2 Wafalme 19

1Mara mfalme Hezekia aliposikia hayo, aliyararua mavazi yake, akajivika nguo ya magunia, akaingia katika nyumba ya BWANA. 2Akamtuma Eliakimu, msimamizi wa ikulu, Shebna katibu, na makuhani wazee, wote wakiwa wamevaa nguo za magunia, kwa nabii Isaya mwana wa Amozi. 3Wakamwambia, “Hezekia asema hivi: Leo ni siku ya taabu, ya karipio na ya aibu. Watoto wamefika mlangoni pa tumbo la uzazi, wala hakuna nguvu ya kuwazaa. 4Huenda BWANA Mungu wako atayasikia maneno yote ya Rabshake, ambaye bwana wake mfalme wa Ashuru alimtuma kumtukana Mungu aliye hai, naye atamwadhibu kwa maneno ambayo BWANA Mungu wako ameyasikia. Basi inua maombi kwa ajili ya mabaki ambao bado wako hapa.” 5Basi maafisa wa mfalme Hezekia walikuja kwa Isaya. 6Isaya akawaambia, “Mwambieni bwana wenu, ‘Hivi ndivyo BWANA asemavyo: Usiogope kwa sababu ya maneno uliyoyasikia, ambayo vibaraka wa mfalme wa Ashuru wamenitukana kwayo. 7Nitatia roho ndani yake: atasikia habari na kurudi katika nchi yake mwenyewe, nami nitamwangusha kwa upanga katika nchi yake mwenyewe.’” 8Rabshake alirudi, akamkuta mfalme wa Ashuru akiishambulia Libna, kwa sababu alikuwa amesikia kwamba mfalme ameondoka Lakishi. 9Kisha mfalme alisikia kwamba Tirhaka mfalme wa Kushi alikuwa akija kupigana naye. Basi akatuma tena wajumbe kwa Hezekia, akisema, 10“Mwambieni Hezekia mfalme wa Yuda hivi: ‘Usikubali Mungu wako unayemtegemea akudanganye kwa kusema, “Yerusalemu haitatiwa mikononi mwa mfalme wa Ashuru.” 11Wewe mwenyewe umesikia jinsi wafalme wa Ashuru walivyozitendea nchi zote, wakiziangamiza kabisa. Nawe unadhani utaokoka? 12Je, miungu ya mataifa ambayo babu zangu waliyaangamiza iliwaokoa, Gozani, Harani, Resefu na watu wa Edeni walioko Telasari? 13Yuko wapi mfalme wa Hamathi, mfalme wa Arpadi, mfalme wa mji wa Sefarvaimu, wa Hena au wa Iva?’” 14Hezekia aliipokea barua kutoka mkononi mwa wajumbe, akaisoma yote. Akapanda kwenda nyumba ya BWANA, akaikunjua mbele za BWANA.

15Kisha Hezekia akaomba mbele za BWANA: “Ee BWANA, Mungu wa Israeli, uliyeketi juu ya makerubi: wewe, wala si mwingine, ndiwe Mungu wa kila ufalme duniani. Ni wewe uliyezifanya mbingu na dunia. 16Tega sikio lako, Ee BWANA, usikie; fumbua macho yako, Ee BWANA, uone. Sikia maneno ya Senakeribu, aliyemtuma mjumbe wake kumtukana Mungu aliye hai. 17Ni kweli, Ee BWANA, kwamba wafalme wa Ashuru wameyaangamiza mataifa na nchi zao, 18na kuitupa miungu yao motoni. Hiyo haikuwa miungu kamwe, ila miti na mawe yaliyochongwa kwa mikono ya wanadamu, kwa hiyo waliweza kuiangamiza. 19Basi sasa, Ee BWANA Mungu wetu, tafadhali utuokoe kutoka katika nguvu zake, ili kila ufalme duniani ujue kwamba wewe, Ee BWANA, ndiwe Mungu peke yako.”

20Kisha Isaya mwana wa Amozi akatuma ujumbe kwa Hezekia: “BWANA, Mungu wa Israeli, asema hivi: Nimeyasikia maombi yako uliyoniomba kuhusu Senakeribu mfalme wa Ashuru. 21Hili ndilo neno ambalo BWANA amelinena juu yake: Bikira, Binti Sayuni, anakudharau na kukucheka; Binti Yerusalemu anatikisa kichwa chake nyuma yako. 22Je, unajua ni nani uliyemdhihaki na kumtukana? Ni nani uliyempigia kelele, ni nani uliyemwinulia macho yako ya kiburi? Ni Mtakatifu wa Israeli! 23Kupitia wajumbe wako umemdhihaki Bwana. Ulisema, ‘Kwa magari ya vita yasiyohesabika nimepanda vilele vya milima, matuta ya mbali ya Lebanoni. Nitaikata mierezi yake mirefu kuliko yote na misonobari yake iliyo bora. Nitaingia kambi yake ya mbali kabisa na msitu wake uliositawi. 24Nimechimba visima na kunywa maji ya nchi za kigeni, na chini ya nyayo za miguu yangu kila mto wa Misri utakauka.’ 25Je, hujasikia? Nililifanya hili zamani; siku za kale nililipanga. Sasa nimelitimiza, ili wewe uigeuze miji yenye ngome kuwa chungu za kifusi. 26Watu wake walikosa nguvu, wakaogopa na kuaibika. Walikuwa kama mimea ya mashambani na majani mabichi, kama nyasi juu ya paa, iliyoungua kabla haijakua. 27Ninajua uketipo, utokapo na uingiapo, na jinsi unavyonighadhibikia. 28Kwa kuwa unanighadhibikia na kiburi chako kimefika masikioni mwangu, nitatia ndoana yangu puani mwako na hatamu yangu kati ya midomo yako, nami nitakurudisha kwa njia ile ile uliyoijia. 29Hii ndiyo ishara kwako: mwaka huu mtaishi kwa nafaka iliyoota yenyewe, na mwaka ujao kwa chochote kitakachoota kutoka kwake; lakini mwaka wa tatu pandeni na kuvuna, pandeni mashamba ya mizabibu na mle matunda yake. 30Wale wa nyumba ya Yuda watakaookoka na kubaki watatia tena mizizi chini na kuzaa matunda juu. 31Kwa maana mabaki watatoka Yerusalemu, na walionusurika kutoka mlima Sayuni. Wivu mkali wa BWANA wa majeshi utalitimiza jambo hili.

32Kwa hiyo Hivi ndivyo BWANA asemavyo kuhusu mfalme wa Ashuru: Hatakanyaga kamwe katika mji huu. Hatapiga hata mshale mmoja ndani yake, wala hataukabili kwa ngao, wala hatajenga boma la udongo dhidi ya kuta zake. 33Njia iliyomleta hapa ndiyo itakayomrudisha. Mji huu hataingia, asema BWANA. 34Nitaukinga mji huu na kuuokoa, kwa ajili yangu mwenyewe na kwa ajili ya mtumishi wangu Daudi.” 35Usiku ule malaika wa BWANA alitoka, akaenda katika kambi ya Waashuru, akawaua watu 185,000. Watu walipoamka alfajiri, wakawakuta wote wamelala wamekufa. 36Basi Senakeribu mfalme wa Ashuru aliivunja kambi yake, akaondoka. Akarudi kwao, akakaa Ninawi. 37Alipokuwa akisujudu katika nyumba ya Nisroki mungu wake, Adrameleki na Shareza, wanawe mwenyewe, walimuua kwa upanga, wakakimbilia nchi ya Ararati. Na mwanawe Esar-hadoni akatawala mahali pake.