana wa Yosia kuwa mfalme mahali pa Yosia baba yake. Akabadilisha jina la Eliakimu kuwa Yehoyakimu. Lakini Yehoahazi akamchukua, naye Yehoahazi akaenda Misri, akafa huko. 35Yehoyakimu alimlipa Farao fedha na dhahabu, lakini ili kupata fedha ambayo Farao alidai, alilazimika kuitoza nchi kodi. Alidai fedha na dhahabu kutoka kwa watu wa nchi, kila mmoja kwa kadiri aliyotozwa, ili kumpa Farao Neko.

36Yehoyakimu alikuwa na umri wa miaka ishirini na mitano alipoanza kutawala, naye akatawala miaka kumi na mmoja huko Yerusalemu. Mama yake aliitwa Zebuda binti Pedaya wa Ruma. 37Alifanya maovu machoni pa BWANA, kama babu zake walivyofanya.