1 Wafalme 1

1Mfalme Daudi sasa alikuwa mzee, mwenye miaka mingi. Wakamfunika kwa nguo, lakini hakuweza kupata joto. 2Basi maafisa wake wakamwambia, “Bwana wangu mfalme na atafutiwe msichana bikira, amhudumie mfalme na kumtunza. Alale mikononi mwako, ili bwana wangu mfalme apate joto.” 3Basi wakatafuta katika nchi yote ya Israeli msichana mzuri. Wakampata Abishagi Mshunami, wakamleta kwa mfalme. 4Msichana huyo alikuwa mzuri sana. Akamtunza mfalme na kumhudumia, lakini mfalme hakulala naye. 5Wakati huo Adoniya mwana wa Hagithi alikuwa akijitanguliza, akisema, “Nitakuwa mfalme.” Akajipatia magari ya vita na wapanda farasi, pamoja na watu hamsini wa kukimbia mbele yake. 6Baba yake hakuwahi kumkemea hata mara moja kwa kumwuliza, “Kwa nini umefanya hivi?” Tena alikuwa mzuri sana wa sura, naye alizaliwa baada ya Absalomu. 7Akashauriana na Yoabu mwana wa Seruya na Abiathari kuhani, nao wakamuunga mkono Adoniya. 8Lakini Sadoki kuhani, Benaya mwana wa Yehoyada, Nathani nabii, Shimei, Rei na mashujaa wa Daudi mwenyewe hawakumuunga mkono Adoniya. 9Adoniya alitoa dhabihu ya kondoo, ng’ombe na ndama walionona kwenye Jiwe la Zohelethi, karibu na En-rogeli. Akawaalika ndugu zake wote, wana wa mfalme, na watu wote wa Yuda waliokuwa maafisa wa mfalme. 10Lakini hakumwalika Nathani nabii, wala Benaya, wala mashujaa, wala ndugu yake Sulemani. 11Ndipo Nathani akamwambia Bathsheba, mama yake Sulemani, “Je, hujasikia kwamba Adoniya mwana wa Hagithi amekuwa mfalme, bila bwana wetu Daudi kujua lolote? 12Basi sasa njoo, nikupe shauri, ili uokoe maisha yako mwenyewe na maisha ya mwanao Sulemani. 13Nenda uingie kwa mfalme Daudi umwambie, ‘Bwana wangu mfalme, je, hukumwapia mtumishi wako, “Mwanao Sulemani atakuwa mfalme baada yangu, naye ataketi juu ya kiti changu cha enzi”? Basi kwa nini Adoniya amekuwa mfalme?’ 14Kisha, ukiwa bado unazungumza na mfalme huko, nitaingia nyuma yako na kuyathibitisha maneno yako.” 15Basi Bathsheba akaingia kwa mfalme chumbani mwake. Mfalme alikuwa mzee sana, na Abishagi Mshunami alikuwa akimhudumia. 16Bathsheba akainama sana mbele ya mfalme, naye mfalme akauliza, “Unataka nini?” 17Akamwambia, “Bwana wangu, wewe mwenyewe ulimwapia mtumishi wako kwa BWANA Mungu wako, ‘Mwanao Sulemani atakuwa mfalme baada yangu, naye ataketi juu ya kiti changu cha enzi.’ 18Lakini sasa Adoniya amekuwa mfalme, nawe, bwana wangu mfalme, hata hujui. 19Ametoa dhabihu ya ng’ombe wengi, ndama walionona na kondoo, akawaalika wana wote wa mfalme, Abiathari kuhani na Yoabu mkuu wa jeshi. Lakini mtumishi wako Sulemani hakumwalika. 20Nawe, bwana wangu mfalme, Israeli wote wanakutazama, wakingoja uwaambie ni nani atakayeketi juu ya kiti cha enzi cha bwana wangu mfalme baada yake. 21La sivyo, bwana wangu mfalme atakapopumzika pamoja na babu zake, mimi na mwanangu Sulemani tutahesabiwa kuwa wahalifu.” 22Alipokuwa bado akizungumza na mfalme, Nathani nabii akafika. 23Mfalme akaambiwa, “Nathani nabii yuko hapa.” Basi akaingia mbele ya mfalme, akamsujudia kifudifudi hadi chini. 24Nathani akasema, “Bwana wangu mfalme, je, ulisema, ‘Adoniya atakuwa mfalme baada yangu, naye ataketi juu ya kiti changu cha enzi’? 25Kwa maana leo ameshuka na kutoa dhabihu ya ng’ombe wengi, ndama walionona na kondoo. Amewaalika wana wote wa mfalme, wakuu wa jeshi na Abiathari kuhani. Sasa hivi wanakula na kunywa mbele yake na kupiga kelele, ‘Mfalme Adoniya na aishi maisha marefu!’ 26Lakini mimi mtumishi wako hakunialika, wala Sadoki kuhani, wala Benaya mwana wa Yehoyada, wala mtumishi wako Sulemani. 27Je, bwana wangu mfalme amefanya jambo hili bila kumjulisha mtumishi wako ni nani atakayeketi juu ya kiti cha enzi cha bwana wangu mfalme baada yake?”

28Ndipo mfalme Daudi akajibu, “Mwiteni Bathsheba arudi kwangu.” Basi akaingia mbele ya mfalme, akasimama mbele yake. 29Ndipo mfalme akaapa, “Kama BWANA aishivyo, aliyeniokoa kutoka katika kila taabu, 30leo nitafanya sawasawa na nilivyokuapia kwa BWANA, Mungu wa Israeli: ‘Mwanao Sulemani atakuwa mfalme baada yangu, naye ataketi juu ya kiti changu cha enzi mahali pangu.’” 31Bathsheba akainama kifudifudi hadi chini, akamheshimu mfalme, akasema, “Bwana wangu mfalme Daudi na aishi milele!”

32Kisha mfalme Daudi akasema, “Niitieni Sadoki kuhani, Nathani nabii na Benaya mwana wa Yehoyada.” Basi wakaja mbele ya mfalme. 33Mfalme akawaambia, “Wachukueni maafisa wa bwana wenu pamoja nanyi. Mpandisheni mwanangu Sulemani juu ya nyumbu wangu mwenyewe, mkamshushe mpaka Gihoni. 34Huko Sadoki kuhani na Nathani nabii watampaka mafuta awe mfalme juu ya Israeli. Kisha pigeni baragumu ya pembe ya kondoo mkipiga kelele, ‘Mfalme Sulemani na aishi maisha marefu!’ 35Kisha rudini huku juu nyuma yake, naye aje aketi juu ya kiti changu cha enzi. Yeye atakuwa mfalme mahali pangu, kwa kuwa nimemweka kuwa kiongozi juu ya Israeli na Yuda.” 36Benaya mwana wa Yehoyada akamjibu mfalme, “Amina! BWANA, Mungu wa bwana wangu mfalme, naye aseme hivyo. 37Kama BWANA alivyokuwa pamoja na bwana wangu mfalme, vivyo hivyo na awe pamoja na Sulemani, na akifanye kiti chake cha enzi kuwa kikuu zaidi kuliko kiti cha enzi cha bwana wangu mfalme Daudi!” 38Basi Sadoki kuhani, Nathani nabii, Benaya mwana wa Yehoyada, pamoja na Wakerethi na Wapelethi, wakashuka. Wakampandisha Sulemani juu ya nyumbu wa mfalme Daudi, wakampeleka Gihoni. 39Sadoki kuhani akaleta pembe ya mafuta kutoka hemani, akampaka Sulemani mafuta. Kisha wakapiga baragumu ya pembe ya kondoo, na watu wote wakapiga kelele, “Mfalme Sulemani na aishi maisha marefu!” 40Kisha watu wote wakapanda nyuma yake, wakipiga filimbi na kufurahi kwa furaha kuu, hata ardhi ikatikisika kwa kelele zao. 41Adoniya na wageni wote waliokuwa pamoja naye wakasikia hayo walipokuwa wakimaliza kula. Yoabu aliposikia sauti ya baragumu, akasema, “Kwa nini mji uko katika ghasia namna hii?” 42Alipokuwa bado akizungumza, Yonathani mwana wa Abiathari kuhani akafika. Adoniya akasema, “Ingia. Wewe ni mtu mwema; bila shaka unaleta habari njema.” 43Yonathani akamjibu Adoniya, “Hata kidogo! Bwana wetu mfalme Daudi amemfanya Sulemani kuwa mfalme. 44Mfalme alimtuma pamoja naye Sadoki kuhani, Nathani nabii, Benaya mwana wa Yehoyada, na Wakerethi na Wapelethi, nao wakampandisha juu ya nyumbu wa mfalme. 45Sadoki kuhani na Nathani nabii wamempaka mafuta awe mfalme huko Gihoni. Kutoka huko wamepanda wakifurahi, na mji wote umejaa ghasia. Hiyo ndiyo kelele mliyoisikia. 46Zaidi ya hayo, Sulemani ameketi juu ya kiti cha enzi cha kifalme. 47Zaidi ya hayo, maafisa wa mfalme wamekuja kumpongeza bwana wetu mfalme Daudi, wakisema, ‘Mungu na alifanye jina la Sulemani kuwa maarufu kuliko lako, na kiti chake cha enzi kiwe kikuu kuliko chako!’ Naye mfalme akasujudu kitandani pake kumwabudu Mungu. 48Tena mfalme amesema hivi: ‘Na abarikiwe BWANA, Mungu wa Israeli, ambaye leo amenipa mtu wa kuketi juu ya kiti changu cha enzi, akaniruhusu kuona hilo kwa macho yangu mwenyewe.’” 49Ndipo wageni wote wa Adoniya wakaondoka kwa hofu, kila mmoja akaenda zake. 50Adoniya alimwogopa Sulemani, basi akaondoka, akaenda akazishika pembe za madhabahu. 51Sulemani akaambiwa, “Adoniya anamwogopa mfalme Sulemani. Ameshika pembe za madhabahu, naye anasema, ‘Mfalme Sulemani na aniapie kwanza leo kwamba hatamwua mtumishi wake kwa upanga.’” 52Sulemani akasema, “Akijionyesha kuwa mtu mwema, hata unywele mmoja wa kichwa chake hautaanguka chini. Lakini kosa lolote likionekana ndani yake, atakufa.” 53Ndipo mfalme Sulemani akatuma watu wakamshusha kutoka madhabahuni. Adoniya akaja akamsujudia mfalme Sulemani, naye Sulemani akamwambia, “Nenda nyumbani kwako.”