2 Wafalme 16

1Katika mwaka wa kumi na saba wa Peka mwana wa Remalia, Ahazi mwana wa Yothamu alianza kutawala Yuda. 2Ahazi alikuwa na umri wa miaka ishirini alipoanza kutawala, naye akatawala miaka kumi na sita huko Yerusalemu. Hakufanya yaliyo sawa machoni pa BWANA Mungu wake, kama babu yake Daudi alivyofanya. 3Aliifuata njia ya wafalme wa Israeli. Hata alimpitisha mwanawe motoni, akifuata desturi za kuchukiza za mataifa ambayo BWANA aliyafukuza mbele ya Waisraeli. 4Alitoa dhabihu na kufukiza uvumba mahali pa juu, juu ya vilima na chini ya kila mti wenye majani mengi. 5Kisha Resini mfalme wa Aramu na Peka mwana wa Remalia, mfalme wa Israeli, walipanda Yerusalemu kufanya vita. Wakamzingira Ahazi, lakini hawakuweza kuuteka mji. 6Wakati huo Resini mfalme wa Aramu aliirudishia Aramu mji wa Elathi, akawafukuza watu wa Yuda kutoka Elathi. Waedomu wakaja Elathi, nao wamekaa huko mpaka leo.

7Ahazi alituma wajumbe kwa Tiglath-pileseri mfalme wa Ashuru na ujumbe huu: “Mimi ni mtumishi wako na mwana wako. Njoo uniokoe kutoka katika nguvu za mfalme wa Aramu na mfalme wa Israeli, wanaonishambulia.” 8Ahazi alichukua fedha na dhahabu iliyopatikana katika nyumba ya BWANA na katika hazina za ikulu, akaipeleka kwa mfalme wa Ashuru kuwa rushwa. 9Mfalme wa Ashuru alikubali ombi lake. Akapanda kuishambulia Dameski, akaiteka. Akawachukua watu wake uhamishoni mpaka Kiri, akamwua Resini. 10Mfalme Ahazi alikwenda kukutana na Tiglath-pileseri mfalme wa Ashuru huko Dameski. Huko akaiona madhabahu iliyokuwa Dameski. Kisha mfalme Ahazi akampelekea Uria kuhani mfano na ramani ya madhabahu hiyo, pamoja na maelezo yote ya jinsi ilivyotengenezwa. 11Uria kuhani aliijenga madhabahu akifuata kila kitu mfalme Ahazi alichokuwa amekituma kutoka Dameski. Alikuwa ameimaliza kabla mfalme Ahazi hajarudi kutoka Dameski. 12Mfalme aliporudi kutoka Dameski aliiona madhabahu; akaikaribia, akatoa dhabihu juu yake. 13Akaiteketeza sadaka yake ya kuteketezwa na sadaka ya nafaka, akamimina sadaka yake ya kinywaji, akairushia madhabahu damu ya sadaka zake za amani. 14Kuhusu madhabahu ya shaba iliyokuwa mbele za BWANA, aliiondoa mbele ya hekalu, mahali pake kati ya madhabahu mpya na nyumba ya BWANA, akaiweka kando ya madhabahu mpya upande wa kaskazini. 15Kisha mfalme Ahazi akampa Uria kuhani maagizo: “Juu ya madhabahu kubwa teketeza sadaka ya kuteketezwa ya asubuhi na sadaka ya nafaka ya jioni, sadaka ya kuteketezwa ya mfalme na sadaka yake ya nafaka, na sadaka ya kuteketezwa ya watu wote wa nchi pamoja na sadaka zao za nafaka na sadaka zao za kinywaji. Irushie damu yote ya sadaka za kuteketezwa na ya dhabihu. Lakini madhabahu ya shaba itakuwa yangu ya kutafutia maongozi.” 16Uria kuhani alifanya kila kitu mfalme Ahazi alichoamuru. 17Mfalme Ahazi alikata mbao za pembeni za vitako, akayaondoa mabirika kutoka juu yake. Akaishusha Bahari kutoka juu ya ng’ombe wa shaba walioibeba, akaiweka juu ya sakafu ya mawe. 18Pia aliondoa katika nyumba ya BWANA mahali penye paa palipotumika siku ya Sabato palipokuwa pamejengwa hekaluni, na mlango wa nje wa mfalme. Alifanya hivyo kwa sababu ya mfalme wa Ashuru. 19Mambo mengine ya Ahazi, aliyoyafanya, yameandikwa katika Kitabu cha Historia ya Wafalme wa Yuda. 20Kisha Ahazi alipumzika pamoja na babu zake, akazikwa pamoja nao katika mji wa Daudi. Na mwanawe Hezekia akawa mfalme mahali pake.