2 Wafalme 7

1Elisha akasema, “Sikilizeni neno la BWANA. Hivi ndivyo BWANA asemavyo: ‘Kesho wakati kama huu, karibu lita 7 ya unga laini itauzwa kwa karibu gramu 11.5 za fedha, na karibu lita 14 za shayiri kwa karibu gramu 11.5 za fedha, langoni pa Samaria.’” 2Afisa ambaye mfalme aliegemea mkono wake akamjibu mtu wa Mungu, “Hata kama BWANA angefungua malango ya maji mbinguni, je, jambo hili lingeweza kutokea kweli?” Elisha akajibu, “Utaona likitokea kwa macho yako mwenyewe, lakini hutakula chochote katika chakula hicho.”

3Basi kulikuwa na watu wanne wenye ugonjwa mbaya wa ngozi kwenye maingilio ya lango la mji. Wakaambiana, “Kwa nini tunaketi hapa tukingoja kufa?” 4“Tukisema, ‘Tuingie mjini,’ njaa iko huko, nasi tutakufa huko. Tukibaki hapa, tutakufa. Basi njooni, twende kwenye kambi ya Waaramu tujisalimishe. Wakituacha hai, tutaishi; wakituua, tutakufa.” 5Basi jioni giza lilipoingia waliinuka, wakaenda kwenye kambi ya Waaramu. Lakini walipofika pembeni mwa kambi, hapakuwa na mtu hata mmoja huko. 6Bwana alikuwa amelifanya jeshi la Waaramu lisikie sauti ya magari ya vita na farasi, sauti ya jeshi kubwa, nao wakaambiana, “Tazama, mfalme wa Israeli amewaajiri wafalme wa Wahiti na wafalme wa Misri waje kutushambulia!” 7Basi waliinuka, wakakimbia jioni giza lilipoingia, wakayaacha mahema yao, farasi wao na punda wao. Waliiacha kambi kama ilivyokuwa, wakakimbia kuokoa maisha yao. 8Watu hawa wenye ugonjwa wa ngozi walipofika pembeni mwa kambi, waliingia katika hema moja, wakala na kunywa. Wakachukua kutoka humo fedha, dhahabu na mavazi, wakaenda kuvificha. Kisha wakarudi, wakaingia katika hema jingine, wakachukua vitu kutoka humo pia, wakaenda kuvificha. 9Kisha wakaambiana, “Tunachofanya si sawa. Leo ni siku ya habari njema, nasi tunaificha. Tukingoja mpaka kupambazuke, adhabu itatupata. Njooni, twende tukawaarifu watu wa nyumba ya mfalme.” 10Basi wakarudi, wakawaita walinzi wa lango la mji, wakawaambia, “Tulikwenda kwenye kambi ya Waaramu, na hapakuwa na mtu huko, wala sauti ya mtu kusikika. Kulikuwa na farasi waliofungwa tu na punda waliofungwa, na mahema yameachwa kama yalivyokuwa.” 11Walinzi wa lango wakatangaza habari hiyo, nayo ikapelekwa ndani ya ikulu ya mfalme. 12Mfalme aliinuka usiku, akawaambia maafisa wake, “Nitawaeleza kile ambacho Waaramu wametufanyia. Wanajua kwamba tuna njaa kali, nao wameiacha kambi yao kwenda kujificha mashambani. Wanawaza, ‘Watakapotoka mjini, tutawakamata hai na kuingia mjini.’” 13Mmoja wa maafisa wake akajibu, “Watu wachukue farasi watano kati ya wale waliobaki mjini. Lolote litakalowapata, wao ni kama tu Waisraeli wengine waliosalia hapa, kama Waisraeli wote waliokwisha kuangamia. Tuwatume tuone.” 14Basi wakachukua magari mawili ya vita pamoja na farasi wake, na mfalme akawatuma kulifuata jeshi la Waaramu, akiwaamuru, “Nendeni mkachunguze.” 15Waliwafuata mpaka Yordani, na njia yote ilikuwa imetapakaa mavazi na vifaa ambavyo Waaramu walikuwa wameyatupa walipokimbia kwa haraka. Wajumbe wakarudi, wakamwarifu mfalme. 16Kisha watu wakatoka, wakaiteka nyara kambi ya Waaramu. Basi karibu lita 7 ya unga laini ikauzwa kwa karibu gramu 11.5 za fedha, na karibu lita 14 za shayiri kwa karibu gramu 11.5 za fedha, kama BWANA alivyokuwa amesema. 17Mfalme alikuwa amemweka yule afisa aliyekuwa akimwegemea mkono wake kusimamia lango. Watu wakamkanyaga pale langoni, akafa, kama mtu wa Mungu alivyokuwa ametabiri mfalme aliposhuka kwake. 18Kwa maana mtu wa Mungu alipomwambia mfalme, “Karibu lita 14 za shayiri zitauzwa kwa karibu gramu 11.5 za fedha, na karibu lita 7 ya unga laini kwa karibu gramu 11.5 za fedha, kesho wakati kama huu langoni pa Samaria,” 19yule afisa alikuwa amemjibu mtu wa Mungu, “Hata kama BWANA angefungua malango ya maji mbinguni, je, jambo kama hilo lingeweza kutokea?” Naye Elisha alikuwa amemjibu, “Utaona likitokea kwa macho yako mwenyewe, lakini hutakula chochote katika chakula hicho.” 20Ndivyo hasa ilivyomtokea: watu walimkanyaga langoni, akafa.