2 Wafalme 11

1Athalia, mama wa Ahazia, alipoona kwamba mwanawe amekufa, aliinuka kuangamiza jamaa yote ya kifalme. 2Lakini Yehosheba, binti wa mfalme Yoramu na dada yake Ahazia, alimchukua Yoashi mwana wa Ahazia, akamtoa kwa siri katikati ya wana wa mfalme waliokuwa karibu kuuawa. Akamweka yeye na mlezi wake katika chumba cha kulala, nao wakamficha Athalia asimwone, kwa hiyo hakuuawa. 3Alikaa amefichwa pamoja naye katika nyumba ya BWANA miaka sita, wakati Athalia alipotawala juu ya nchi.

4Katika mwaka wa saba Yehoyada aliwaita wakuu wa mamia wa Wakari na wa walinzi, akawaleta kwake katika nyumba ya BWANA. Akafanya agano nao, akawaapisha katika nyumba ya BWANA. Kisha akawaonyesha mwana wa mfalme. 5Akawapa amri hii: “Hivi ndivyo mtakavyofanya. Theluthi moja yenu, wale wanaoingia zamu siku ya Sabato, watalinda ikulu ya mfalme, 6theluthi moja kwenye Lango la Suri, na theluthi moja kwenye lango lililo nyuma ya walinzi. Hivyo mtailinda ikulu kwa zamu. 7Vikosi viwili vyenu vinavyotoka zamu siku ya Sabato vyote vitalinda nyumba ya BWANA ili kumlinda mfalme. 8Mzungukeni mfalme pande zote, kila mtu akiwa na silaha zake mkononi. Yeyote atakayeingia katika safu zenu lazima auawe. Kaeni pamoja na mfalme popote aendapo.” 9Wakuu wa mamia walifanya kila kitu ambacho Yehoyada kuhani aliamuru. Kila mmoja akaleta watu wake, wale walioingia zamu siku ya Sabato na wale waliotoka zamu siku hiyo, wakaja kwa Yehoyada kuhani. 10Kuhani akawapa wakuu wa mamia mikuki na ngao zilizokuwa mali ya mfalme Daudi, zilizowekwa katika nyumba ya BWANA. 11Walinzi wakashika nafasi zao, kila mtu akiwa na silaha zake mkononi, kutoka upande wa kusini wa hekalu mpaka upande wa kaskazini, kando ya madhabahu na hekalu, wakimzunguka mfalme. 12Kisha Yehoyada akamtoa mwana wa mfalme, akamvika taji na kumpa Ushuhuda. Wakamfanya mfalme, wakampaka mafuta. Kisha wakapiga makofi, wakapaza sauti, “Mfalme aishi milele!”

13Athalia aliposikia kelele za walinzi na za watu, alikwenda kwa watu katika nyumba ya BWANA. 14Akatazama, na pale alikuwa mfalme amesimama karibu na nguzo kama ilivyokuwa desturi, pamoja na wakuu na wapiga tarumbeta kando yake. Watu wote wa nchi walikuwa wakishangilia na kupiga tarumbeta. Athalia akararua mavazi yake, akalia, “Uhaini! Uhaini!”

15Yehoyada kuhani akawaamuru wakuu wa mamia waliosimamia jeshi: “Mtoeni nje kati ya safu, na yeyote atakayemfuata, mwueni kwa upanga.” Kwa maana kuhani alikuwa amesema, “Asiuawe katika nyumba ya BWANA.” 16Wakamkamata, naye akatoka kwa njia ya maingilio ya farasi kwenye ikulu ya mfalme, na huko akauawa.

17Yehoyada akafanya agano kati ya BWANA, mfalme na watu, kwamba watakuwa watu wa BWANA. Akafanya pia agano kati ya mfalme na watu. 18Kisha watu wote wa nchi wakaenda kwenye nyumba ya Baali, wakaibomoa. Wakazivunja madhabahu zake na sanamu zake vipande vipande, wakamwua Matani, kuhani wa Baali, mbele ya madhabahu. Kuhani akaweka walinzi juu ya nyumba ya BWANA. 19Akawachukua wakuu wa mamia, Wakari, walinzi na watu wote wa nchi. Wakamsindikiza mfalme kutoka nyumba ya BWANA, wakapita kwa njia ya lango la walinzi mpaka ikulu ya mfalme. Naye mfalme akaketi juu ya kiti cha enzi cha kifalme. 20Watu wote wa nchi wakashangilia, nao mji ukawa na amani. Athalia alikuwa ameuawa kwa upanga katika ikulu ya mfalme.

21Yehoashi alikuwa na umri wa miaka saba alipoanza kutawala.