2 Wafalme 13

1Katika mwaka wa ishirini na tatu wa Yoashi mwana wa Ahazia mfalme wa Yuda, Yehoahazi mwana wa Yehu alianza kutawala juu ya Israeli huko Samaria, akatawala miaka kumi na saba. 2Alifanya maovu machoni pa BWANA, akafuata dhambi za Yeroboamu mwana wa Nebati, alizowafanya Israeli kutenda; hakuziacha. 3Basi hasira ya BWANA ikawaka juu ya Israeli, akawatia katika nguvu za Hazaeli mfalme wa Aramu na za Ben-hadadi mwana wa Hazaeli wakati huo wote. 4Kisha Yehoahazi alimsihi BWANA amhurumie, naye BWANA akamsikiliza, kwa sababu aliona jinsi mfalme wa Aramu alivyokuwa akiwaonea Israeli. 5BWANA aliwapa Israeli mwokozi, nao wakaokoka kutoka katika nguvu za Aramu. Basi Waisraeli wakaishi katika nyumba zao kama hapo awali. 6Lakini hawakuziacha dhambi za nyumba ya Yeroboamu, alizowafanya Israeli kutenda, bali waliendelea kuenenda ndani yake. Mti wa Ashera nao ukaendelea kusimama huko Samaria. 7Yehoahazi alikuwa ameachiwa askari wapanda farasi hamsini tu, magari ya vita kumi na askari wa miguu 10,000, kwa sababu mfalme wa Aramu alikuwa amewaangamiza na kuwafanya kama mavumbi ya kukanyagwa. 8Mambo mengine ya Yehoahazi, yote aliyoyafanya na nguvu zake, yameandikwa katika Kitabu cha Historia ya Wafalme wa Israeli. 9Yehoahazi alipumzika pamoja na babu zake, wakamzika huko Samaria. Na mwanawe Yoashi akawa mfalme mahali pake.

10Katika mwaka wa thelathini na saba wa Yoashi mfalme wa Yuda, Yehoashi mwana wa Yehoahazi alianza kutawala juu ya Israeli huko Samaria, akatawala miaka kumi na sita. 11Alifanya maovu machoni pa BWANA. Hakuiacha hata moja ya dhambi za Yeroboamu mwana wa Nebati, alizowafanya Israeli kutenda, bali aliendelea kuenenda ndani yake. 12Mambo mengine ya Yoashi, yote aliyoyafanya na nguvu alizopigana nazo dhidi ya Amazia mfalme wa Yuda, yameandikwa katika Kitabu cha Historia ya Wafalme wa Israeli. 13Yoashi alipumzika pamoja na babu zake, na Yeroboamu akaketi juu ya kiti chake cha enzi. Yoashi akazikwa huko Samaria pamoja na wafalme wa Israeli.

14Basi Elisha alikuwa ameugua ugonjwa ambao ungemletea kifo. Yoashi mfalme wa Israeli akashuka kwenda kumwona, akalia juu yake. Akasema, “Baba yangu, baba yangu! Magari ya vita ya Israeli na wapanda farasi wake!” 15Elisha akamwambia, “Chukua upinde na mishale.” Basi akachukua upinde na mishale. 16Kisha akamwambia mfalme wa Israeli, “Weka mkono wako kwenye upinde.” Akafanya hivyo, na Elisha akaweka mikono yake juu ya mikono ya mfalme. 17Akasema, “Fungua dirisha linaloelekea mashariki,” naye akalifungua. Elisha akasema, “Piga mshale!” naye akapiga. Kisha Elisha akasema, “Mshale wa ushindi wa BWANA, mshale wa ushindi juu ya Aramu! Utaishinda Aramu huko Afeki mpaka uimalize kabisa.” 18Akasema, “Chukua mishale,” naye mfalme akaichukua. Kisha akamwambia mfalme wa Israeli, “Piga ardhi.” Akaipiga mara tatu, akaacha. 19Mtu wa Mungu akamkasirikia. Akasema, “Ungepaswa kupiga mara tano au sita! Ndipo ungeishinda Aramu mpaka ikakoma kabisa. Lakini sasa utaishinda Aramu mara tatu tu.”

20Elisha alikufa, wakamzika. Basi vikosi vya wavamizi kutoka Moabu vilikuwa vikiingia katika nchi kila majira ya kuchipua. 21Wakati mmoja watu walipokuwa wakimzika mtu, ghafla wakaona kikosi cha wavamizi, wakamtupa mtu huyo ndani ya kaburi la Elisha. Mtu huyo alipoigusa mifupa ya Elisha, akawa hai, akasimama kwa miguu yake.

22Hazaeli mfalme wa Aramu aliwaonea Israeli muda wote wa utawala wa Yehoahazi. 23Lakini BWANA aliwafanyia neema, akawahurumia. Akawageukia kwa ajili ya agano lake na Abrahamu, Isaka na Yakobo. Hakutaka kuwaangamiza, wala hakuwa amewatupa bado kutoka mbele yake. 24Hazaeli mfalme wa Aramu alipokufa, mwanawe Ben-hadadi akawa mfalme mahali pake. 25Kisha Yehoashi mwana wa Yehoahazi akaiteka tena kutoka kwa Ben-hadadi mwana wa Hazaeli miji ambayo Ben-hadadi alikuwa ameitwaa vitani kutoka kwa Yehoahazi baba yake. Mara tatu Yoashi alimshinda, naye akairudisha miji ya Israeli.