1 Wafalme 8

1Kisha Sulemani aliwaita pamoja wazee wa Israeli, wakuu wote wa makabila na viongozi wa jamaa za Waisraeli, waje kwa mfalme Sulemani huko Yerusalemu. Walipaswa kulipandisha sanduku la agano la BWANA kutoka mji wa Daudi, yaani Sayuni. 2Watu wote wa Israeli walikusanyika mbele ya mfalme Sulemani wakati wa sikukuu katika mwezi wa Ethanimu, ambao ni mwezi wa saba. 3Wazee wote wa Israeli walipokuwa wamefika, makuhani wakaliinua sanduku. 4Walilipandisha sanduku la BWANA, Hema la Kukutania na vyombo vyote vitakatifu vilivyokuwa ndani ya hema. Makuhani na Walawi ndio waliovibeba. 5Mfalme Sulemani na jumuiya yote ya Israeli waliokuwa wamekusanyika pamoja naye walikuwa mbele ya sanduku, wakitoa dhabihu za kondoo na ng’ombe wengi mno wasioweza kuhesabika wala kutolewa idadi. 6Kisha makuhani wakalileta sanduku la agano la BWANA mahali pake katika chumba cha ndani cha nyumba, Patakatifu pa Patakatifu, chini ya mabawa ya makerubi. 7Makerubi yalinyoosha mabawa yao juu ya mahali sanduku lilipokaa, hivyo makerubi yakawa kifuniko juu ya sanduku na mipiko yake. 8Mipiko ilikuwa mirefu hata ncha zake zilionekana kutoka patakatifu, mbele ya chumba cha ndani, ingawa hazikuonekana kutoka nje. Ipo huko mpaka leo. 9Ndani ya sanduku hapakuwa na kitu ila zile mbao mbili za mawe ambazo Musa aliziweka humo huko Horebu, mahali BWANA alipofanya agano na Waisraeli baada ya kutoka nchi ya Misri. 10Makuhani walipokuwa wakitoka patakatifu, wingu likaijaza nyumba ya BWANA. 11Makuhani hawakuweza kusimama kufanya huduma yao kwa sababu ya wingu, kwa kuwa nyumba ya BWANA ilijaa utukufu wa BWANA.

12Ndipo Sulemani akasema, “BWANA amesema kwamba atakaa katika giza nene. 13Hakika nimekujengea nyumba iliyotukuka, mahali pa wewe kukaa milele.” 14Kisha mfalme akageuka, akalibariki kusanyiko lote la Israeli, nalo kusanyiko lote la Israeli lilikuwa limesimama pale. 15Akasema, “Na abarikiwe BWANA, Mungu wa Israeli, ambaye kwa kinywa chake mwenyewe alimwahidi baba yangu Daudi, na kwa mkono wake mwenyewe sasa ameitimiza ahadi hiyo. Kwa maana alisema, 16‘Tangu siku nilipowatoa watu wangu Israeli kutoka Misri, sikuchagua mji wowote katika kabila lolote la Israeli ili kujenga humo nyumba ambamo jina langu lingekaa. Lakini nilimchagua Daudi atawale watu wangu Israeli.’ 17Baba yangu Daudi alikuwa na nia moyoni mwake ya kujenga nyumba kwa ajili ya jina la BWANA, Mungu wa Israeli. 18Lakini BWANA akamwambia baba yangu Daudi, ‘Ulitaka kujenga nyumba kwa ajili ya jina langu, nawe ulifanya vyema kuwa na nia hiyo moyoni mwako. 19Lakini si wewe utakayeijenga nyumba hiyo. Mwanao, mzao wako mwenyewe, ndiye atakayeijenga nyumba kwa ajili ya jina langu.’ 20Sasa BWANA ameitimiza ahadi aliyoitoa. Nimechukua nafasi ya baba yangu Daudi na kuketi juu ya kiti cha enzi cha Israeli, kama BWANA alivyoahidi, nami nimeijenga nyumba hii kwa ajili ya jina la BWANA, Mungu wa Israeli. 21Huko nimeandaa mahali pa sanduku lililo na agano la BWANA, alilofanya na babu zetu alipowatoa katika nchi ya Misri.”

22Kisha Sulemani akasimama mbele ya madhabahu ya BWANA, mbele ya kusanyiko lote la Israeli, akainyoosha mikono yake kuelekea mbinguni. 23Akasema, “BWANA, Mungu wa Israeli, hakuna Mungu kama wewe mbinguni juu wala duniani chini. Wewe unashika agano lako na kuwaonyesha fadhili watumishi wako wanaoenenda mbele yako kwa moyo wao wote, 24Wewe umemtimizia mtumishi wako, baba yangu Daudi, ahadi uliyompa. Kwa kinywa chako uliahidi, na kwa mkono wako umeitimiza, kama ilivyo leo. 25Sasa, BWANA, Mungu wa Israeli, mtimizie mtumishi wako, baba yangu Daudi, ahadi uliyompa: ‘Hutakosa kamwe mtu wa ukoo wako wa kuketi mbele yangu juu ya kiti cha enzi cha Israeli, ikiwa wazao wako watakuwa waangalifu jinsi wanavyoishi na kuenenda mbele yangu kama wewe ulivyoenenda mbele yangu.’ 26Basi sasa, Mungu wa Israeli, tafadhali ahadi uliyompa mtumishi wako, baba yangu Daudi, na ithibitike. 27Lakini je, kweli Mungu ataishi duniani? Mbingu zenyewe, hata mbingu za juu kabisa, haziwezi kukutosha. Sembuse nyumba hii niliyoijenga! 28Lakini sikiliza sala ya mtumishi wako na dua yake ya rehema, BWANA Mungu wangu. Sikia kilio na sala anayoiomba mtumishi wako mbele yako siku hii, 29ili usiku na mchana macho yako yawe wazi kuelekea nyumba hii, mahali ulipopasema, ‘Jina langu litakuwa huko.’ Sikiliza sala ambayo mtumishi wako anaiomba akielekea mahali hapa. 30Sikiliza dua ya mtumishi wako na ya watu wako Israeli wanapoomba wakielekea mahali hapa. Usikie ukiwa mbinguni, makao yako; nawe ukisikia, usamehe. 31Mtu akimkosea jirani yake na kutakiwa kuapa, naye akaja na kuapa kiapo mbele ya madhabahu yako katika nyumba hii, 32basi usikie ukiwa mbinguni, ukatende. Uwahukumu watumishi wako: umhukumu mwenye hatia kwa kuleta juu ya kichwa chake yale aliyoyatenda, na umtangaze asiye na hatia kuwa yuko sawa kwa kumlipa kwa kadiri ya haki yake.

33Watu wako Israeli watakaposhindwa na adui kwa sababu wamekutenda dhambi, nao wakakurudia, wakalikiri jina lako, wakaomba na kukusihi katika nyumba hii, 34basi usikie ukiwa mbinguni, uwasamehe watu wako Israeli dhambi yao, ukawarudishe katika nchi uliyowapa babu zao.

35Anga litakapofungwa na mvua isinyeshe kwa sababu wamekutenda dhambi, nao wakaomba wakielekea mahali hapa, wakalikiri jina lako na kuiacha dhambi yao kwa sababu umewanyenyekeza, 36basi usikie ukiwa mbinguni, uisamehe dhambi ya watumishi wako, watu wako Israeli, unapowafundisha njia njema ya kuienenda. Ukanyeshe mvua juu ya nchi yako, nchi uliyowapa watu wako kuwa urithi wao.

37Kukiwa na njaa katika nchi, au tauni, au ukungu wa mimea au koga, nzige au panzi, au adui yao akiwazingira katika mji wao wowote, pigo lolote au ugonjwa wowote ukitokea, 38sala yoyote au dua yoyote ya rehema itakayoombwa na mtu yeyote miongoni mwa watu wako wote Israeli, kila mmoja akijua mateso ya moyo wake mwenyewe na kuinyoosha mikono yake kuelekea nyumba hii, 39basi usikie ukiwa mbinguni, makao yako, usamehe. Utende, ukampe kila mmoja kwa kadiri ya njia zake zote, kwa kuwa unaujua kila moyo. Wewe peke yako unaijua mioyo ya wanadamu wote, 40ili wakuche siku zote watakazoishi katika nchi uliyowapa babu zetu. 41Kuhusu mgeni ambaye si mmoja wa watu wako Israeli, lakini anakuja kutoka nchi ya mbali kwa sababu ya jina lako 42(kwa maana watasikia habari za jina lako kuu, mkono wako wenye nguvu na mkono wako ulionyoshwa), naye anapokuja na kuomba akielekea nyumba hii, 43basi usikie ukiwa mbinguni, makao yako, ukatende yote anayokuomba mgeni huyo. Ndipo mataifa yote ya dunia yatalijua jina lako na kukucha kama watu wako Israeli, nayo yatajua kwamba jina lako limeitwa juu ya nyumba hii niliyoijenga. 44Watu wako watakapotoka kupigana na adui yao, popote utakapowatuma, nao wakamwomba BWANA wakielekea mji ulioichagua na nyumba niliyoijenga kwa ajili ya jina lako, 45basi usikie ukiwa mbinguni sala yao na dua yao, ukawapatie haki yao. 46Watakapokutenda dhambi (na hakuna mtu asiyetenda dhambi kamwe), nawe ukawakasirikia na kuwatia mikononi mwa adui, na watekaji wao wakawachukua mateka mpaka nchi ya adui, iwe mbali au karibu, 47nao wakapata akili tena katika nchi walikochukuliwa mateka, wakageuka na kukusihi katika nchi ya wale waliowateka, wakisema, ‘Tumetenda dhambi; tumekosa na kutenda uovu,’ 48wakikurudia kwa moyo wao wote na kwa roho yao yote katika nchi ya adui zao waliowachukua, wakakuomba wakielekea nchi yao uliyowapa babu zao, mji ulioichagua na nyumba niliyoijenga kwa ajili ya jina lako, 49basi usikie ukiwa mbinguni, makao yako, sala yao na dua yao, ukawapatie haki yao, 50uwasamehe watu wako waliokutenda dhambi, na maasi yao yote waliyokuasi. Uwape kuonewa huruma mbele ya watekaji wao, ili wawatendee kwa rehema, 51kwa maana wao ni watu wako na urithi wako, uliowatoa Misri, katika tanuru ya chuma, 52Macho yako na yawe wazi kwa dua ya mtumishi wako na kwa dua ya watu wako Israeli, nawe uwasikie kila wanapokulilia. 53Kwa maana uliwatenga kutoka mataifa yote ya dunia wawe urithi wako mwenyewe, kama ulivyotangaza kupitia mtumishi wako Musa ulipowatoa babu zetu Misri, Bwana MUNGU.”

54Sulemani alipomaliza kumwomba BWANA sala hii yote na dua hii, aliinuka kutoka mahali alipokuwa amepiga magoti mbele ya madhabahu ya BWANA, mikono yake ikiwa imenyooshwa kuelekea mbinguni. 55Akasimama, akalibariki kusanyiko lote la Israeli kwa sauti kuu, akisema, 56“Na abarikiwe BWANA, aliyewapa watu wake Israeli raha, kama alivyoahidi. Katika ahadi zote njema alizozitoa kupitia mtumishi wake Musa, hakuna hata neno moja lililoshindwa. 57BWANA Mungu wetu na awe pamoja nasi kama alivyokuwa pamoja na babu zetu. Asituache kamwe wala asitutupe, 58ili aigeuze mioyo yetu imwelekee yeye, nasi tuenende katika njia zake zote na kushika amri zake, kanuni zake na maamuzi yake, aliyowaamuru babu zetu. 59Maneno haya niliyoomba mbele za BWANA na yakae karibu na BWANA Mungu wetu mchana na usiku, ili amtetee mtumishi wake na watu wake Israeli siku kwa siku kwa kadiri ya kila hitaji, 60ili kila taifa duniani lijue kwamba BWANA ndiye Mungu na kwamba hakuna mwingine. 61Basi mioyo yenu na iwe kamili kwa BWANA Mungu wetu, mkiishi kwa kufuata kanuni zake na kushika amri zake, kama mnavyofanya leo.” 62Kisha mfalme na Israeli wote pamoja naye wakatoa dhabihu mbele za BWANA. 63Sulemani alimtolea BWANA sadaka za amani: ng’ombe elfu ishirini na mbili na kondoo laki moja na elfu ishirini. Hivyo mfalme na Waisraeli wote wakaiweka wakfu nyumba ya BWANA. 64Siku ile ile mfalme aliitakasa sehemu ya katikati ya ua ulio mbele ya nyumba ya BWANA. Huko alitoa sadaka za kuteketezwa, sadaka za nafaka na sehemu za mafuta za sadaka za amani, kwa sababu madhabahu ya shaba iliyokuwa mbele za BWANA ilikuwa ndogo mno kuzipokea: sadaka za kuteketezwa, sadaka za nafaka na mafuta ya sadaka za amani. 65Basi wakati ule Sulemani aliifanya sikukuu, na Israeli wote pamoja naye, kusanyiko kubwa tangu Lebo-hamathi mpaka kijito cha Misri, mbele za BWANA Mungu wetu, kwa siku saba na siku saba nyingine, jumla siku kumi na nne. 66Siku ya nane aliwaaga watu. Wakambariki mfalme, wakaenda nyumbani wakifurahi na wenye mioyo mikunjufu kwa ajili ya mema yote ambayo BWANA alikuwa amemtendea Daudi mtumishi wake na Israeli watu wake.