2 Wafalme 10

1Ahabu alikuwa na wana sabini huko Samaria. Yehu akaandika barua, akazipeleka huko, kwa maafisa wa Yezreeli, wazee, na kwa wale waliokuwa walezi wa wana wa Ahabu. Barua zilisema: 2“Sasa, mara barua hii itakapowafikia, kwa kuwa mnao wana wa bwana wenu pamoja nanyi, pamoja na magari ya vita na farasi, mji wenye ngome na silaha, 3mchagueni aliye bora na anayefaa zaidi kati ya wana wa bwana wenu, mkamweke juu ya kiti cha enzi cha baba yake, mkapigane kwa ajili ya nyumba ya bwana wenu.” 4Lakini waliogopa sana, wakasema, “Tazama, wafalme wawili hawakuweza kusimama mbele yake. Sisi tutawezaje?” 5Basi msimamizi wa ikulu, mkuu wa mji, wazee na walezi wakampelekea Yehu ujumbe: “Sisi ni watumishi wako, nasi tutafanya kila utakalotuambia. Hatutamfanya mtu yeyote kuwa mfalme. Fanya lolote unaloona ni jema.” 6Kisha akawaandikia barua ya pili: “Ikiwa mko upande wangu na mtanitii, chukueni vichwa vya watu hao, wana wa bwana wenu, mje kwangu Yezreeli kesho wakati kama huu.” Wakati huo wana wa mfalme, sabini, walikuwa pamoja na wakuu wa mji waliokuwa wakiwalea. 7Barua ilipowafikia, waliwachukua wana wa mfalme, watu sabini, wakawachinja. Kisha wakaweka vichwa vyao katika vikapu, wakampelekea Yehu huko Yezreeli. 8Mjumbe akaja, akamweleza Yehu, “Wameleta vichwa vya wana wa mfalme.” Yehu akasema, “Viwekeni katika chungu mbili kwenye maingilio ya lango la mji mpaka asubuhi.” 9Asubuhi akatoka, akasimama, akawaambia watu wote, “Ninyi hamna hatia. Ni mimi niliyefanya njama dhidi ya bwana wangu, nikamwua. Lakini ni nani aliyewaua hawa wote? 10Basi jueni kwamba hakuna hata neno moja ambalo BWANA alilisema dhidi ya nyumba ya Ahabu litakalokosa kutimia. BWANA amefanya yale aliyoyasema kupitia mtumishi wake Eliya.” 11Basi Yehu akawaua wote waliobaki wa nyumba ya Ahabu huko Yezreeli, pamoja na wakuu wake wote, rafiki zake wa karibu na makuhani wake, mpaka hakumwachia hata mmoja aliyesalia. 12Kisha Yehu akaondoka, akaenda Samaria. Njiani, alipokuwa huko Beth-ekedi ya Wachungaji, 13Yehu akakutana na jamaa za Ahazia mfalme wa Yuda. Akawauliza, “Ninyi ni nani?” Wakajibu, “Sisi ni jamaa za Ahazia. Tumeshuka kuwasalimu wana wa mfalme na wana wa mama wa mfalme.” 14Yehu akasema, “Wakamateni hai!” Basi wakawakamata hai, wakawachinja kwenye shimo la Beth-ekedi, watu arobaini na wawili. Hakumwacha hata mmoja wao.

15Alipoondoka huko, alikutana na Yehonadabu mwana wa Rekabu, aliyekuwa njiani kuja kumlaki. Yehu akamsalimu, akamwambia, “Je, moyo wako ni mnyoofu kwangu, kama moyo wangu ulivyo kwako?” Yehonadabu akajibu, “Ndivyo.” Yehu akasema, “Ikiwa ndivyo, nipe mkono wako.” Akampa mkono wake, naye Yehu akampandisha garini kando yake. 16Akasema, “Njoo pamoja nami uone jinsi nilivyo na wivu kwa ajili ya BWANA.” Basi wakampandisha katika gari la Yehu. 17Alipofika Samaria, aliwaua wote waliobaki wa jamaa ya Ahabu huko Samaria, mpaka akawaangamiza, kama BWANA alivyosema kupitia Eliya.

18Kisha Yehu akawakusanya watu wote, akawaambia, “Ahabu alimtumikia Baali kidogo. Yehu atamtumikia zaidi sana. 19Sasa niitieni manabii wote wa Baali, waabudu wake wote na makuhani wake wote. Asikose mtu yeyote, kwa maana ninafanya dhabihu kubwa kwa Baali. Yeyote atakayekosekana hataishi.” Lakini Yehu alikuwa akifanya kwa hila, ili apate kuwaangamiza waabudu wa Baali. 20Yehu akasema, “Tengeni kusanyiko takatifu kwa ajili ya Baali.” Basi wakalitangaza. 21Yehu akatuma ujumbe katika Israeli yote, na waabudu wote wa Baali wakaja. Hakubaki hata mmoja ambaye hakuja. Wakaingia katika hekalu la Baali, nalo hekalu la Baali likajaa kutoka mwisho mmoja hadi mwingine. 22Yehu akamwambia mtunza chumba cha mavazi, “Toa majoho kwa ajili ya kila mwabudu wa Baali.” Basi akawatolea majoho. 23Kisha Yehu akaingia katika hekalu la Baali pamoja na Yehonadabu mwana wa Rekabu. Akawaambia waabudu wa Baali, “Tafuteni mhakikishe kwamba hakuna hata mmoja wa watumishi wa BWANA aliye hapa pamoja nanyi, bali waabudu wa Baali tu.” 24Waabudu wakaingia kutoa dhabihu na sadaka za kuteketezwa. Yehu alikuwa amekwisha kuweka watu themanini nje, akawaonya, “Ikiwa mmoja wa watu ninaowatia mikononi mwenu atatoroka, yule aliyemwacha atalipa kwa uhai wake.” 25Mara alipomaliza kutoa sadaka ya kuteketezwa, Yehu akawaamuru walinzi na maafisa, “Ingieni mwaue. Msimwache yeyote atoke.” Basi wakawaua kwa upanga. Walinzi na maafisa wakazitupa maiti nje, kisha wakaingia katika patakatifu pa ndani pa hekalu la Baali. 26Wakazitoa nje nguzo za mawe za hekalu la Baali, wakaziteketeza. 27Waliivunja nguzo ya mawe ya Baali, wakalibomoa hekalu la Baali, wakalifanya choo, kama lilivyo mpaka leo. 28Hivyo Yehu akaondoa ibada ya Baali katika Israeli. 29Lakini Yehu hakuziacha dhambi za Yeroboamu mwana wa Nebati, alizowafanya Israeli kutenda: ndama wa dhahabu huko Betheli na huko Dani.

30Kisha BWANA akamwambia Yehu, “Umefanya vyema kwa kutenda yaliyo sawa machoni pangu. Kwa kuwa umeitendea nyumba ya Ahabu sawasawa na yote yaliyokuwa moyoni mwangu, wanao mpaka kizazi cha nne wataketi juu ya kiti cha enzi cha Israeli.” 31Hata hivyo Yehu hakujali kuenenda katika sheria ya BWANA, Mungu wa Israeli, kwa moyo wake wote. Hakuziacha dhambi za Yeroboamu, alizowafanya Israeli kutenda. 32Katika siku hizo BWANA alianza kukata sehemu za Israeli. Hazaeli aliwashinda Waisraeli katika nchi yao yote, 33kutoka Yordani kuelekea mashariki: nchi yote ya Gileadi, nchi ya Wagadi, Wareubeni na Wamanase, kutoka Aroeri karibu na Bonde la Arnoni, Gileadi pamoja na Bashani. 34Mambo mengine ya Yehu, yote aliyoyafanya na uhodari wake wote, yameandikwa katika Kitabu cha Historia ya Wafalme wa Israeli. 35Yehu akapumzika pamoja na babu zake, akazikwa Samaria. Na mwanawe Yehoahazi akawa mfalme mahali pake. 36Yehu alitawala juu ya Israeli huko Samaria kwa miaka ishirini na minane.