1 Wafalme 22

1Kwa miaka mitatu hapakuwa na vita kati ya Aramu na Israeli.

2Kisha katika mwaka wa tatu, Yehoshafati mfalme wa Yuda alishuka kumtembelea mfalme wa Israeli. 3Mfalme wa Israeli akawaambia maafisa wake, “Mnajua kwamba Ramoth-gileadi ni mali yetu, lakini hatufanyi lolote kuirudisha kutoka kwa mfalme wa Aramu.” 4Akamwuliza Yehoshafati, “Je, utakwenda pamoja nami kupigana huko Ramoth-gileadi?” Yehoshafati akamjibu mfalme wa Israeli, “Mimi ni kama wewe, askari wangu ni kama askari wako, farasi wangu ni kama farasi wako.” 5Lakini Yehoshafati akamwambia mfalme wa Israeli, “Kwanza, tafadhali, ulitafute neno la BWANA.” 6Basi mfalme wa Israeli akawakusanya manabii, kama watu mia nne, akawauliza, “Je, niende vitani kupigana na Ramoth-gileadi, au nijizuie?” Wakajibu, “Panda, kwa maana Bwana ataitia mkononi mwa mfalme.” 7Lakini Yehoshafati akasema, “Je, hakuna nabii mwingine wa BWANA hapa ambaye tunaweza kumwuliza?” 8Mfalme wa Israeli akamjibu Yehoshafati, “Bado yupo mtu mmoja ambaye kupitia yeye tungeweza kumwuliza BWANA: Mikaya mwana wa Imla. Lakini mimi namchukia, kwa sababu hanitabirii kamwe mema juu yangu, ila mabaya tu.” Yehoshafati akasema, “Mfalme asiseme hivyo.” 9Basi mfalme wa Israeli akamwita mmoja wa maafisa wa ikulu, akasema, “Mlete Mikaya mwana wa Imla mara moja.” 10Wakati huo mfalme wa Israeli na Yehoshafati mfalme wa Yuda walikuwa wameketi juu ya viti vyao vya enzi, wamevaa mavazi yao ya kifalme, kwenye uwanja wa kupuria nafaka karibu na lango la Samaria, na manabii wote walikuwa wakitabiri mbele yao. 11Sedekia mwana wa Kenaana alikuwa amejitengenezea pembe za chuma, akasema, “Hivi ndivyo BWANA asemavyo: ‘Kwa hizi utawapiga pembe Waaramu mpaka waangamie.’” 12Manabii wote walikuwa wakitabiri jambo lile lile: “Panda Ramoth-gileadi ushinde. BWANA ataitia mkononi mwa mfalme.” 13Mjumbe aliyekwenda kumwita Mikaya akamwambia, “Sikiliza, manabii wote wanasema kwa sauti moja, na wanayoyasema ni mema kwa mfalme. Tafadhali neno lako na liwe kama la mmoja wao, useme mema.” 14Lakini Mikaya akasema, “Kama BWANA aishivyo, lolote BWANA atakaloniambia ndilo nitakalolisema.” 15Alipofika kwa mfalme, mfalme akamwuliza, “Mikaya, je, twende vitani kupigana na Ramoth-gileadi, au tujizuie?” Akajibu, “Panda ushinde. BWANA ataitia mkononi mwa mfalme.” 16Lakini mfalme akamwambia, “Ni mara ngapi nikuapishe uniambie kweli tu kwa jina la BWANA?” 17Ndipo Mikaya akasema, “Niliwaona Israeli wote wametawanyika juu ya vilima, kama kondoo wasio na mchungaji. Naye BWANA akasema, ‘Hawa hawana bwana; kila mmoja wao na arudi nyumbani kwa amani.’” 18Mfalme wa Israeli akamwambia Yehoshafati, “Je, sikukuambia kwamba hanitabirii lolote jema, ila mabaya tu?” 19Mikaya akaendelea, “Basi sikia neno la BWANA. Nilimwona BWANA ameketi juu ya kiti chake cha enzi, na jeshi lote la mbinguni limesimama kumzunguka, upande wake wa kulia na upande wake wa kushoto. 20BWANA akasema, ‘Ni nani atakayemshawishi Ahabu apande na kuanguka huko Ramoth-gileadi?’ Wengine wakashauri hili na wengine lile. 21Kisha roho mmoja akajitokeza, akasimama mbele za BWANA, akasema, ‘Mimi nitamshawishi.’ BWANA akamwuliza, ‘Kwa namna gani?’ Akasema, ‘Nitatoka niwe roho ya uongo katika kinywa cha manabii wake wote.’ BWANA akasema, ‘Utamshawishi, nawe utafaulu. Nenda ukafanye hivyo.’ 23Basi sasa BWANA ametia roho ya uongo katika kinywa cha manabii wako hawa wote. BWANA ameamuru maafa juu yako.” 24Ndipo Sedekia mwana wa Kenaana akamwendea Mikaya, akampiga kofi shavuni. Akamwuliza, “Roho wa BWANA alishika njia gani alipotoka kwangu ili aseme nawe?” 25Mikaya akajibu, “Utajua siku ile utakapoingia katika chumba cha ndani ili kujificha.” 26Kisha mfalme wa Israeli akaamuru, “Mchukueni Mikaya mkamrudishe kwa Amoni, gavana wa mji, na kwa Yoashi, mwana wa mfalme, 27mkawaambie, ‘Hivi ndivyo mfalme asemavyo: “Mtieni mtu huyu gerezani, mkamlishe mkate kidogo na maji kidogo mpaka nitakaporudi salama.”’” 28Mikaya akasema, “Kama utarudi salama hata kidogo, basi BWANA hakusema kupitia mimi.” Akaongeza, “Sikilizeni, enyi mataifa yote!” 29Basi mfalme wa Israeli akapanda kwenda Ramoth-gileadi, na Yehoshafati mfalme wa Yuda pamoja naye. 30Mfalme wa Israeli akamwambia Yehoshafati, “Nitaingia vitani nikiwa nimejibadilisha, lakini wewe vaa mavazi yako ya kifalme.” Basi mfalme wa Israeli akajibadilisha, akaingia vitani. 31Mfalme wa Aramu alikuwa amewapa wakuu wake thelathini na wawili wa magari ya vita amri hii: “Msipigane na mtu yeyote, mdogo au mkubwa, ila mfalme wa Israeli peke yake.” 32Wakuu wa magari ya vita walipomwona Yehoshafati, walisema, “Hakika huyo ndiye mfalme wa Israeli!” Basi wakageuka kumshambulia, naye Yehoshafati akapiga kelele. 33Wakuu wa magari ya vita walipoona kwamba yeye si mfalme wa Israeli, waliacha kumfukuza. 34Lakini mtu mmoja akavuta upinde wake bila kulenga mtu fulani, akampiga mfalme wa Israeli kati ya viungo vya deraya yake ya magamba na kifuko cha kifua. Mfalme akamwambia dereva wa gari lake, “Geuza unitoe vitani, kwa sababu nimejeruhiwa.” 35Siku ile yote vita vikazidi kuwa vikali, naye mfalme akashikiliwa wima garini akiwaelekea Waaramu. Akafa jioni, na damu ya jeraha lake ikatiririka sakafuni mwa gari. 36Jua lilipokuwa likizama, sauti ikapazwa katika jeshi lote: “Kila mtu aende mjini kwake! Kila mtu aende nchini kwake!” 37Basi mfalme akafa. Akaletwa Samaria, wakamzika huko. 38Walipoliosha gari kwenye bwawa la Samaria, mbwa wakairamba damu yake, na makahaba wakaoga huko, sawasawa na neno la BWANA. 39Mambo mengine ya Ahabu, yote aliyoyafanya, jumba la pembe za ndovu alilolijenga na miji yote aliyoijenga, yameandikwa katika Kitabu cha Historia ya Wafalme wa Israeli. 40Basi Ahabu akapumzika pamoja na babu zake, na mwanawe Ahazia akawa mfalme mahali pake.

41Katika mwaka wa nne wa Ahabu mfalme wa Israeli, Yehoshafati mwana wa Asa alianza kutawala juu ya Yuda. 42Yehoshafati alikuwa na umri wa miaka thelathini na mitano alipoanza kutawala, naye akatawala miaka ishirini na mitano huko Yerusalemu. Mama yake aliitwa Azuba binti Shilhi. 43Alifuata njia zote za Asa baba yake, wala hakugeuka kando kutoka kwazo, akafanya yaliyo sawa machoni pa BWANA. Hata hivyo, mahali pa juu hapakuondolewa; watu waliendelea kutoa dhabihu na kufukiza uvumba mahali pa juu. 44Yehoshafati alifanya amani pia na mfalme wa Israeli. 45Mambo mengine ya Yehoshafati, nguvu alizozionyesha na jinsi alivyopigana vita, yameandikwa katika Kitabu cha Historia ya Wafalme wa Yuda. 46Tena akawafukuza nchini makahaba wa kiume wa mahali pa ibada waliokuwa wamebaki tangu siku za Asa baba yake. 47Wakati huo hapakuwa na mfalme katika Edomu; naibu alitawala kama mfalme. 48Yehoshafati alijenga merikebu za Tarshishi ili zisafiri mpaka Ofiri kuleta dhahabu, lakini hazikusafiri kamwe, kwa sababu merikebu hizo zilivunjika huko Esion-geberi. 49Ndipo Ahazia mwana wa Ahabu akamwambia Yehoshafati, “Watu wangu na wasafiri pamoja na watu wako katika merikebu.” Lakini Yehoshafati akakataa. 50Kisha Yehoshafati akapumzika pamoja na babu zake, akazikwa pamoja nao katika mji wa Daudi babu yake. Na mwanawe Yehoramu akawa mfalme mahali pake.

51Katika mwaka wa kumi na saba wa Yehoshafati mfalme wa Yuda, Ahazia mwana wa Ahabu alianza kutawala juu ya Israeli huko Samaria, akatawala juu ya Israeli miaka miwili. 52Alifanya maovu machoni pa BWANA. Alifuata njia za baba yake na mama yake, na njia za Yeroboamu mwana wa Nebati, aliyewaongoza Israeli kutenda dhambi. 53Alimtumikia Baali na kumwabudu, akamkasirisha BWANA Mungu wa Israeli, kama baba yake alivyofanya.