1 Wafalme 5

1Hiramu mfalme wa Tiro aliwatuma maafisa wake kwa Sulemani aliposikia kwamba Sulemani amepakwa mafuta kuwa mfalme mahali pa baba yake, kwa kuwa Hiramu alikuwa rafiki wa Daudi siku zote.

2Sulemani akampelekea Hiramu ujumbe huu: 3“Unajua kwamba baba yangu Daudi hakuweza kujenga nyumba kwa ajili ya jina la BWANA Mungu wake kwa sababu ya vita alivyopigwa kila upande, mpaka BWANA alipowaweka adui zake chini ya nyayo za miguu yake. 4Lakini sasa BWANA Mungu wangu amenipa raha pande zote. Sina adui, wala hakuna msiba unaonikabili. 5Basi nakusudia kujenga nyumba kwa ajili ya jina la BWANA Mungu wangu, kama BWANA alivyomwambia baba yangu Daudi: ‘Mwanao, nitakayemweka juu ya kiti chako cha enzi mahali pako, ndiye atakayejenga nyumba kwa ajili ya jina langu.’ 6Basi sasa toa amri wanikatie mierezi ya Lebanoni. Watumishi wangu watafanya kazi pamoja na watumishi wako, nami nitakulipa mshahara wowote utakaoutaja kwa ajili ya watumishi wako. Unajua kwamba hakuna mtu kati yetu anayejua kukata miti vizuri kama Wasidoni.” 7Hiramu aliposikia maneno ya Sulemani, alifurahi sana, akasema, “Na abarikiwe BWANA leo, aliyempa Daudi mwana mwenye hekima atawale juu ya taifa hili kubwa!” 8Kisha Hiramu akampelekea Sulemani ujumbe: “Nimepokea ujumbe ulionitumia. Nitafanya yote unayotaka kuhusu mbao za mierezi na mbao za misunobari. 9Watumishi wangu wataleta magogo kutoka Lebanoni mpaka baharini, nami nitayafunga kuwa matarafa yaende baharini mpaka mahali utakaponitajia. Huko nitayafungua, nawe utayachukua. Nawe utanitimizia ninalotaka kwa kuwapa watu wa nyumbani mwangu chakula.” 10Basi Hiramu akampatia Sulemani mbao zote za mierezi na misunobari alizozitaka. 11Sulemani alimpa Hiramu kama lita milioni 4.4 za ngano kuwa chakula cha watu wa nyumbani mwake, na kama lita 4,400 za mafuta ya zeituni yaliyokamuliwa. Sulemani alimpa Hiramu hayo mwaka baada ya mwaka.

12BWANA alimpa Sulemani hekima, kama alivyomwahidi. Hiramu na Sulemani walikuwa na amani, nao wawili wakafanya mkataba. 13Mfalme Sulemani aliwaandikisha watu wa kazi ya kulazimishwa kutoka Israeli wote, nao walikuwa watu elfu thelathini. 14Aliwatuma Lebanoni kwa zamu za watu elfu kumi kila mwezi. Walikaa mwezi mmoja huko Lebanoni na miezi miwili nyumbani. Adoniramu alikuwa msimamizi wa kazi ya kulazimishwa.

15Sulemani alikuwa pia na watu elfu sabini waliobeba mizigo na elfu themanini waliochonga mawe katika nchi ya milima, 16zaidi ya maafisa wakuu wa Sulemani elfu tatu na mia tatu waliosimamia kazi na kuwaongoza watu walioifanya. 17Kwa amri ya mfalme walichimbua mawe makubwa ya thamani, ili msingi wa nyumba uwekwe kwa mawe yaliyochongwa. 18Wajenzi wa Sulemani na wajenzi wa Hiramu na watu wa Gebali waliyachonga mawe, wakaandaa mbao na mawe kwa ajili ya kujenga nyumba.